އެމްޑީޕީ ޕްރައިމަރީގައި ވާދަކުރެއްވުމަށް ރައީސް ސާލިހު ފޯމު ހުށަހަޅުއްވައިފި

ކުރިޔަށް އޮތް އެމްޑީޕީ ރިޔާސީ ޕްރައިމަރީގައި ވާދަކުރެއްވުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ފޯމު ހުށަހަޅުއްވައިފިއެވެ.

ރައީސް ސާލިޙް ފޯމު ހުށަހެޅުއްވިކަން ހާމަކުރެއްވީ އެމްޑީޕީގެ މެމްބަރު މުހައްމަދު ނާޝިޒް ކުރެއްވި ޓްވީޓެއްގައެވެ.

Advertisement

ނާޝިޒް ވިދާޅުވީ، 2023ގެ ރިޔާސީ އިންތިޚާބުގައި ވާދަކުރާނެ އެމް.ޑީ.ޕީގެ ކެނޑިޑޭޓެއް ހޮވުމަށް ބާއްވާ ޕްރައިމަރީގައި ވާދަކުރެއްވުމަށް، ރައީސް ސާލިހު ފޯމު ހުށައަޅުއްވާފައިވާ ކަމަށެވެ. އެގޮތުން ރައީސް ފޯމު ހުށައަޅުއްވާފައިވަނީ 20،000ށްވުރެ ގިނަ މެމްބަރުންގެ ތާއީދާއެކުކަން ނާޝިޒް ފާހަގަކުރެއްވިއެވެ.

އެމްޑީޕީގެ ރިޔާސީ ޕްރައިމަރީއަށް ވާދަކުރުމަށް ހުޅުވާލީ ޑިސެމްބަރު 18 ވީ އާދިއްތަ ދުވަހުއެވެ. ވާދަކުރަން ބޭނުންވަނީ އެމްޑީޕީގެ 500 މެންބަރުންގެ ތާއީދެވެ. 

އެމްޑީޕީ ރިޔާސީ ޕްރައިމަރީގައި ވާދަކުރަން ބޭނުންވާ މެންބަރުން ފޯމު ހުށަހަޅަން ޖެހޭނީ 24 ޑިސެމްބަރު ވާ ހޮނިހިރު ދުވަހުގެ ހަވީރު 4:00ގެ ކުރިންނެވެ. 

މިހާތަނަށް ރައީސް ސާލިހުގެ އިތުރުން ޕްރައިމަރީގައި ވާދަކުރައްވާކަން އިއުލާނު ކުރައްވާފައިވަނީ އެޕާޓީގެ ރައީސް، އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުއެވެ.

އެމްޑީޕީން އިއުލާންކޮށްފައިވާ ޓައިމްލައިނުގައި ދައްކާގޮތުން 24 ޑިސެމްބަރުގައި ފޯމު ހުށަހެޅުމުގެ މުއްދަތު ހަމަވާއިރު، 26 ޑިސެމްބަރުގައި ކެންޑިޑޭޓުންގެ ފައިނަލް ލިސްޓު، ކެންޑިޑޭޓް ނަންބަރާއެކު އިއުލާން ކުރާނެއެވެ. އަދި 28 ޑިސެމްބަރުގައި ރިޔާސީ ޕްރައިމަރީ ވޯޓަރސް ލިސްޓު އާންމުކުރުމާއި، ލިސްޓަށް ޝަކުވާ ހުށަހެޅުމަށް ހުޅުވާލާއިރު، 31 ޑިސެމްބަރުގެ ހަވީރު 4:00 އާ ހަމަައަށް ވޯޓަރސް ލިސްޓަށް ޝަކުވާ ހުށަހެޅުމުގެ މުއްދަތު ހަމަވާނެއެވެ.

ރިޔާސީ ޕްރައިމަރީގެ ފައިނަލް ވޯޓަރސް ލިސްޓު އާއްމުކުރާނީ 3 ޖެނުއަރީ 2023ގައެވެ. އެއަށްފަހު 10 ޖެނުއަރީގައި ކެންޑިޑޭޓުންގެ މަންދޫބުންނަށް ފުރުސަތު ހުޅުވާލައި، އެ ފުރުސަތު 15 ޖެނުއަރީގެ ނިޔަލަށް ބަންދުކުރާނެއެވެ. ވޯޓުލުން ކުރިއަށްދާނީ 28 ޖެނުއަރީގައެވެ.

އެމްޑީޕީ ރިޔާސީ ޕްރައިމަރީގައި ދެ ރައީސުން ވާދަކުރައްވާއިރު ދެ ބޭފުޅުންގެ މެދުގައި ވަނީ ޚިޔާލުތަފާތުވުން ބޮޑުވެފައެވެ. އަދި އެމްޑީޕީގެ ތެރޭގައި ދެ ރައީސުންގެ ދެ ފެކްޝަނެއް އުފެދި، އަންނަނީ މަސައްކަތްކުރަމުންނެވެ.