މަސްވެރިންގެ ހުރި ކަންބޮޑުވުންތަކަށް ދެތިން މަސްތެރޭގައި ހައްލު ލިބޭނެ: ރައީސް
ބޭނުންފުޅުވަނީ ރައްޔިތުންގެ އަޑު އަހައި ކަންބޮޑުވުންތަކަށް ހައްލު ހޯދައިދިނުން ކަމަށް ވިދާޅުވި
ެރައީސް ޞާލިހް ދާންދޫ ރައްޔިތުންނާ ބައްދަލު ކުރައްވަނީ
ދެކުނުގެ މަސްވެރިންގެ ހުރި ކަންބޮޑުވުންތަކަށް ދެތިން މަސްދުވަހުގެ ތެރޭގައި ހައްލު ލިބިގެންދާނެ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަަދު ޞާލިހު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ހުކުރު ދުވަހު ގއ. ދާންދޫއަށް ވަޑައިގެން އެެ ރަށުގެ ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައެވެ. އެގޮތުން, ރަށުގެ ރައްޔިތުންނާ ބައްދަލު ކުރައްވައި އެ ފަރާތްތަކުގެ ހުރި ކަންބޮޑުވުންތައް އަޑުއައްސަވައި ހައްލު ހޯއްދެއްވުމަށް ކުރެވެން ހުރި ކަންކަން ކުރައްވާނެ ކަމުގެ ޔަގީންކަން ރައީސް ދެއްވިއެވެ.
ރައީސް ވިދާޅުވީ ދާންދޫއަކީ މަސްވެރި ރަށެއްކަމަށްވެފައި މަސްވެރިންނަށް ކޮށްދޭން ޖެހޭ ކަންކަން އެބަހުރިކަމަށެވެ. އެގޮތުން ހައްލު ނުހޯދި ގިނަ ދުވަސްވެފައިވާ ކަންކަން ވެސް އެބަހުރި ކަމަށާއި މި ސަރުކާރު އައި ފަހުން މަސައްކަތް ކުރަމުން އަންނަނީ އެކަންކަމަށް ހައްލު ހޯދައިދިނުމަށް ކަމަށެވެ. ނަމަވެސް މަސްވެރިން ބޭނުންވާ ހަލުވި ސްޕީޑުގައި އެކަން ނުކުރެވޭ ކަން ގަބޫލު ކުރައްވާ ކަމަށާއި އެކަންކަން ހައްލު ކުރުމަށް ކުރަމުން އަންނަ މަސައްކަތްތައް ނިމި އޭގެ މަންފާ ދެތިން މަސްދުވަހުގެ ތެރޭގައި ފެނިގެންދާނެ ކަމަށް ގަބޫލުފުޅު ކުރައްވާ ކަމަށް އެމަނިކުފާނު ވިދާޅުވިއެވެ.
މި ބައްދަލު ކުރެއްވުމުގައި ރައީސް ވަނީ މީގެ ހަތަރު އަހަރު ކުރިން ދާންދޫއަށް ކުރެއްވި ދަތުރުފުޅުގައި ރައްޔިތުން އެދިލެއްވި ގިނަ ކަންކަން ކުރެވެމުން އަންނަކަން ފާހަގަކުރައްވާފައެވެ. އަދި ކުރިއަށް އޮތްތަނުގައި ވެސް ރައްޔިތުންގެ އަޑުއަހައި އެކަންކަމަށް ހައްލު ހޯއްދެވުމަށް މަސައްކަތް ކުރައްވާނެ ކަމަށް އެމަނިކުފާނު ވިދާޅުވިއެވެ.
ދާންދޫ ރައްޔިތުންގެ ފަރާތުން ފާހަގަކުރި ކަންތައްތަކުގެ ތެރޭގައި އެ ރަށުގެ ސިއްޙީ ނިޒާމު މިހާރަށްވުރެ ތަރައްގީ ކުރުމާއި ރަށުގައި އެއަރޕޯޓެއް އަޅައިދިނުމާއި މަގުތަކުގައި ތާރު އަޅައިދިނުމާއި ރަށުގެ އެކި ކަންކަމުގައި ސޯލާ ހަކަތައް ބޭނުން ކުރުން ހިމެނެއެވެ. އަދި އެ ރަށުގައި ފަތުރުވެރިކަން ކުރިއެރުވުމަށް ބޭރުގެ އިންވެސްޓަރުން ހޯދައިދިނުމަށް ސަރުކާރުން އެހީތެރިކަން ފޯރުކޮށްދިނުމަށް ވެސް ރައްޔިތުން ވަނީ އެދިފައެވެ.
މި ބައްދަލުވުމުގައި ދާންދޫގެ ރައްޔިތުން ވަނީ ކުރީ ސަރުކާރުތަކުގައި ދާންދޫގައި ނުހިންގާ ވަރަށް މި ސަރުކާރުން ހިންގަމުން އަންނަކަން ފާހަގަކޮށް އެކަމަށް ރައީސްއަށް ޝުކުރު ދަންނަވާފައެވެ.
މި ސަރުކާރުން ދާންދޫގައި ކުރިއަށްގެންދާ މަޝްރޫއުތަކުގެ ތެރޭގައި ރަށުގައި 25 ހެކްޓަރުގެ ބިން ހިއްކުމާއި ރަށުގައި އޭލެވެލް ފެންވަރަށް ކިޔަވައިދިނުމާއި ޒަމާނީ ފުޓުބޯޅަ ދަނޑަކާއި ވޯލީ ކޯޓަކާއި ބަނދަރު އެކްސްޓެންޝަންގެ މަސައްކަތް ފާހަގަކުރެވެއެވެ.
