މަރު ކޮމިޝަނުގެ ރިޕޯޓާ ގުޅިގެން އަޅުއްވަން ޖެހޭ ފިޔަވަޅުތަކާމެދު، ރައީސް އޭޖީ އޮފީހާ މަޝްވަރާތައް ކުރައްވާނެ
އިތުރު ބައެއްގެ މައްޗަށް ދައުވާ ކުރެވޭނަމަ، އެ މަސައްކަތްތައްވެސް ކުރިއަށްދާނެ
ރައިސް އޮފީހުގެ ތަރުޖަމާނު މިއުވާން މުހައްމަދު
މަރާލާފައިވާ މީހުންނާއި ގެއްލުވައިލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުން އަހުމަދު ރިލްވާން އަބްދުﷲގެ މައްސަލައިގައި ތައްޔާރުކޮށްފައިވާ ރިޕޯޓާއި ގުޅިގެން އަޅުއްވަން ޖެހޭ ފިޔަވަޅުތަކާމެދު، ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު އޭޖީ އޮފީހާއެކު މަޝްވަރާތައް ކުރައްވާނެކަމަށް ރައީސް އޮފީހުން ބުނެފިއެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މިއުވާން ވިދާޅުވީ، ރައީސަށް ރިޕޯޓު ލިބިވަޑައިގެންނެވުމާ ގުޅިގެން، ރައީސް ރިޕޯޓު ބައްލަވާފައިވާ ކަމަށާއި، ރިޕޯޓާ ގުޅިގެން ބަންޑާރަނައިބުގެ އޮފީހާއެކު ކުރައްވަން ޖެހޭ މަޝްވަރާތައް ކުރައްވާނެ ކަމަށެވެ.
އަދި އިތުރު ބައެއްގެ މައްޗަށް ދައުވާ ކުރެވޭނަމަ، އެ މަސައްކަތްތައްވެސް ކުރިއަށްދާނެކަން މިއުވާން ފާހަގަ ކުރެއްވިއެވެ.
މިއުވާން ވިދާޅުވީ، އެ މުޅި މައްސަލައިގައި ޤައުމީ ސަލާމަތާ ގުޅުންހުރި ކަންތައްތަކެއްވެސް ހިމެނޭ ކަމަށާއި، ނަމަވެސް ރިޕޯޓާ ގުޅިގެން އަޅުއްވަން ޖެހޭ ފިޔަވަޅުތައް އެޅުއްވުމުގެ ކަންކަން ހުއްޓުމެއް ނެތި ކުރިއަށްދާ ކަމަށެވެ.
އޭގެ އިތުރުން، ޤައުމީ ސަލާމަތާ ގުޅުންހުރި ވާހަކަތައް ހުރުމުގެ ސަބަބުން، އެ ރިޕޯޓުގައި ހުރި ރެކޮމެންޑޭޝަންތަކާ ގުޅޭ ތަފްސީލުތައް ހާމަކުރެވެން ނެތްކަމަށްވެސް މިއުވާން ވިދާޅުވިއެވެ.
މަރާލާފައިވާ މީހުންނާއި ގެއްލުވައިލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުން އަހުމަދު ރިލްވާން އަބްދުﷲގެ މައްސަލައިގައި ތައްޔާރުކޮށްފައިވާ ރިޕޯޓް ރައީސަށް އަރުވާފައިވަނީ 15 ޑިސެމްބަރު 2022 ގައެވެ. ރައީސުލްޖުމްހޫރިއްޔާގެ އޮފީހުގައި ކުރިއަށްދިޔަ މި ބައްދަލުވުމުގައި ކޮމިޝަނުގެ މެންބަރުން ވަނީ، ރިލްވާންގެ އާއިލާ މެންބަރުންނާ ބައްދަލުކުރައްވައި ރިޕޯޓުގައި ހިމެނޭ ކަންކަން ވަރަށް ތަފްސީލުކޮށް އާއިލާއާ ހިއްސާކުރައްވާފައިވާ ކަމަށް ވިދާޅުވެފައެވެ.
ރައީސުލްޖުމްހޫރިއްޔާ ވަނީ، މަރާލާފައިވާ މީހުންނާއި ގެއްލުވައިލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުގެ މެންބަރުން ކުރެއްވި ބުރަ މަސައްކަތް ފާހަގަކުރައްވާފައެވެ. އަދި އެ މަޢުލޫމާތުތައް ހިއްސާކުރައްވަންޖެހޭ ފަރާތްތަކާ ހިއްސާކުރެއްވުމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. މީގެ އިތުރުން ރިޕޯޓާ ގުޅިގެން އިތުރަށް ކުރަންޖެހޭ ކަންކަން ގާނޫނާ އެއްގޮތްވާގޮތުގެ މަތިން ކުރެއްވުމަށް އެމަނިކުފާނު ކޮމިޝަނުގެ މެމްބަރުންގެ އަރިހުން އެދިވަޑައިގެންނެވިއެވެ.
އޭގެ ފަހުން މަރު ކޮމިޝަނުން ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުން ވަނީ ރިލްވާނުގެ މަރާ ގުޅޭ ގިނަ ތަފްސީލުތަކެއް ހިއްސާކޮށްފައެވެ.
