ކަރަބޯ ކަޕްގެ ކުއާޓާ ފައިނަލުން ޔުނައިޓެޑް ޖާގަ ހޯދައިފި

ބާންލީ ބަލިކޮށް ކަރަބޯ ކަޕްގެ ކުއާޓާ ފައިނަލުން މެންޗެސްޓަރ ޔުނައިޓެޑު ޖާގަ ހޯދައިފިއެވެ.

ބުދަ ދުވަހުގެ ރޭ ޔުނައިޓެޑުގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 2-0 އިންނެވެ. މިއީ ވޯލްޑް ކަޕަށްފަހު ކުލަބް ފުޓުބޯޅައިގެ މެޗުތައް ފެށިފަހުން ޔުނައިޓެޑު ކުޅުނު ފުރަތަމަ މެޗެވެ. ޤަތަރުގައި ނިމުނު ވޯލްޑް ކަޕަށް ފަހު ސީޒަން އަލުން ފެށީ ކަރަބޯ ކަޕްގެ މެޗުތަކުންނެވެ.

މެޗުގެ 27 ވަނަ މިނެޓުގައި ޔުނައިޓެޑަށް ލީޑު ނަގައިދިނީ ޑެންމާކު ފޯވާޑް ކްރިސްޓިއަން އެރިކްސަންއެވެ. އެއީ އާރޮން ވަން ބިސާކާ ބާންލީގެ ގޯލު ކުރި މައްޗަށް ހުރަސްކޮށްދިން ބޯޅައެއް ގޯލަށް ވައްދާލައިގެން އެރިކްސަން ކާމިޔާބުކޮށްދިން ލަނޑެކެވެ. ދެ ވަނަ ހާފުގައި ޔުނައިޓެޑަށް ލީޑު ފުޅާކޮށްދިނީ މާކަސް ރަޝްފޯޑުއެވެ. އެއީ މެޗުގެ 57 ވަނަ މިނެޓުގައި ސްކޮޓް މެކްޓޮމިނޭ ދިން ބޯޅައެއް ހިފައިގެން ގޮސް ބާލިންގެ އޭރިޔާ ތެރެއަށް ވަދެ ގޯލަށް ފޮނުވާލައިގެންނެވެ.

ކަރަބޯ ކަޕްގައި ބުދަ ދުވަހުގެ ރޭ ކުޅުނު އެހެން މެޗުތަކަށް ބަލާއިރު، ޗާލްޓަންގެ ދެ ދަނޑުގައި ބްރައިޓަންއާ ބައްދަލުކުރި މެޗުގެ ފުރިހަމަ ވަގުތު ހަމަވީ އެއްވެސް ޓީމަކަށް ލަނޑެއް ކާމިޔާބު ނުކުރެވިއެވެ. ނަތީޖާ ނެރުމަށް ޖެހި ޕެނަލްޓީ ޗާލްޓަން އިން ކާމިޔާބުކުރީ 4-3 އިންނެވެ. ބްލެކްބާން ރޯވާސްގެ ދަނޑުގައި ކުޅުނު މެޗު 4-1 އިން ކާމިޔާބުކުރީ ނޮޓިންހަމް ފޮރެސްޓްއެވެ.