ވޯލްޑް ކަޕަށްފަހު އެމްބާޕޭ ޕީއެސްޖީގެ ފަރިތަކުރުންތަކަށް

ފީފާ ވޯލްޑް ކަޕް ނިމުމާއެކު ފްރާންސްގެ ތަރި ކީލިއަން އެމްބާޕޭ ޕެރިސް ސެެއިންޓް ޖާމަން (ޕީއެސްޖީ)ގެ ފަރިތަކުރުންތަކުގައި ބައިވެރިވުމަށް ހާޒިރުވެއްޖެއެވެ.

އެމްބާޕޭ ޕީއެެސްޖީގެ ފަރިތަކުރުންތަކަށް ހާޒިރުވެފައިވަނީ ބުދަ ދުވަހުގެ ވަގުތެއްގައެވެ. ޕީއެސްޖީން ވަނީ ބުދަ ދުވަހު އެމްބާޕޭ ފަރިތަކުރުންތަކަށް ހާޒިރުވާ މަންޒަރު ފެންނަ ފޮޓޯއެއް ވެސް ޓުވިޓާގައި ހިއްސާކޮށްފައެވެ. މިއަހަރުގެ މުބާރާތުގައި ފްރާންސް ބަލިވީ ފައިނަލްގައި އާޖެންޓީނާ އަތުންނެވެ. ނަމަވެސް މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާއަކީ އެމްބާޕޭއެވެ. ފައިނަލްގައި އޭނާ ވަނީ ހެޓްރިކް ހަދައިފައެވެ.

ފައިނަލް މެޗު ކުޅުނު ފަހުން 72 ގަޑިއިރު ހަމަ ނުވަނީސް އެމްބާޕޭ ޕީއެސްޖީގެ ފަރިތަކުރުންތަކަށް ހާޒިރުވީ ކުލަބަށް ފޯކަސް ކުރުމަށް ކަމަށް އެމްބާޕޭއާ ހަވާލާދީ ފްރާންސްގެ މީޑިއާތަކުގައި ރިޕޯޓުކޮށްފައިވެއެވެ. ޕީއެސްޖީ މިހާރު އޮތީ ފްރާންސް ލީގުގެ އެއް ވަނަ މަގާމުގައެވެ. މީގެ އިތުރުން ޔުއެފާ ޗެމްޕިއަންސް ލީގުގެ ގަދަ 16 ގައި ޕީއެސްޖީ ވާދަކުރަން ޖެހޭނީ ބަޔާން މިއުނިކާއެވެ. އެމްބާޕޭގެ އަމާޒަކީ ޕީއެސްޖީއާއެކު ޗެމްޕިއަންސް ލީގު ކާމިޔާބު ކުރުމެވެ. މި ސީޒަންގެ މިހާތަނަށް ކުޅުނު އެއްވެސް މެޗަކުން ޕީއެސްޖީ ބަލިވެފައެއްނުވެއެވެ. ފަރިތަކުރުންތަކަށް ހާޒިރުވުމަށް ފަހު އެމްބާޕޭ ވަނީ ޕީއެސްޖީގެ ކޯޗު ކްރިސްޓޮފާ ގަލްޓިއޭއާ ވެސް ބައްދަލުކޮށްފައެވެ.

އެމްބާޕޭއާއެކު ޕީއެސްޖީ އަށް ކުޅެމުން އަންނަ އާޖެންޓީނާގެ ލިއޮނަލް މެސީ އަންނަނީ ވޯލްޑް ކަޕް ކާމިޔާބުވުމުގެ އުފާ ފާޅުކުރަމުންނެވެ. ނަމަވެސް އައު އަހަރާއެކު މެސީ ވެސް ޕީއެސްޖީގެ ފަރިތަކުރުންތަކަށް ހާޒިރުވާނެ ކަމަށް ރިޕޯޓުތައް ބުނެއެވެ.