ހުޅުމާލެ ފުރަތަމަ ފިޔަވަހީގައި 491 ވީލްޗެއަރ ރޭމްޕް ގާއިމް ކޮށްފި
އެޗްޑީސީން އަންނަނީ ހުޅުމާލެ ދެވަނަ ފިޔަވަހީގެ ބީޗުގައި ވެސް ވީލްޗެއަރ ރޭމްޕެއް ހެދުމުގެ މަސައްކަތް ކުރަމުން
އެޗްޑީސީ ގެ ފަރާތުން ރޭމްޕް ހެދުމުގެ މަސައްކަތް ކުރަނީ
ހުޅުމާލޭގައި ވީލްޗެއަރގައި އުޅޭ ފަރާތްތަކަށް ފަސޭހަ ކަމާއެކު މަގުމަތީގެ ބޭނުން ކުރެވޭ ގޮތް ހެދުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލެ ފުރަތަމަ ފިޔަވަހީގައި 491 ވީލްޗެއަރ ރޭމްޕް ގާއިމް ކޮށްފިއެވެ.
އެޗްޑީސީން ބުނީ ހުޅުމާލެގައި ގިނަ އަދަދެއްގެ ބަޔަކު އާބާދުވެގެން އަންނައިރު އެތަނުގައި ދިރިއުޅެމުންދާ އަދި އެކިބޭނުންތަކަށް ހުޅުމާލެ ޒިޔާރާތްކުރާ ފަރާތްތަކަށް ފަސޭހަ ވާނެ ގޮތްތައް ބަލާ ގިނަ ބަދަލުތަކެއް އެ ކުންފުނީގެ ފަރާތުން ގެންނަމުންދާ ކަމަށެވެ. އެގޮތުން ނުކުޅެދުންތެރިކަން ހުންނަ ފަރާތްތަކަށް ހުރި ދަތިތައް ހައްލުކޮށްދިނުމަށް ކުރެވެމުންދާ މަސައްކަތްތަކުގެ ތެރެއިން އެކި ސަރަހައްދުތަކުގައި ވީލްޗެއަރ ރޭމްޕްތައް ޤާއިމު ކުރުމުގެ މަސައްކަތް ކުރަމުން އަންނަކަން އެ ކުންފުނިން ފާހަގަކުރިއެވެ.
ހުޅުމާލެ ފުރަތަމަ ފިޔަވަހީގައި ވެސް ގިނަ ބަޔަކު ދިރިއުޅެމުންދާއިރު، ނުކުޅުދުންތެރިކަން ހުންނަ ފަރާތްތަކަށް މަގުމަތީގައި ހިނގާބިނގާވެ އުޅުމަށް ދިމާވާ ދަތިތަކަށް ހައްލު ހޯދައިދިނުމުގެ ގޮތުން އެޗްޑީސީގެ ފަރާތުން ވަނީ އެކި ސަރަހައްދުތަކުގައި 491 ވީލްޗެއަރ ރޭމްޕް ގާއިމްކޮށްފައެވެ. މީގެ އިތުރުން ހުޅުމާލެ ދެވަނަ ފިޔަވަހީގައި އެންމެ ގިނަ އަދަދަކަށް މީހުން ދިރިއުޅޭ ހިޔާ ފުލެޓުގައިވެސް ހާއްސަ އެހީއަށް ބޭނުންވާ މީހުން ގިނަވުމުގެ ސަބަބުން އެތަންތަނުގައި ވެސް އެޗްޑިސީން ވަނީ ވީލްޗެއަރ އެކްސެސް ގާއިމް ކޮށްފައެވެ. އެގޮތުން ކޮންމެ ޓަވަރެއްގައި، އެ ޓަވަރަކުން ބޭރަށް ނުކުތުމަށް ހާއްސަކޮށް ރޭމްޕް ވަނީ ގާއިމްކުރެވިފައެވެ.
ހުޅުމާލެގެ އެކި ސަރަހައްދުތަކުގައި ވީލްޗެއަރ ރޭމްޕް ހެދުމުގެ ސަބަބުން ނުކުޅުދުންތެރިކަން ހުންނަ ފަރާތްތަކަށް އެހެން މީހެއްގެ އެހީއާއި ނުލައި ބޭނުންވާ ކަންކަން އުނދަގުލެއްނެތި ކޮށްލެވޭނެ ކަމަށް އެޗްޑީސީން ބުންޏެވެ. އަދި މިކަމުގެ ސަބަބުން އެ ފަރާތްތަކަށްވެސް ލިބޭ ހިތްހަމަޖެހުން ވަރަށް ބޮޑުވާނެ ކަން އެ ކުންފުނިން ފާހަގަކުރެއެވެ.
ނުކުޅުންތެރިކަން ހުންނަ ފަރާތްތަކަށް އެ ފަރާތްތަކުގެ ހައްގު ކަށަވަރުކޮށް އަބުރުވެރި ދިރިއުޅުމެއް ހޯދައިދިނުމަކީ މުހިންމު ކަމެއްކަން ފާހަގަކޮށް އެޗްޑީސީން ބުނީ އެ ކުންފުނިން އަބަދުވެސް މަސައްކަތް ކުރަނީ އެފަދަ ފަރާތްތަކަށް ބޭނުންވާ ކަންކަން ފޯރުކޮށްދިނުމަށް ކަމަށެވެ. އަދި މިހާރު ހުޅުމާލޭގެ އެކި ސަރަހައްދުތަކާއި ހިޔާ ފުލެޓުގެ ބީޗުގައިވެސް ވީލްޗެއަރ ރޭމްޕް ޤާއިމު ކުރުމުގެ މަސައްކަތް ކުރަމުން އަންނަ ކަމަށް އެ ކުންފުނިން ބުނެފައިވެއެވެ.
