އަންނަ އަހަރުގެ ދެވަނަ ކުއާޓަރުގައި ޗައިނާ އިން ރާއްޖެ އަށް ދަތުރުތައް ފެށޭނެ ކަމުގެ އުންމީދު އެބަ އޮތް: ޑރ.މައުސޫމް
ކުރިއަށް އޮތް އަހަރަށް ރާއްޖޭގެ ފަތުރުވެރިކަމަށް އުންމީދީ އަހަރެއް
ޓުއަރިޒަމް މިނިސްޓަރު ޑރ.އަބްދުﷲ މައުސޫމް
އަންނަ އަހަރުގެ ދެ ވަނަ ކުއާޓަރުގައި ޗައިނާ އިން ރާއްޖެ އަށް ދަތުރުތައް ފެށޭނެ ކަމުގެ އުންމީދު އެބަ އޮތްކަމަށް ޓުއަރިޒަމް މިނިސްޓަރު ޑރ. އަބްދުﷲ މައުސޫމު ވިދާޅުވެއްޖެއެވެ.
ރާއްޖެ އަށް 1.6 މިލިއަން ވަނަ ފަތުރުވެރިޔާ އައުމާއި ގުޅިގެން ނޫސްވެރިންނަށް ދެއްވި ބަސްތީގަތުމެއްގައި މިނިސްޓަރު ވަނީ ކުރިއަށް އޮތް އަހަރަށް ރާއްޖޭގެ ފަތުރުވެރިކަމަށް އުންމީދީ އަހަރެއްގެ ގޮތުގައި ފާހަގަކުރައްވާފައެވެ. އެގޮތުން ކޮވިޑް-19އިގެ ބަލިމަޑުކަމަށް ފަހު ރާއްޖެ އަށް ޗައިނާ މާކެޓުން ފަތުރުވެރިންނަށް ނާދެވި އޮތް އޮތުން އަންނަ އަހަރު ނިމުމަކަށް އަންނާނެ ކަަމަށް ބެލެވޭ ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ މިހާރު މަޑުމަޑުން ޗައިނާގެ މާކެޓް ހުޅުވާލުމުގެ މަސައްކަތް ކުރަމުންދާ ކަމަށާއި، ޗައިނާގެ މާކެޓު ހުޅުވާލައިފި ނަމަ އެކަމުގެ ފައިދާ ރައްޖެ އަށް ކުރާނެ ކަމަށެވެ.
އެގޮތުން އަންނަ އަހަރު ޗައިނާގެ މާކެޓް ހުޅުވަލައިފި ނަމަ ރާއްޖެ އަށް ފަތުރުވެރިން އަންނާނެ ކަމަށް ލަފާކުރާ އަދަދަށް ވުރެ 10 ޕަސެންޓް އިތުރަށް ރާއްޖެ އަށް ފަތުުރުވެރިން އަންނާނެ ކަމަށް ބެލެވޭ ކަމަށް ޑރ.މައުސޫމް ވިދާޅުވިއެވެ. މީގެ އިތުރުން އަންނަ އަހަރުގެ ދެވަނަ ކުއާޓަރަށް ޗައިނާގެ ބައެއް އެއަރލައިންތަކުން ދަތުރުތައް ފަށަން އެދިފައިވާ ކަމަށް މިނިސްޓަރު ވިދާޅުވިއެވެ.
މީގެ އިތުރުން ރާއްޖޭގެ ފަތުރުވެރިކަމާއި ގުޅެގޮތުން އިތުރަށް ވާހަކަދައްކަވަމުން މިނިސްޓަރު ވިދާޅުވީ ރާއްޖެއަށް އަންނަ މަޝްހޫރު މީހުންގެ ޕްރައިވެސީ ރައްކާތެރިކޮށްދިނުމަށް އަބަދުވެސް ކަމާބެހޭ ފަރާތްތަކުން މަސައްކަތްކުރާކަމަށެވެ. އެހެންނަމަވެސް މަޝްހޫރު ބައެއް މީހުން ރާއްޖޭގައި ތިބޭއިރު މުޖުތަމައަށް ކަންކަން ކޮށްދޭން ބޭނުންވާކަަމަށާއި، އެގޮތުގެމަތީން ރާއްޖޭގައި އުޅޭކަން އެ މީހުން އަމިއްލައަށް އިއުލާންކުރާ ކަަމަށެވެ. އެގޮތަށް މަޝްހޫރު މީހުން ރާއްޖެ އިޝްތިހާރުކޮށްދިނުމަކީ ރާއްޖެއަށް އިތުރު އެތައް މިލިއަން ޑޮލަރުގެ އަގުހުރި ކަމެއްގެ ގޮތުގައި މައުސޫމް ވަނީ ފާހަގަކުރައްވާފައެވެ. ރާއްޖޭގެ މަންޒަރުތަކާއި ޕްރޮޑަކްޓްތައް ދުނިޔެއަށް ފޯރުކޮށްދިނުމުގައި އެފަދަ ފަރާތްތަކުން އަދާކުރަނީ ވަރަށް މުހިންމު ރޯލެއްކަަމަށް މިނިސްޓަރު ވިދާޅުވިއެވެ.
