މެދުކަނޑާލާފައި އޮތް 8 އެއަރލައިންގެ އޮޕަރޭޝަން ފަށައި، އާ 2 އެ އެއަރލައިނެއްގެ ޚިދުމަތް ފަށައިފި

ރާއްޖޭގައި މެދުކަނޑާލާފައި އޮތް 8 އެއަރލައިންގެ އޮޕަރޭޝަން ފަށައި، އާ 2 އެ އެއަރލައިނެއްގެ ޚިދުމަތް ފަށާފައިވާކަމަށް ވީއައިއޭ ހިންގާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ބުނެފިއެވެ.

ރާއްޖެއަށް 1.6 މިލިއަން ފަތުރުވެރިން އައުމުގެ މުނާސަބާ ފާހަގަކުރުމަށް ބޭއްވި ހަފްލާއަށްފަހު ނޫސްވެރިންނަށް މައުލޫމާތު ދެއްވަމުން އެމްއޭސީލްގެ ޖެނެރަލް މެނޭޖަރ ކޯޕަރޭޓް ކޮމިއުނިކޭޝަންސް، ހަސަން އަރީފް ވަނީ، އެމްއޭސީއެލްގެ އޮޕަރޭޝަންތަކުގެ ބައެއް ތަފްސީލްތައް ހިއްސާކުރައްވާފައެވެ.

އޭނާ ވަނީ މި ސީޒަނަށް އެމްއޭސީއެލްއިން ވަރަށް ބޮޑަށް ތައްޔާރުވެފައިވާކަން ފާހަގަކުރައްވާފައެވެ. އެގޮތުން ކޮވިޑް-19ގެ ބަލިމަޑުކަމާ ގުޅިގެން އޮޕަރޭޓްކުރުން ހުއްޓާލާފައި އޮތް 8 ފްލައިޓްގެ އޮޕަރޭޝަންގެ މަސައްކަތް މި ސީޒަނާ ދިމާކޮށް ފަށާފައިވާކަަމަށް ހަސަން ވިދާޅުވިއެވެ. އޭގެތެރޭގައި ބްރިޓިޝް އެއަރވޭސް، އޮސްޓްރިއަން އެއަރވޭސް، އެއަރ ފްރާންސް، ޔޫރޯ ވިންގްސް ފަދަ އެއަރލައިންތައް ހިމެނޭކަން އޭނަ ފާހަގަކުރެއްވިއެވެ. އެ އެއަރލައިންތަކުގެ ތެރެއިން ބްރިޓިޝް އެއަރވޭސްއަކީ ސީޒަނާ ދިމާކޮށް ދަތުރުކުރާ އެއާލައިންއަކަށް ވީނަމަވެސް، މިހާރު ބްރިޓިޝް އެއާވޭސްއިން ރާއްޖެއަށް ދާއިމީ ދަތުރުތައް ފަށާފައިވާ ކަމަށްވެސް ހަސަން ވިދާޅުވިއެވެ.

މީގެ އިތުރުން އާ ދެ އެއަރލައިނަކުން ރާއްޖެއަށް ޚިދުމަތް ދޭން ފަށާފައިވާކަމަށް އޭނާ ވިދާޅުވިއެވެ. އެއީ ވިޒްއެއަރއާއި ކުވެއިތު އެއަރވޭޒްކަމަށާއި، އެ ދެ އެއަރލައިންގެ މަސައްކަތް ފެށީ މިދިޔަ މަހުގެ ތެރޭގައިކަމަށް ހަސަން ވިދާޅުވިއެވެ.

1.6 މިލިއަން ފަތުރުވެރިން ރާއްޖެ ގެނައުމަށް ކަނޑައެޅި އަމާޒަށް ވާސިލްވުމަކީ ލިބުނު ވަރަށް ބޮޑު ކުރިއެރުމެއް ކަަމަށް އެމްއޭސީއެލްއިން ވަނީ ބުނެފައެވެ. ސަބަބަކީ ރާއްޖެއަށް އެންމެ ގިނައިން ފަތުރުވެރިން އަންނަ ޗައިނާ މާކެޓުން ފަތުރުވެރިން ނައުމާއި ރަޝިއާ-ޔުކްރެއިން ހަނގުރާމައިގެ ސަބަބުން ދިމާވި ގޮންޖެހުންތަކަށްފަހު އެ އަމާޒަށް ވާސިލްވެވުމުން ކަަމަށްވެސް އެމްއޭސީއެލްއިން ވަނީ ބުނެފައެވެ.