ސަލާމަތީ ކަންކަން ޗާންސަކަށް ދޫކޮށްލައިގެން ނުވާނެ، ބޭނުންވަނީ ރަނގަޅު ފްރޭމްވޯރކްތައް: ނިޔާޒީ

ސަލާމަތީ ކަންކަން ޗާންސަކަށް ދޫކޮށްލައިގެން ނުވާނެ ކަމަށާއި ސަލާމަތާއި ރައްކާތެރިކަން ކަށަވަރުކުރުމަށްޓަކާ ބޭނުންވަނީ ރަނގަޅު ފްރޭމްވޯރކްތަކެއް ކަމަށް އޮޑިޓަރ ޖެނެރަލް ޙުސައިން ނިޔާޒީ ވިދާޅުވެއްޖެއެވެ.

އޭނާ އެފަދައިން ވިދާޅުވީ މޯލްޑިވްސް ޕޯޓްސް ލިމިޓަޑް (އެމްޕީއެލް)ގެ އިސްނެގުމުގެ މަތިން ރާއްޖޭގެ ފުރަތަމަ އެންޓަޕްރައިޒް ރިސްކް މެނޭޖްމަންޓް ފޯރަމްގައި ވާހަކަދައްކަވަމުންނެވެ.

ކަނޑުމަތީގެ ދަތުރުތައް ކުރާތާ އެތައް ދުވަހެއް ވީ އިރު ވެސް ކަނޑުމަތީގެ ދަތުރުތަކުގެ ރައްކާތެރިކަން ކަށަވަރުކުރަން އެންމެ އެކަށީގެންވާ ގޮތުގައި އަދިވެސް މަސައްކަތް ނުކުރެވޭ ކަމަށް އޭނާ ވިދާޅުވިއެވެ. ނަމަވެސް އޭވިއޭޝަން ދާއިރާގެ ޚިދުމަތް ފެށީ އެއަށް ވުރެ މާ ފަހުން ކަަމަށާއި، އޭވިއޭޝަން ދާއިރާގެ ސޭފްޓީ މެޝާސް ނުވަތަ ސަލާމަތީ ކަންކަން އެހެން ދާއިރާތަކާއި އަޅާ ބަލާ އިރު ވަރަށް ބޮޑު ތަނުން ރަނގަޅު ކަމަށް އޭނާ ވިދާޅުވިއެވެ. އެކަން އެގޮތަށް ހިނގަނީ ކަންކަން ދޫކޮށްލާފައި ބޭއްވުމުގެ ބަދަލުގައި ހަރުދަނާ އިންތިޒާމްތަކުގެ ދަށުން އެކުލަވާލާ ރަނގަޅު ފްރޭމްވޯކްތަކުގެ އަލީގައި ވިލަރެސްކުރާތީ ކަމަށް ނިޔާޒީ ވިދާޅުވިއެވެ.

ވަކި ސްޓޭންޑަޑް ތަކެއް ކަނޑައެޅުމަށް ފަހު ސަލާމަތީ ކަންކަން ސްޓޭންޑާޑަށް ފެއްތުމަށް ޓްރެއިނިންގ ހަދަމުންދާ ކަން ނިޔާޒީ ވަނީ ފާހަގަކުރައްވާފައެވެ. ސަލާމަތީ ކަންކަން ރަނގަޅުވާނީ ވަރަށް ހަރުދަނާ އުސޫލުތަކެއް އެކުލަވާލައިގެން ކަމަށް ނިޔާޒީ ވިދާޅުވިއެވެ. އެހެންކަމުން އެމްޕީއެލް އިން އަޅާ ސަލާމަތީ ފިޔަވަޅުތަކާއި އެކު ވިޔަފާރިއަށް ވެސް ކުރިއެރުން ލިބޭނެ ކަމަށް އުންމީދުކުރައްވާ ކަމަށް އޭނާ ވަނީ ވިދާޅުވެފައެވެ.

ނިޔާޒީ ވަނީ ކޯޕަރޭޓް ދާއިރާގައި ވެސް ޕްރިންސިޕަލްތައް ނުވަތަ އުސޫލުތަކުގެ މަތީގައި ކަންކަން ކުރުމުގެ މުހިންމުކަމަށް އަލިއަޅުވާލައްވާފައެވެ. ހަރުދަނާ އުސޫލުތަކެއްގެ ތެރެއިން ކަންކަން ކުރުމަކީ މަކަރާއި ހީލަތް ނުވަަތަ ސްކޭމްތަކަށް ހުޅުވިފައި އޮންނަ ދޮރު ބަންދުވާ ކަމެއް ކަމަށް އޭނާ ވިދާޅުވިއެވެ. ވިޔަފާރި އަދި ކޯޕަރޭޓް މޮޑެލްތަކަށް ލިބޭ އެފަދަ ތަޖުރިބާތަކުގެ އެހީގައި ކަންކަން އިސްލާހުކުރަން އަބަދުވެސް މަސައްކަތްކުރަން ވާނެ ކަމަށް ނިޔާޒީ ވިދާޅުވިއެވެ. މީގެ އިތުރުން ރާއްޖޭގެ އިގްތިސާދު ހިމެނޭ ގޮތަށް ބަލާ އިރު ޕްރޮޖެކްޓްތަކުގެ ފީސިބިލިޓީ އާއި ޕްރޮޖެކްޓްތައް ކުރިއަށް ގެންދިއުމުގައި ވެސް އެކަންކަމުގައި އޮތް ރިސްކް ދުރާލާ ދެނެގަނެވިފައި އޮތުން ވަރަށް މުހިންމުކަން އޭނާ ވަނީ ފާހަގަކުރައްވާފައެވެ.