ހަމައެކަނި ރޯމެޓީރިއަލް ގޮތުގައި މަސް އެކްސްޕޯޓު ކޮށްގެން ފައިދާއެއް ނުވާނެކަމަށް މިފްކޯގެ ސީއީއޯ އިސްމާއީލް ފައުޒީ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން ފައުޒީ ވިދާޅުވީ، މިފްކޯއަކީ ފައިދާވާ ކުންފުންޏަކަށް ހެދޭނެ ކަމަށެވެ. އެގޮތުން ކުންފުނީގައި ވަރުގަދަ ޓީމެއް އެބައޮތް ކަމަށާއި، އެ ޓީމުން ކެނޑިނޭޅި އެކަމަށްޓަަކައި މަސައްކަތް ކުރަމުންދާކަމަށެވެ.
ފައުޒީ ވިދާޅުވީ، އެންމެ ބޮޑު ގޮންޖެހުމަކީ މާކެޓުގެ އަގުތަކާއި ގުޅިގެން ހުރި ގޮންޖެހުންތައް ކަމަށެވެ. ނަމަވެސް ސަރުކާރުން ދޭ އެއްބާރުލުމާއި، ރަނގަޅު އަގު ހޯދަން ކުރާ މަސައްކަތާއެކު، ކުރިއަށް އޮތް ތަނުގައި ނަތީޖާ ފެންނާނެކަމަށް އޭނާ ވިދާޅުވިއެވެ.
ރާއްޖޭގެ މަސް ރޯ މެޓީރިއަލް ގޮތުގައި އެކްސްޕޯޓު ކޮށްގެން އެކަނި ފައިދާއެއް ނުވާނެކަން ފާހަގަ ކުރައްވައި ފައުޒީ އިތުރަށް ވިދާޅުވީ، ރާއްޖޭގައި އެތަކެތި ޕްރޮސެސްކޮށްގެން އާމްދަނީ ހޯދުން އިތުރުކުރަން ޖެހޭ ކަމަށެވެ.
މި މަސައްކަތްތަކުގެ ތެރެއިން މިފްކޯއަކީ ބޮޑުތަނުން ފައިދާ ލިބޭ ކުންފުންޏަކަށް ހެދިދާނެކަމަށް ފައުޒީ ވިދާޅުވިއެވެ.
ޕްރޮގްރާމްގައި ވާހަކަ ދައްކަވަމުން ފައުޒީ ވަނީ މަސްވެރިންނަށް ދޭ ޚިދުމަތްތައް ފަސޭހަ ނިޒާމެއްގެ ތެރެއިން ފޯރުކޮށްދިނުމަށް ލޯންޗު ކޮށްފައިވާ "ހޯސާ" އެޕްލިކޭޝަން މެދުވެރިކޮށް ލިބިގެންދާނެ ލުއިފަސޭހަތަކަށްވެސް އަލިއަޅުވާލައްވާފައެވެ.
ބިލުތަކުގެ ތަފްސީލު، އަދި ރިޕޯޓު، އަދި އިތުރު މުއައްސަސާތަކަށް ބޭނުންވާ ރިޕޯޓުވެސް، މިސާލަކަށް މަސް ކިރުމާއި ގުޅޭ ތަފްސީލު އަދި އާމްދަނީއާއި ގުޅިގެން އިތުރު ކަންކަން މިސާލަކަށް ބޭންކަށް ލޯނަކަށް އެދޭ ކަމުގައިވާނަމަ، އެކަމާ ގުޅޭ ސްޓޭޓްމަންޓް އެޕްލިކޭޝަން މެދުވެރިކޮށް ލިބިވަޑައިގަންނަވާނެމިފްކޯގެ ސީއީއޯ އިސްމާއީލް ފައުޒީ
މި އެޕްލިކޭޝަންގެ ސަބަބުން މަސްވެެރިން އެމީހުން ބާނާ މަސް ކިރުމަށް ކިއު ނަންބަރެއް ނެގުމަށް މަޑުކުރަންޖެހޭ ވަގުތު މަދުވެ، އެޕްލިކޭޝަން މެދުވެރިކޮށް ކޮންމެ ތަނަކު ހުރެގެން ވެސް ކިއު ނަންބަރެއް ނެގޭނެއެވެ. އަދި މަސް ކިރާ ޕޮއިންޓުތައް ހޯދުމާއި ކިއު ނަންބަރު ބަލާލުމާއި، ފައިސާގެ މުއާމަލާތްތައް ވެސް އެޕްލިކޭޝަން މެދުވެރިކޮށް ފަސޭހަކަމާއެކު ކުރިއަށްގެންދެވޭނެއެވެ.
މިފްކޯއިން ބުނީ ސަރވިސް ބިލްތައް ވެސް މިހާރު އެޕްލިކޭޝަން މެދުވެރިކޮށް ފެންނަމުންދާނެ ކަމަށެވެ. ފައިސާ ލިބިފައި ހުންނަ ބިލްތައް ވެސް އެޕްލިކޭޝަނުން ފެންނާނެއެވެ. މީގެ އިތުރުން ދޯނީގެ ލައިސެންސާއި، ރެޖިސްޓްރޭޝަން ސެޓްފިކެޓް އަދި ހައިޖިން ސެޓްފިކެޓު ވެސް މަސްވެރިންނަށް ފަސޭހަކަމާއެކު މި އެޕަށް އަޕްލޯޑުކޮށްލެވެއެވެ.
މި އިންގިލާބީ ބަދަލާއެކު މަސްވެރިކަމުގެ މުޅި ސިނާއަތް ބަދަލުވެގެންދާނެ ކަމަށް މިފްކޯއިން ދެކެއެވެ. އަދި މި އެޕްގެ ސަބަބުން ސަރުކާރަށް ވެސް ޕޮލިސީލަތައް އެކުލަވާލުވުމުގައި ފަސޭހަވެގެންދާނެ ކަމަށް މިފްކޯއިން ބުނެއެވެ.
