އެމްޕީއެލްގެ ސޭފްޓީ ވީކް ފަށައިފި

މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސޭފްޓީ ވީކް 2022 ފަށައިފިއެވެ.

އެމްޕީއެލް އިން ބުނީ މިއީ މަސައްކަތުގެ މާހައުލުގެ ސަލާމަތާއި ރައްކާތެރިކަމަށް އަހުލުވެރިކުރުމުގެ ގޮތުން އެމްޕީއެލްއިން ސޭފްޓީ ވީކްއެއް ބާއްވާރާ 3 ވަނަ އަހަރެވެ. މީގެ ކުރިން 2019 އަދި 2021 ގައި ކާމިޔާބު ކަމާއެކު ސޭފްޓީ ވީކް ބާއްވާފައިވެއެވެ.

ހަފްތާއެއްގެ މުއްދަތަށް ކުރިއަސް ގެންދިއުމަށް ހަމަޖެހިފައިވާ ސޭފްޓީ ވީކްގައި މި އަހަރު ވެސް ގިނަ ހަރަކާތްތްތަކެއް ވަނީ ހިމަނާފައެވެ. މިއަހަރުގެ ސޭފްޓީ ވީކް ފެށުމުގެ ގޮތުން ހޯމަ ދުވަހު މާލޭ ވިޔަފާރި ބަނދަރުގައި ބެއްވި ރަސްމިއްޔާތުގައި ވާހަކަ ދައްކަވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ ޕޯޓުގެ އޮޕަރޭޝަންސްތަކުގައި ސަލަމަތާއި ރައްކާތެރިކަން ކަށަވަރުވާ މާހައުލެއް ގާއިމްކުރުމަކީ ކުންފުނީގެ އެންމެ ބޮޑު އެއް އަމާޒުކަމަށެވެ.

ޝާހިދު ވިދާޅުވީ ޕޯޓުގެ އޮޕަރޭޝަންސްތަކަކީ އޭގެ ޒާތުގައި ވެސް ނުރައްކާތެރި މަސައްކަތަކަށްވާއިރު، ސަލާމަތާއި، ރައްކާތެރިކަމަށް އަހުލުވެރިކުރުމަށް ހިންގޭ ސޭފްޓީ ވީކް އަކީ މުހިންމު ޕްރޮގްރާމެއް ކަަމަށެވެ.

މި ރަސްމިއްޔާތުގައި ކުންފުނީގެ ހެލްތް އެންޑް ސޭފްޓީ ސްޓެންޑަރޑް ތަންފީޒުކުރުމުގެ ގޮތުން، "ހެލްތް ސޭފްޓީ އެންޑް އެންވަޔަރމަންޓް ޕޮލިސީ ސްޓޭޓްމަންޓް" ވަނީ އިފްތިތާހުކޮށްފައެވެ. މި ޕޮލިސީ ސްޓޭޓްމަންޓަކީ ސިނާއަތުގެ އެންމެ ރަނގަޅު އުސޫލުތައް ތަންފީޒުކޮށް، ރާއްކާތެރިކަމުގެ އެންމެ މަތީ މިންގަނޑުތަކަށް ތަބާވެ، ކުންފުނީގެ ހުރިހާ ހަރަކާތްތަކާއި އޮޕަރޭޝަންސްތައް ރައްކާތެރިކަމާއެކު ކުރިއަށްދާކަން ކަށަވަރުކުރުމެވެ.

މީގެ އިތުރުން، ޕޯޓުގައި މަސައްކަތްކުރާ މަޖުރީ ގްރޫއްޕުތަކުގެ ފަރާތަކުން ލިބޭ އެއްބާރުލުމާއި އެ ފަރާތްތަކަށް ހިތްވަރު ދިނުމުގެ ގޮތުން އެމްޕީއެލްގެ ފަރާތުން ހެލްމެޓްތަކެއް ވަނީ ހަދިޔާކޮށްފައެވެ.

އަދި އެމްޕީއެލްގެ ސޭފްޓީ ޑިޕާޓްމަންޓަށް ގިނަ ދުވަހު މަސައްކަތްކޮށްފައިވާ މުވައްޒަފުންނާއި، މާލޭ ވިޔަފާރި ބަނދަރުގައި ހިނގާފައިވާ އެކި ހާދިސާތަކުގއި މީހުންގެ ފުރާނައާއި މުދާ ސަލާމަތްކުރުމުގައި ހަރަކާތްތެރިވި މުވައްޒަފުންނާއި އެމްޕީއެލް އާއެކު މަސައްކަތް ކުރާ އެހެން މުއައްސަސާތަކުގެ އަގުވަޒަންކޮށް، ހަނދާނީ ފިލާ ވަނީ އެފަރާތްތަކަށް ދީފައެވެ.

މި ރަސްމިއްޔާތުގައި މާލޭ ވިޔަފާރި ބަނދަރުގައި މީގެ ކުރިން ހިނގާފައިވާ ނުރައްކާތެރި ހާދިސާތަކުގައި ފުރާނަ ގެއްލުނު ފަރާތްތަކުގެ ހަނދާންތައް އާކުރުމުގެ ގޮތުން ސްކޫތެއް ވަނީ ގެނެސްފައެވެ.