ޓާގެޓް ހާސިލުވާން ދެން ބޭނުންވަނީ 33،000 ފަތުރުވެރިން
ފަތުރުވެރިން އިތުރުވުމުގައި އެންމެ ބޮޑު ހިއްސާއެއް އޮތީ ޕްރައިވެޓް ސެކްޓަރުން ކުރަމުން އަންނަ ބުރަ މަސައްކަތުގެ
އަމާޒަށް ވާސިލުވާން ދެން ބޭނުންވަނީ 33،000 ފަތުރުވެރިން
މިއަހަރު ނިމުމުގެ ކުރިން 1.6 މިލިއަން ފަތުރުވެރިން ގެނައުމަށް ސަރުކާރުން ކަނޑައަޅާފައިވާ އަމާޒަށް ވާސިލުވާން ދެން ބޭނުންވަނީ 33،000 ފަތުރުވެރިން ކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީން އާންމުކޮށްފައިވާ ރާއްޖޭގެ ފަތުރުވެރިކަމުގެ ތަފާސްހިސާބުތައް ދައްކާގޮތުން, ނޮވެމްބަރުމަހުގެ ނިޔަލަށް މިއަހަރު ރާއްޖެ އައި ފަތުރުވެރިންގެ އަދަދު ވަނީ 1,566,083 (އެއް މިލިއަން ފަސްލައްކަ ފަސްދޮޅަސް ހަ ހާސް އައްޑިހަ ތިނަކަށް) އަރާފައެވެ. އެހެންކަމުން 1.6 މިލިއަން ފަތުރުވެރިންގެ އަމާޒަށް ވާސިލުވުމަށް ދެން ބޭނުންވަނީ 33،917 ފަތުރުވެރިންނެވެ.
މިއީ އެންމެ ގޯސް ހާލަތުގައި މިއަހަރު ރާއްޖެ ޒިޔާރަތްކުރާނެކަމަށް ބަޖެޓުގައި އަންދާޒާކޮށްފައިވާ 1،520،060 ފަތުރުވެރިންނަށްވުރެ އިތުރު އަދަދެކެވެ.
ޓޫރިޒަމް މިނިސްޓްރީން ބުނީ ނޮވެމްބަރު މަސް ނިމުނުއިރު (146،879) އެއްލައްކަ ސާޅީސް ހަހާސް އަަށްސަތޭކަ ހަތްދިހަ ނުވަ ފަތުރުވެރިން އައިސްފައިވާކަމަށެވެ. ނޮވެމްބަރު މަހު ދުވާލަކު 4،896 ފަތުރުވެރިން އައިސްފައިވާކަމަށް ޓޫރިޒަމް މިނިސްޓްރީން ބުނެފައިވެއެވެ. އަދި 7 ދުވަހު ރާއްޖޭގައި މަޑުކޮށްފައިވާކަމަށް މިނިސްޓްރީން ބުނެފައިވެއެވެ.
ޓޫރިޒަމް މިނިސްޓްރީން ބުނީ މިއަހަރުގެ މިހާތަނަށް ފަތުރުވެރިން އައި މިންވަރު 2021 ވަނަ އަހަރާ އަޅައިބަލާއިރު 28.8 އިންސައްތަ އިތުރު ކަމަށެވެ. އެހެންނަމަވެސް 2019 ވަނަ އަހަރާ އަޅައިބަލާއިރު މިއީ 2.6 އިންސައްތަ ދަށް އަދަދެއްކަމަށް މިނިސްޓްރީން ބުނެފައިވެއެވެ.
އަދިވެސް އެންމެ ގިނަ ފަތުރުވެރިން އަންނަމުންދަނީ އިންޑިއާ މާކެޓުން ކަމަށް ޓޫރިޒަމް މިނިސްޓްރީން ހާމަކުރެއެވެ. މިގޮތުން އަހަރުގެ މިހާތަނަށް އެ މާކެޓުން ދެލައްކައަށްވުރެ ގިނަ ފަތުރުވެރިން އައިސްފައިވެއެވެ.
ދެވަނައަށް އެންމެ ގިނަ ފަތުރުވެރިން އަންނަނީ ރަޝިއާ މާކެޓުންނެވެ. އެ މާކެޓުން މިހާތަނަށް އެއްލައްކައަށްވުރެ ގިނަ ފަތުރުވެރިން ވަނީ އައިސްފައެވެ.
އަދި ތިންވަނާގައި އިނގިރޭސިވިލާތް ހިމެނޭއިރު، މިހާތަނަށް އެ މާކެޓުންވެސް އެއްލައްކައަށްވުރެ ގިނަ ފަތުރުވެރިން އައިސްފައިވެއެވެ.
މި މާކެޓުތަކުގެ އިތުރުން އެންމެ ގިނަ ފަތުރުވެރިން އަންނަ މާކެޓުތަކުގެ ތެރޭގައި ހިމެނެނީ; ޖަރުމަނު، އިޓަލީ، އެމެރިކާ، ފްރާންސް، ސްޕެއިން، ސައުތު ކޮރެއާ އަދި ސްވިޒަރލޭންޑެވެ.
ރާއްޖެ އަންނަ ފަތުރުވެރިން އިތުރުވުމުގައި އެންމެ ބޮޑު ހިއްސާއެއް އޮތީ ޕްރައިވެޓް ސެކްޓަރުން ކުރަމުން އަންނަ ބުރަ މަސައްކަތުގެ ކަމަށް މިނިސްޓްރީން ބުނެއެވެ. އެގޮތުން މިނިސްޓްރީން ބުނީ، ފަތުރުވެރިކަމަށް ދިމާވި ގިނަ ގޮންޖެހުންތަކާއެކުވެސް ޕްރައިވެޓް ސެކްޓަރުގެ ބުރަ މަސައްކަތުން، ކަނޑައަޅާފައިވާ އަމާޒުތަކަށް ވާސިލުވާކަމަށެވެ.
