ތިން ވަނަ ހޮވާ މެޗަށް މޮރޮކޯ ނުކުންނައިރު، ބޯޅަ ހަދާ ކަމާލްގެ ފަޚްރު ބަދަލުވުމެއް ނެތް

ފުޓުބޯޅައިގެ މައިދާނުގައި މުޅި ދުނިޔެ ހައިރާންކޮށްލި މޮރޮކޯގެ އިޤްތިޞާދީ ހަބްގެ ގޮތުގައި ސިފަ ކުރަމުން އަންނަ މަރާކިޝްގައި ލެދަރު މަސައްކަތް ކުރާ އަވަށެއްގައި ހިންގަމުން ދިޔަ ފިހާރައެއްގެ ތެރޭގައި، ލެދަރުން ފުޓުބޯޅަ ފެހުމުގައި އަވަދިނެތި އުޅެމުން ދިޔަ ކަމާލް ބޫކިންތާރު، އެ މަސައްކަތުގައި އުޅޭތާ މިހާރު އެތައް ޒަމާނެއް ވެއްޖެއެވެ. އެއީ އާއިލީ ވިޔަފާރިއެކެވެ.

ޢުމުރުން 50 އަހަރުގެ ކަމާލް ކިޔައިދިން ގޮތުގައި ލެދަރުން ބޯޅަ ހެދުމުގެ ފަންނުވެރިކަން އޭނާ ދަސްކުރީ، އޭނާގެ މައިންބަފައިންގެ ގާތުންނެވެ. ކަމާލްގެ މައިންބަފައިން، ބޯޅަ ހެދުމުގެ މަސައްކަތް، ވިޔަފާރިއެއްގެ ގޮތުގައި ފެށީ 1965 ވަނަ އަހަރުއެވެ.

ކަމާލް ބުނާ ގޮތުގައި، ލެދަރުން ފުޓުބޯޅަ ހެދުމުގެ ފަންނުވެރިކަމަކީ ވިލާތާއި ލެޓިން އެމެރިކާ ސަރަޙައްދުން އުފެދިގެން އައި ފަންނުވެރިކަމެކެވެ.

ކަމާލް ޤާބޫލު ކުރާ ގޮތުގައި އޭނާގެ ޢާއިލީ ވިޔަފާރިއަކީ، ޢަރަބި ދުނިޔޭގެ އިތުރުން މުޅި އިސްލާމީ ދުނިޔޭގައިވެސް ލެދަރުން ފުޓުބޯޅަ ފެހުމުގެ މަސައްކަތް މިހާރު ކުރިއަށް ގެންދާ ހަމަ އެކަނި ވިޔަފާރިއެވެ. އެމީހުންނަކީ، މި މަސައްކަތުގެ ތަޖުރިބާކާރުން ކަމަށް ކަމާލް ބުނަނީ ފަޚްރް ވެރިކަމާއެކުގައެވެ.

ފަރަންސޭސި ފުޓުބޯޅަ ކުޅުންތެރިޔާ ޑިޑިއޭ ސިކްސްއާއެކު ނަގާފައިވާ ފޮޓޯއެއްގެ ކައިރީގައި އިށީނދެލައިގެން އިނދެ، ބޯޅަ ފެހުމުގެ މަސައްކަތް ކުރަމުން ދިޔަ ކަމާލް ކިޔައިދިން ގޮތުގައި، ލެދަރުން ބޯޅަ ފެހުމުގައި އޭނާ ބޭނުން ކުރަމުން ދަނީ 1920 ވަނަ އަހަރު އާޖެންޓީނާއިން ތައްޔާރު ކުރި ފަރުމާއެވެ. އެ ފަރުމާގެ ބޯޅަތައް، 1928 ވަނަ އަހަރުގެ ސަމަރ އޮލިމްޕިކްސްގެ އިތުރުން 1930ގައި ކުޅެވުނު ފުރަތަމަ ވޯލްޑްކަޕް މެޗުތަކުގައިވެސް ބޭނުން ކުރިއެވެ.

މަޝްހޫރު އެކި ފަރުމާތައް ނަކަލު ކޮށްގެން ބޯޅަ ފެހުމުގެ އިތުރުން، އޭނާގެ އަމިއްލަ ފަރުމާތަކަށްވެސް ކަމާލް ބޯޅަ ފަހައެވެ. ބޯޅަ އުފައްދާ، ފަހާ، އޭގެ މެއިންޓަނަންސް މަސައްކަތްކޮށް މުޅިން ނިންމާލުމަށް 2 ދުވަހާއި 2 ހަފުތާއާ ދެމެދު މުއްދަތެއް، ކަމާލް ހޭދަ ކުރެއެވެ.

ޤަޠަރުގައި މިހާރު ކުރިއަށްދާ ވޯލްޑްކަޕްއާއި މޮރޮކޯގެ ޤައުމީ ޓީމާ ބެހޭ ގޮތުން ވާހަކަ ދައްކަމުން ކަމާލް ބުނީ، އެމީހުންގެ އަތުގައި މި ފަހަރު މާ ބޮޑު ނަޞީބެއް ނުހިފާ ކަމަށެވެ.

މި ފަހަރުގެ ވޯލްޑްކަޕްގައި އެންމެ ގިނަ ބަޔަކު ޝޯޚް ކުރިވި ކުޅުމެއް ދެއްކި އެއް ޓީމަކީ މޮރޮކޯގެ ޓީމް ކަމާ މެދު ދެބަސްވެވޭކަށް ނެތެވެ. ގުރޫޕު ސްޓޭޖުގައި ބެލްޖިއަމްއާއި ކެނެޑާ ބަލިކޮށް، ގަދަ 16ގެ މެޗުގެ ޕެނަލްޓީގައި 2010 ވަނަ އަހަރުގެ ދުނިޔޭގެ ޗެމްޕިއަމް ސްޕެއިން ބަލި ކުރިއެވެ. އަދި ކުއާޓަރ ފައިނަލުގައި، 2016 ވަނަ އަހަރުގެ ވިލާތުގެ ޗެމްޕިއަނުން ކަމަށް ވާ ޕޯޗުގަލްވެސް ބަލި ކުރިއެވެ.

ވޯލްޑްކަޕްގެ ތަށި އުފުލާލުމަށް މޮރޮކޯގެ ޓީމުން ދެކެމުން ދިޔަ ހުވަފެނުން ހޭލަން ޖެހުނީ، ފަރަންސޭސިވިލާތާ ދެކޮޅަށް ނުކުމެ، ކުރި ލިބޭ ގޮތް ނުވެގެންނެވެ. ނަމަވެސް މޮރޮކޯއަކީ އެފްރިކާ އަދި ޢަރަބި ޤައުމުތަކުގެ ތެރެއިން، ވޯލްޑްކަޕްގެ ސެމީ ފައިނަލަށް ދަތުރު ކުރި ހަމަ އެކަނި ޤައުމުކަން ފާހަގަ ކުރަން ޖެހެއެވެ.

ފީފާ ވޯލްޑްކަޕް 2022ގެ 3 ވަނަ ހޮވާ މެޗަށް، ކްރޮއޭޝިއާއާ ދެކޮޅަށް މޮރޮކޯއިން ނުކުންނާނީ ޑިސެމްބަރު 17 ވާ ހޮނިހިރު ދުވަހުގެ ރެއެވެ.