"މިނީ ބްރެޒީލް"ގެ ލޯބި އާޖެންޓީނާއަށް ބަދަލުކޮށް، މެސީއަށް 1 ނަމްބަރުކަން!

ދެކުނު އޭޝިއާ ސަރަޙައްދުގައި ވޯލްޑްކަޕްގެ ފޯރި އެންމެ ގަދަ އެއް މަންޒިލަކީ ޕާކިސްތާނުގެ "މިނީ ބްރެޒީލް" ކަމާ މެދު ދެބަސްވެވޭކަށް ނެތެވެ. ވޯލްޑްކަޕްގެ މެޗުތައް ޤަޠަރުގައި ފެށި ހިސާބުން އަދާ ޖެހުނުއިރުވެސް ޕާކިސްތާނުގެ "މިނީ ބްރެޒީލް"އިން ފުޓުބޯޅައިގެ ފޯރި ފަނޑުވި، ހަމަ އެންމެ ވަގުތެއްވެސް އަދި ނާދެއޭ ދެންނެވިދާނެއެވެ. ނަމަވެސް ވޯލްޑްކަޕްގެ ތަށި މި ފަހަރު ބްރެޒީލްއަށް ނުލިބޭނެކަން ކަށަވަރުވި ހިސާބުން، ޒާތެއްގެ މަޑުމޮޅިކަމެއް ލިޔާރީއޭ ކިއާ ޕާކިސްތާނުގެ "މިނީ ބްރެޒީލް"އަށް ވަނީ ވެރިވެފައެވެ.

ބްރެޒީލްގެ ޓީމަށް ތާޢިދުކޮށް، ދުނިޔޭގެ އެކި ކަންކޮޅުތަކަށް ވައިރަލްވި ލަވަ އުފެއްދި 9 މެންބަރުންގެ ރެޕް ގުރޫޕު ނުވަތަ ރިއަލް މިއުޒިކް ޕަވާ (އާރްއެމްޕީ) ބޯއީޒްގެ ރޫޙުވެސް މަރުވެފައި ވާ ފާދައެވެ. ބޭންޑުގެ މެންބަރުންގެ ކިބައިން ފެންނަމުން ދަނީ ހިތްދަތިކަމުގެ އަސަރުތަކެވެ. ބޭންޑްގެ ލީޑް ސިންގަރ، މުޙައްމަދު ޔާސީޏް އަލްޔާން ސިފަ ކުރާ ގޮތުގައި މުޅި ސަރަޙައްދުންވެސް އުފާވެރިކަން ގެއްލިފައި ވާ ފަދައެވެ.

ބްރެޒީލްގެ ޤައުމީ ޓީމަށް އޮތް ހާއްސަ ލޯބި ބަޔާން ކޮށްދިނުމުގެ ގޮތުން އާރްއެމްޕީ ބޯއީޒްއިން ވަނީ "ފީފާ ވޯލްޑްކަޕް ސޯންގް 2022"ގެ ނަމުގައި ހާއްސަ ލަވައެއް ރިލީޒް ކޮށްފައެވެ. އެ ލަވައަކީ ގިނަ ބައެއްގެ މެދުގައި "ވައިރަލް ވި ހިޓް" ލަވައެކެވެ. އެންމެ 2 ހަފުތާއެއްހާ ދުވަހުގެ ތެރޭގައި އެކަނިވެސް 70000 އަށް ވުރެ ގިނަ ޔޫޓިއުބް ވިއުޒް ލިބުނެވެ.

އާރްއެމްޕީ ބޯއީޒްގެ އުއްމީދަކީ ބްރެޒީލްއާ ހަމައަށް އެ ލަވައިގެ ފޯރި ފޯރުމެވެ.

ވޯލްޑްކަޕްގެ ތައްޓާ ހިސާބަށް ދެވޭ ގޮތް ނުވެ، ޑިސެމްބަރު 9 ވަނަ ދުވަހު ބްރެޒީލްއިން މުބާރާތަށް ވަދާޢީ ސަލާމް ކުރިއެއް ކަމަށް ލިޔާރީގެ މަގުތަކުން އަދިވެސް ފެންނަނީ ބްރެޒީލްގެ ކުލަތަކެވެ. ނަމަވެސް ސަޕޯޓަރުންގެ ތާޢީދު މިހާރު އޮތީ އާޖެންޓީނާގެ ޤައުމީ ޓީމަށެވެ.

އާބާދީ ބައިބޯވެފައިވާ ލިޔާރީއަކީ ޕާކިސްތާނުގެ ފުޓުބޯޅައިގެ މަރުކަޒީ އިދާރާއެވެ. ފުޓުބޯޅައިގެ މައިދާނުގައި ޕާކިސްތާނު ދުށް ގިނަ ކުޅުންތެރިންތަކެއްގެ އުފަން ވަޒަނެވެ. އޭގެ ތެރޭގައި، މިދިޔަ އޮކްޓޯބަރު މަހު މި ދުނިޔެ ދޫކުރި، ޕާކިސްތާނުގެ ޤައުމީ ޓީމުގެ ކުރީގެ ކެޕްޓަން، ޢަލީ ނަވާޒް ބަލޫޗްގެ ނަން ފާހަގަ ކުރަން ޖެހެއެވެ.

ލިޔާރީއަކީ ޕާކިސްތާނުގައި ކުޑަކޮށް ތަރައްޤީ ވެފައިވާ ސަރަޙައްދުތަކުގެ ތެރޭގައި ހިމެނޭ ފަޤީރު އަވަށެކެވެ. ހަމަނުޖެހުންތަކާއި ކުރިމަތިލުންތަކާއި، ޑްރަގް ޓްރެފިކް ކުރުން ފަދަ އެތައް ވަބާއެއްގައި ބެދިފައި އޮންނަތާ އެތައް އަހަރެއްވީ އަވަށެކެވެ. އިންތިހާ ފަޤީރު ކަމާއެކު ޢުއްމީދުގެ ހުޅުކޮޅު މުޅިންހެން ނިވިފައި އޮތް އަވަށެކެވެ. ނަމަވެސް، ގޭންގެ މާރާމާރީ ހުއްޓުވުމަށް، ސިންދް ސަރުކާރުން 2013 ވަނަ އަހަރު ހާއްސަ ފައުޖުތަކެއް ފޮނުވި ފަހުން ހިސާބެއްގެ ހަމަޖެހުމެއް ވަނީ ގެނުވާފައެވެ.

ފުޓުބޯޅައާއި ބޮކްސިންގްގެ އިތުރުން ހިޕްހޮޕް މިއުޒިކްގެ ފޯރި، ލިޔާރީގައި ގަދަވާން ފެށީ އެހާ ހިސާބުންނެވެ.