އާޖެންޓީނާގެ ސަޕޯޓަރު މާރިއާއަށް ޤަޠަރުގެ މިސްކިތަކުން ކުރެވުނު ތަޖުރިބާ!

ކަތާރާ މިސްކިތުގެ މުއައްޒިން ބަންގި ގޮވަމުން ދިޔައިރު، އޭނާގެ ފަހަތުގައި އިށީނދެލައިގެން އިން އާޖެންޓީނާގެ ސަޕޯޓަރު، މާރިއާ ރޮޑިރިގޭޒް، އެ މަންޒަރުތައް ވީޑިއޯ ކުރަމުން ދިޔައީ އިންތިހާ ޝަޢުޤުވެރިކަމާ އެކީގައެވެ.

މާރިއާ ބުނި ގޮތުގައި އޭނާއަކީ މެދުއިރުމަތީގެ ދީނީ ކަންކަމަށް އަބަދުވެސް ޝަޢުޤު ހުންނަ މީހެއް ކަމަށާ، ވޯލްޑްކަޕް މެޗުތައް ބަލާލުމަށް އާޖެންޓީނާއިން ޤަޠަރަށް ދަތުރު ކުރުމަށް ފަހު، ކަތާރާ މިސްކިތަށް ޒިޔާރަތް ކުރަން ބޭނުން ވި ކަމަށެވެ.

ދުނިޔޭގެ ތައްޓަށް ކުޅޭ އެންމެ ފޯރިގަދަ ފުޓުބޯޅަ މުބާރާތުގެ މެޗުތައް ބަލާލުމަށް ދުނިޔޭގެ އެކި ކަންކޮޅުތަކުން ޤަޠަރަށް ޒިޔާރަތް ކުރާ މެހެމާނުންގެ މެދުގައި އެންމެ މަޤުބޫލު މަންޒިލްތަކުގެ ތެރޭގައި ޤަޠަރުގެ ހިތްގައިމު މިސްކިތައް ހިމެނެއެވެ. އޭގެ ތެރޭގައި ކަތާރާ މިސްކިތްވެސް ހިމެނެއެވެ. މިސްކިތްތަކަށް ޒިޔާރަތް ކުރާ މެހެމާނުންގެ ބޭނުމަކަށް ވަނީ މިސްކިތްތަކުގެ ފަރުމާތައް ބަލާލުމުގެ އިތުރުން، އިސްލާމް ދީނުގެ ކަންކަން އުނގެނުމެވެ.

ޢަރަބި ގަލްފްގެ އިސްލާމީ ޤައުމެއްގައި ފުރަތަމަ ފަހަރަށް ވޯލްޑްކަޕް މުބާރާތެއް ހޮސްޓް ކުރުމުގެ ރެކޯޑް ޤަޠަރުން ހޯދި އިރު، އިސްލާމި ޝިޢާރު ފާޅުކޮށް، ފެތުރުމުގައިވެސް ޤަޠަރުން ދައްކަމުން ދަނީ ލާމަސީލު މިސާލެކެވެ.

ހުޅަނގުގެ ލާ ދީނީ ފިކުރުތަކަށް ދީލާލާފައި ނުވާ އިރު، ޤަޠަރުން ފަތުރަމުން ދިޔައީ އިސްލާމީ ދަޢުވަތެވެ.

މިސްކިތްތަކުގައި މުއައްޒިނުން ބަންގި ގޮވާ މަންޒަރު ބަލާލުމުގެ ފުރުޞަތު ދިނުމުގެ އިތުރުން، ނަމާދު ކުރާނެ ގޮތް ކިޔައި ދިނުމަށް ހާއްސަ ވޮލަންޓިއަރުންވެސް ޤަޠަރުގެ އެކި ހިސާބުތަކުގައި ހަރަކާތްތެރިވެއެވެ.