މޮރޮކޯ މެޗަށް ނުކުންނައިރު ޑެޝޯމްޕްސްގެ އިތުބާރު ގްރީޒްމަނަށް

ފްރާންސްގެ އެޓޭކިން މިޑްފީލްޑަރު އެންޓޮއިން ގްރީޒްމަން ދައްކަމުން އަންނަ މޮޅު ކުޅުމާއެކު، އޭނާ އަށް ފުރިހަމަ އަށް އިތުބާރު އޮތް ކަމަށް އެ ޓީމުގެ ކޯޗު ޑިޑިއޭ ޑެޝޯމްޕްސް ބުނެފިއެވެ.

ޑެޝޯމްޕްސް މިހެން ބުނީ ފީފާ ވޯލްޑް ކަޕްގެ ސެމީ ފައިނަލްގައި މޮރޮކޯއާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. ގްރީޒްމަންގެ ވާހަކަ ޑެޝޯމްޕްސް ދެއްކިއިރު އޭނާ އަންނަނީ މި މުބާރާތުގައި ފްރާންސް ޓީމުގައި މޮޅު ކުޅުމެއް ދައްކަމުންނެވެ.

ޑެޝޯމްޕްސް ބުނީ އެ މެޗަށް ނުކުންނައިރު ގްރީޒްމަން ހުރި ހާލަތާމެދު ވަރަށް ބޮޑަށް ހިތްހަމަޖެހޭ ކަމަށެވެ. އަދި ކުރިއަށް އޮތީ ގްރީޒްމަން އަދި މާމޮޅުކޮށް ފެންނަން ޖެހޭ މެޗެއް ކަމަށެވެ. ޑެޝޯމްޕްސް ބުނީ ގްރީޒްމަން އަކީ އޭނާ ދައްކާ ކުޅުމުގެ ސަބަބުން މުޅި ޓީމުގެ މޫނު މަތި ބަދަލުކޮށްލެވޭނެ ވަރުގެ ކުޅުންތެރިޔެއް ކަމަށެވެ. އެގޮތަށް އެކަން ވަނީ ގްރީޒްމަން ޤައުމީ ޓީމުގައި ގިނަ މެޗުތަކެއް ކުޅެ، މޮޅު ކުޅުމެއް ދައްކާތީ ކަމަށް ވެސް އޭނާ ބުންޏެވެ. ޑެޝޯމްޕްސް ބުނީ ގްރީޒްމަން އަކީ ޕާސް ދިނުމުގެ އިތުރުން، ޑިފެންޑު ކުރުމުގައި މޮޅު ކުޅުންތެރިޔެއް ކަމަށެވެ.

މޮރޮކޯ ޓީމާ ގުޅޭ ގޮތުން ވާހަކަ ދައްކަމުން ޑެޝޯމްޕްސް ބުނީ އެ ޓީމަކީ ސަޕޯޓަރުން ގިނަ ޓީމެއް ކަމަށެވެ. އަދި މެޗު ވަރަށް އަޑު ގަދަވާނެ ކަމަށާއި، މުޅިންހެން ތިބޭނީ މޮރޮކޯގެ ސަޕޯޓަރުން ކަމަށެވެ. އަދި ކުޅުންތެރިންނަށް ވެސް އެކަން އެތައް ފަހަަރަކު ހަނދާންކޮށްދީ، "އިންޒާރު" ދީފައިވާނެ ކަމަށެވެ. ޑެޝޯމްޕްސް ބުނީ އޭނާގެ ކުޅުންތެރިންނާއި މުޅި ޓީމު މެޗަށް ތައްޔާރުވާން ޖެހޭނީ ކުޅުމުގެ އިތުރުން މާހައުލަށް ވެސް ހޭނެން ކަމަށެވެ. އެކަމަށް ވަރަށް ބޮޑު ސަމާލުކަމެއް ދޭން ޖެހޭނެ ކަމަށް ޑެޝޯމްޕްސް ބުންޏެވެ.

އިތުރަށް ވާހަކަ ދައްކަމުން ޑެޝޯމްޕްސް ބުނީ އަބަދުވެސް ފްރާންސް އިން ކުޅެނީ ބޯޅަ ގެންގުޅެ، އިދިކޮޅު ޓީމަށް ނުރައްކާކޮށް، ލަނޑު ޖަހަން ކަމަށެވެ. އަދި އެކަން ބިނާވެގެން ވަނީ އެ މެޗެއްގައި ދައްކާ ކުޅުމެއްގެ މައްޗަށް ކަމަށެވެ. ޑެޝޯމްޕްސް ބުނީ ޕޮލެންޑާ ދެކޮޅަށް ކުޅުނު މެޗުގައި އެ މީހުންގެ ޕޮޒިޝަން އެހެން މެޗުތަކަށްވުރެ ރަނގަޅު ކަމަށާއި، އެ ތަފާތު ފެންނާނެ ކަމަށެވެ. އަދި ފްރާންްސް ޓީމު ވަރުގަދަވާ ބީދައިން މޮރޮކޯ ޓީމަކީ ވެސް ވަރުގަދަ ޓީމެއް ކަމަށެވެ. އެގޮތުން މޮރޮކޯ އިން ކައުންޓަ އެޓޭކުގައި ވަރަށް ނުރައްކާ ކުރާނެ ކަމަށް އޭނާ ބުންޏެވެ.

އޭނާ ބުނީ މޮރޮކޯ އިން ގޮތް ދޫކޮށް، ހިތްވަރު އެލުވާނުލާނެ ކަން ވެސް އެނގޭ ކަމަށެވެ. އެގޮތުން ކޮންމެ ބައެއް ވެސް ގެންގުޅޭނީ އެބައެއްގެ އަމިއްލަ ގޭމް ޕްލޭނެއް ކަމަށާއި، އެއަށް ބަދަލުތަކެއް ވެސް އަތުވެދާނެ ކަމަށެވެ. ނަމަވެސް އޭނާ ބުނީ ފްރާންސް އިން މެޗު ފަށާނީ ބޯޅަ ގެންގުޅެ، ނުރައްކާ ކުރަން ކަމަށާއި، ހަމައެކަނި ނަމަކަށް ބޯޅަ ގެންގުޅެން ނޫން ކަމަށެވެ.

ފްރާންސް އަދި މޮރޮކޯ ވާދަކުރާ މެޗު ފަށާނީ ބުދަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.