ރާއްޖޭއަށް އެންމެ ބޮޑަށް ބޭނުންވަނީ އަދުލުވެރި ފަނޑިޔާރު ގެއެއް: ހަސަން އަފީފު
ދިމާވާ ގިނަ މައްސަލަތައް ދިމާވަނީ މިނިވަން ޖުޑިޝަރީ ނިޒާމެއް ނެތުމުން- އަފީފު
ކުރީގެ ހޯމް މިނިސްޓަރ ހަސަން އަފީފު
ރާއްޖޭގައި މިއަދު ދިމާވާ ހުރިހާ މައްސަލައެއް ދިމާވަނީ، އަދުވެލި ފަނޑިޔާރު ގެއެއް ނެތުމުން ކަމަށް ކުރީގެ ހޯމް މިނިސްޓަރ ހަސަން އަފީފު ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން، ހޯމަދުވަހުގެ ރޭ، ހަސަން އަފީފު ވިދާޅުވީ، ފުރިހަމަ ޑިމޮކްރެޓިކް ނިޒާމެއް ގާއިމް ކުރުމުގައި މިނިވަން އިންސާފުވެރިކަމާ އެކު ކަންކަން ނިންމާނެ ފަނޑިޔާރުން ބޭނުންވާ ކަމަށެވެ. އަދި މިއަދު ރާއްޖެއަށް ދިމާވާ ގިނަ މައްސަލަތަކެއް ދިމާވުމަށް މަގުފަހިވަނީ، އަދުލުވެރި ފަނޑިޔާރުގެއެއް ނެތުމުން ކަަމަށް އޭނާ ވިދާޅުވި އެވެ.
އަފީފު ވިދާޅުވީ، އަދުލުވެރި ފަނޑިޔާރުގެއެއްގެ އިތުރަށް، ރައްޔިތުންގެ މަޖިލީހުންވެސް ޒިންމާދާރު ކަމާ އެކު މުހިއްމު މަސައްކަތްތަކެއް ކުރަންޖެހޭ ކަމަށެވެ. އެގޮތުން ގާނޫނުތަކަށް ގެންނަ ބައެއް ބަދަލުތަކަކީ، ސީދާ ގާނޫނު އަސާސީއާ ހިލާފު ނިންމުންތަކެއް ކަން އަފީފު ފާހަގަކުރެއްވި އެވެ.
" ގާނޫނު އަސާސީގެ ބެލެނިވެރިފަރާތަކީ، ތިމަންނަމެންނޭ ބުނާ އިރު ގާނޫނު އަސާސީއާ ހިލާފަށް ނިންމުންނަށް މަޖިލީިހުން ނިންމުމުން ކިހިނެތްތޯ ވާނީ." އަފީފު ވިދާޅުވި އެވެ.
އަފީފު ވިދާޅުވީ، ތިން ބާރު ވަކިވެފަިއވާ ޑިމޮކްރެޓިކް ނިޒާމެއް ހަރުދަނާ ކުރެވޭނީ ފަނޑިޔާރުންނަކީ އެއްވެސް ނުފޫޒެއްނެތި މިނިވަންކަމާ އެކު ގާނޫނު އަސާސީގެ ހަމަތަކުގެ ތެރެއިން ކަންކަން ނިންމާ ބަޔަކަށްވުމުން ކަމަށެވެ. މީގެ ތެރެއިންވެސް ސުޕްރީމް ކޯޓަގެ ފަނޑިޔާރުން މިފަދަ ބަޔަކަށް ވާންޖެހޭ ބައެއް ކަމަށް އޭނާ ވިދާޅުވި އެވެ.
އަފީފު ވަނީ ދާދި ފަހުން ސުޕްރީމްކޯޓުން ނިންމި ނިންމުމަކަށް ފާޑުވިދާޅުވެފަ އެވެ.
އެގޮތުން ރައްޔިތުންގެ މަޖިލިހަށް ހުށަހަޅާ އިތުބާރު ނެތްކަމުގެ މައްސަލަތަކުގައި އެންމެ ފަހު ނިންމުން ނިންމާނީ ސުޕްރީމް ކޯޓުން ކަމަށް މިދިޔަ މެއި މަހު އެ ކޯޓުން ހުކުމްކޮށްފައިވާ ހުކުމަކީ ގާނޫނު އަސާސީއާ ތައާރަޒުވާ ހުކުމެއް ކަމަށް އަފީފުވިދާޅުވި އެވެ.
އަފީފު ވިދާޅުވީ، ދިވެހި ރާއްޖޭގެ ގާނޫނު އަސާސީއަށް އިސްލާހުތައް ގެންނަންޖެހޭ ކަމަށާއި އެއްވެސް ގާނޫނަކީ އެއަށް އިސްލާހު ނުގެނެވޭނެ ގާނޫނެއް ނޫން ކަަމަށެވެ.
ދިމާވާކަންކަމުގެ ތެރެއިން އެކަމަކަށް ރިޔާއަތްކޮށް ގާނޫނުތަކަށް އިސްލާހު ގެންނަން ވާނެ ކަމަށާއި ގާނޫނު އަސާސީ އިސްލާހު ކުރުމުގެ ގޮތުން މިހާރު އެންމެ ބޮޑަށް ކުރަންޖެހޭ ކަމަކީ ގާނޫނު އަސާސީގެ މާއްދާތައް މާނަކުރުމާއި ތަފްސީލު ކުރުމުގެ މަސައްކަތް ކަމަށެވެ.
ގާނޫނު އަސާސީގެ މާއްދާތައް އެންމެ ފުރިހަަމައަށް މާނަ ކުރެވިފައިނުވާތީ، ދިމާވަމުންދާ މައްސަލަތައް އަފީފު ފާހަގަކުރެއްވި އެވެ.
" އެންމެ ބޮޑަށް ސުޕްރީމްކޯޓުން ނަަގައިގެން ޕޮއިންޓް. އެންމެ ފަހު ބަސް ބުނާނީ ސުޕްރީމްކޯޓުންނޭ. މިކަން އޮތީ ކިހިނެއްތޯ. މި އައިސްފަ އޮތް ގޮތް ބައްލަވާ. އަދުލު އިންސާފު ގާއިމް ކުރުމުގެ ބާބުގައި ބަޔާންކޮށްފައި އޮންނާނެ، ދަށު ކޯޓުން ނިމޭ މައްސަލައެއް، ހައިކޯޓަށް އިސްތިއުނާފު ކުރެވޭނެ. އަދި ހައިކޯޓުން ނިންމާ ނިންމުތައް ސުޕްރީމް ކޯޓުގައި އިސްތިއުނާފު ކުރެވޭނެއޭ. ސުޕްރީމްކޯޓުން ނިންމާ ނިންމުމަކީ އެންމެ ފަހުގެ ނިންމުމޭ. އެއީ އިސްތިއުނާފު މައްސަލަތަކުގައި. އެހެން ކަމެއްގައެއް ނޫން. މިއަދު ދިމާވެގެން އުޅޭ ކަންކަމަކީ ހުރިހާ ކަމެއްގެ ތެރެއަށް ސުޕްރީމް ކޯޓުގެ ތެރެއަށް ވަނުން." އަފީފް ވިދާޅުވިއެވެ.
އަފީފު ވަނީ ގާނޫނު އަސާސީން ރައްޔިތުންނަށް ލިބިދޭ ހައްގުތަށް ހޯދުމަށާއި ގާނޫނު އަސާސީ އިސްލާހު ކުރުމުގައިވެސް ރައްޔިތުން އިސްވެ ނިކުމެ އެކަންކަމަށް ގޮވާލަންޖެހޭ ކަަމަށެވެ.
ރައްޔިތުންނަށް މިނިވަންކަމާއެކު ހިޔާލުފާޅު ކުރުމުގެ ފުރުސަތު ނެތުމުން ރާއްޖޭގައި ކޮރަޕްޝަން އިންތިހާއަށް އިތުރުވެފައިވާ ކަމަށާއި ގައުމަށް ބޭނުންވާ ތަރައްގީ ގެނެވޭނީ ފުރިހަމަ ޑިމޮކްރެޓިކް ނިޒާމެއް އޮވެގެން ކަމަށް އޭނާ ވިދާޅުވި އެވެ.
