ހުޅުމާލެ ދެވަނަ ފިޔަވަހީގައި ހެދިކާ ވިއްކުމަށް ހާއްސަކޮށްގެން ހަދާ "އަރބަން ޝެކް" ކުއްޔަށް ދޫކުރަން ހައުސިންގ ޑެވެލޮޕްމަންޓް ކޯޕަރޭޝަން (އެޗްޑީސީ) އިން އިއުލާން ކޮށްފިއެވެ.
އެ ކުންފުނިން ބުނެފައިވާ ގޮތުގައި ހަތަރު އަރބަން ޝެކް ކުއްޔަށް ދޫކުރާނެއެވެ. މި ޝެކްތައް ކުއްޔަށް ދޫކުރުމަށް ހުޅުވާލުމަށް ހަމަޖެހިފައިވަނީ ހުޅުމާލޭގެ ރަށްވެހިންނާއި، ހުޅުމާލެގައި ދިރިއުޅޭ ފަރާތްތަކަށް ދެ އަހަރު ދުވަހުގެ މުއްދަތަކަށެވެ.
އެޗްޑީސީން ބުނީ، އެ ޝެކުތަކަށް މަހު ކުލީގެ ގޮތުގައި 1500 ރުފިޔާ އަދި ލީސް ޑިޕޮސިޓްގެ ގޮތުގައި 1500 ރުފިޔާ ދައްކަންޖެހޭނެކަމަށެވެ. މި ފައިސާ އަކީ ގޮޅި ކުއްތަށް ދޫކޮށްފައިވާ މުއްދަތު ހަމަވުމުން ގޮޅި އަނބުރާ އެޗްޑީސީއާ ހަވާލު ކުރާއިރު ފެންބިލު ނުވަތަ ކަރަންޓު ބިލު ނުދައްކާ ހުރެއްޖެނަމަ އެކަމަށް ނަގާ ޑިޕޮސިޓެކެވެ. ނަމަވެސް ގޮޅި އަނބުރާ ހަވާލު ކުރާއިރު ގޮޅިއަށް ދައްކަން ޖެހޭ އެއްވެސް ފައިސާއެއް ނެތްނަމަ އެ ފައިސާ އަނބުރާ ރައްދު ކުރާނެ ކަމަށް އެޗްޑީސީން ބުނެއެވެ.
ޝެކް ކުއްޔަށް ލިބޭނެ ފަރާތްތައް ހޮވާނީ ގުރުނަގައިގެންނެވެ. ހަތަރު ގްރޫޕެއް ގުރުއަތުން ހޮވުމަށް ހަމަޖެހިފައިވާއިރު ވެއިޓް ލިސްޓަށް ދެ ގްރޫޕު ގުރުއަތުން ހޮވާނެއެވެ. މި ގޮޅިތަކަަށް އެދި ހުށަހަޅާއިރު ހުށަހެޅާ ކޮންމެ ފޯމެއްގައި ޖުމްލަ ފަސް ފަރާތެއް ހިމަނަން ޖެހޭނެ އެވެ. އޭގެ ތެރެއިން މަދުވެގެން އެކަކު ވާން ޖެހޭނީ ހުޅުމާލެ ދެވަނަ ފިޔަވަހީގެ ރަށްވެއްސަކަށެވެ.
މި ގޮޅިތަކަށް އެދި ހުށަހަޅާ ފޯމުތައް 19 ޑިސެމްބަރު 2022 ވާ ދުވަހުގެ ހެނދުނު 9:00 އިން 11:00 އަށް ހުރަވީ ސްކޫލު ހޯލުން ބަލައިގަންނާނެއެވެ. ގުރުއަތުލުން ކުރިއަށްދާނީ އެ ދުވަހުގެ މެންދުރު 11:30 ގައެވެ.
ގުރުއަތުން ހޮވިގެން އަރބަން ޝެކް ކުއްޔަށް ދޫކުރުމުގެ އެއްބަސްވުމުގައި ސޮއިކުރާ ދުވަހުން ފެށިގެން ބަންދު ދުވަސްތައް ހިމެނޭ ގޮތަށް ހަތް ދުވަހުގެތެރޭގައި ޚިދުމަތްދޭން ފަށަން ޖެހޭނެ ކަމަށް އެޗްޑީސީން ބުނެއެވެ. އެ މުއްދަތުގައި ޚިދުމަތް ދޭން ނުފަށައިފިނަމަ ދެފަރާތުގެ ދެމެދުގައި ވެފައިވާ އެއްބަސްވުން އެއްވެސް ބަދަލަކާއި ނުލައި ބާތިލުކުރެވޭނެކަމަށްވެސް އެ ކުންފުނިން ބުނެއެވެ.
އެޗްޑީސީން ބުނެފައިވާ ގޮތުގައި މި އަރބަން ޝެކްތައް ލިބޭ ފަރާތްތަކަށް އެތަންތަން އެހެން މީހަކަށް ކުއްޔަށް ދީގެން ނުވާނެއެވެ. އަދި އެތަންތަނުގައި ހެދިކާ ވިއްކަން ޖެހޭނީ އެޗްޕީއޭގެ މިންގަޑުތަކާ އެއްގޮތަށް، ސާފުތާހިރުކަމަށް ބަލައިގެން ކަމަށާއި އެޗްޑީސީގެ ހުއްދަނެތި އެ ތަންތަނަށް އެއްވެސް ބަދަލެއް ގެނެސްގެން ނުވާނެ ކަމަށް ވެސް އެ ކުންފުނިން ބުނެއެވެ.
އެޗްޑީސީ އާއި އަރބަން ޝެކް ލިބޭ ފަރާތްތަކާ ދެމެދު ވެވޭ އެއްބަސްވުމުގެ ދަށުން ދައްކަން ޖެހޭ ކުލި ނުދައްކައިފިނަމަ ނުވަތަ އެއްވެސް މާއްދާއަކާ ޚިލާފުވެއްޖެނަމަ އެ ކުންފުންޏަށް އެމީހަކާއެކު ވެފައިވާ އެއްބަސްވުން ބާތިލު ކުރެވޭނެއެވެ.
އެޗްޑީސީން އަންނަނީ ހުޅުމާލެ ދެވަނަ ފިޔަވަހީގައި އާއްމު ޚިދުމަތްތައް ތައާރަފު ކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން ފިހާރަތަކާއި ކްލިނިކްތަކާއި ޓިއުޝަން ސެންޓަރުތަކާއި ސެލޫންތަކާއި ރެސްޓޯރެންޓުތަކަށް ދެވަނަ ފިޔަވަހިން މިހާރު ދަނީ ޖާގަތައް ދޫކުރަމުންނެވެ.
