79.9 މިލިއަން ރުފިޔާއަށް ށ. މިލަންދޫ ބަނދަރު އަޕްގްރޭޑްކުރުމުގެ މަސައްކަތް އެމްޓީސީސީއާ ހަވާލުކޮށްފި
މަޝްރޫއުގެ އަގު79،949،851.28ށް އަރާ
ށ. މިލަންދޫ ބަނދަރު އަޕްގްރޭޑްކުރުމުގެ މަޝްރޫއުގެ އެއްބަސްވުމުގައި ސޮއިކުރުން
79،949،851.28 (ހަތްދިހަ ނުވަ މިލިއަން ނުވަ ލައްކަ ސާޅީސް ނުވަހާސް އަށްސަތޭކަ ފަންސާސް އެއް ރުފިޔާ އަށާވީސް ލާރީގެ) އަގަކަށް، ށ. މިލަންދޫ ބަނދަރު އަޕްގްރޭޑް ކުރުމުގެ މަޝްރޫއުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮޕްމެނީއާ ހަވާލުކޮށްފިއެވެ.
ބުރާސްފަތި ދުވަހު ހަވީރު ހައުސިންގ މިނިސްޓްރީގައި ބޭއްވި ރަސްމިއްޔާތެއްގައި އެކަމާގުޅޭ އެއްބަސްވުމުގައި ސޮއިކުރައްވާފައި ވަނީ ހައުސިންގ މިނިސްޓްރީގެ ޑިރެކްޓަރ ޖެނެރަލް / އިންފްރާސްޓްރަކްޗަރ ޑިޕާޓްމަންޓް ފާތިމަތު ޝާނާ ފާރޫގުއާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމްއެވެ.
މި މަޝްރޫއާ ގުޅޭގޮތުން އެމްޓީސީސީގެ ސީއީއޯ އާދަމް އާޒިމް ވިދާޅުވީ އެ ބަނދަރު ޑިޒައިންކޮށްފައިވަނީ ވަރަށް ފުރިހަމަކޮށް ކަަމަށެވެ. އެ މަސައްކަތް ނިމޭއިރު ށ. މިލަންދޫ ބަނދަރު ވެގެންދާނީ، ރާއްޖޭގެ އެންމެ ފެންވަރު ރަނގަޅު އެއް ބަނދަރަށް ކަަމަށް އާޒިމް ވިދާޅުވިއެވެ. އާޒިމް ވަނީ މިނިސްޓަރ އޮފް ސްޓޭޓް ފޮރ ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ އަލްފާޟިލް އަކްރަމް ކަމާލުއްދީން އެ ޕްރޮޖެކްޓް ކުރިއަށް ގެންދިއުމުގައި އެމްޓީސީސީއާއެކު ވަރަށް ގާތުން މަސައްކަތްކުރެއްވިކަމަށެވެ. މީގެ އިތުރުން އެ މަޝްރޫއުގެ ޑިޒައިނިންގ މަރުހަލާގައި މިލަންދޫ ދާއިރާގެ މެންބަރު އަލީ ރިޒާވެސް އެހީތެރިވެދެއްވި ކަމަށް އާޒިމް ފާހަގަކުރެއްވިއެވެ.
މި ރަސްމިއްޔާތުގައި ވާހަކަފުޅުދައްކަވަމުން މިލަންދޫ ދާއިރާގެ މެންބަރު އަލީ ރިޒާ ވިދާޅުވީ، މިލަންދޫ ބަނދަރު ޕްރޮޖެކްޓުގައި ސޮއިކުރެއްވުމަކީ، ރަށްރަށުގެ ބަނދަރު ޒަމާނީ ފެންވަރަށް ހެދުމަށް މި ސަރުކާރުން ދޭ އިސްކަން ހާމަކޮށްދޭ ކަމެއް ކަަމަށެވެ. އަދި މިލަންދޫގެ ޝޯ ޕްރޮޓެކްޝަން ނުވަތަ ރަށް ގިރުމުން ހިމާޔަތްކުރުމުގެ މަޝްރޫއުވެސް މި މަސައްކަތާއެކު ބާރު ސްޕީޑުގައި ކުރިއަށް ގެންދިއުމަށް މަގުފަހިވެގެންދާނެ ކަމަށް އޭނާ ވަނީ ވިދާޅުވެފައެވެ.
މި މަޝްރޫއު ހަވާލުކޮށްފައިވަނީ 600 ދުވަހުގެ ތެރޭ ނިންމާ ގޮތަށް ކަމަށް ވާއިރު، މި ޕްރޮޖެކްޓަކީ ސަރުކާރުން އެންމެ ބޮޑު އިސްކަމެއް ދޭ އެއް ޕްރޮޖެކްޓްކަމަށް އެމްޓީސީސީން ބުނެއެވެ. މި މަޝްރޫއުގެ ދަށުން (މެދު ދިޔައިން ފެށިގެން 3- މީޓަރު ހަމަވާ ވަރަށް) 17،900 ކިއުބިކް މީޓަރު ބަނދަރު ފުންކުރުމާއި، (މެދު ދިޔައިން ފެށިގެން 3.5- މީޓަރު ހަމަވާ ވަރަށް) 70،400 ކިއުބިކް މީޓަރު ބަނދަރު ފުންކުރުމާއި، (މެދު ދިޔައިން ފެށިގެން 4.0- މީޓަރު ހަމަވާ ވަރަށް) 8،400 ކިއުބިކް މީޓަރ ނެރު ފުންކުރުމުގެ މަސައްކަތް ކުރުމަށް ވަނީ ހަމަޖެހިފައެވެ.
މީގެ އިތުރުން 213 މީޓަރު ނެރު ބްރޭކް ވޯޓަރ ޖެހުމާއި، 360 މީޓަރ ސޭންޑްފިލް ބްރޭކް ވޯޓަރ ޖެހުމާއި، 10 މީޓަރ ސަމްބާޖް ބްރޭކް ވޯޓަރ ޖެހުމާއި، 93 މީޓަރ ރިވެޓްމެންޓް ޖެހުމާއި، 15 މީޓަރ ގްރޮއިން ޖެހުމާއި، 311 މީޓަރ އެއްގަމު ތޮށި އަދި ސްކޯރިންގ އެޕްރޮން ޖެހުމަށް ވަނީ ހަމަޖެހިފައެވެ. ހަމައެހެންމެ މި މަޝްރޫއުގެ ދަށުން 10 މޫރިންގ ބޮއި ހަރުކުރުމާއި، 121 އަކަ މީޓަރުގެ ރޭމްޕެއް ހެދުމާއި، އެކްސެސް ޕްލެޓްފޯމެއް އެޅުމާއި، 2 ނެވިގޭޝަން ލައިޓް ހަރުކުރުމާއި، 42 މަގު ބައްތި ހަރުކުރުން އަދި 3789 އަކަމީޓަރުގެ ޕޭވްމެންޓެއް ހެދުމަށް ވަނީ ހަމަޖެހިފައެވެ.
އަދި 3 ކޮންކްރީޓް ބްރިޖް ހެދުމަށްވެސް މި މަޝްރޫއުގެ ތެރޭގައި ވަނީ ހިމަނާފައެވެ. އޭގެ ތެރޭގައި ހިމެނެނީ 20 މީޓަރު ދިގު 3 މީޓަރު ފުޅާ ކޮންކްރީޓް ބްރިޖެއް ހެދުމާއި، 54 މީޓަރު ދިގު 3 މީޓަރު ފުޅާ ކޮންކްރީޓް ބްރިޖެއް ހެދުމުގެ އިތުރުން 30 މީޓަރު ދިގު 2 މީޓަރު ފުޅާ ކޮންކްރީޓް ބްރިޖެއް ހެދުމުގެ މަސައްކަތެވެ.
