ރައްޔިތުންގެ މަޖިލީހުގެ 13 ބުރީގެ އައު ޢިމާރާތުގައި 21 މީހުންގެ ލިފްޓެއް ބެހެއްޓުމަށްޓަކައި ބޭނުންވާ ތިމާވެއްޓަށް އަސަރު ފޯރާނެ ވަރު ބަޔާންކުރާ ރިޕޯޓު (އީ.އައި.އޭ) ތައްޔާރު ކޮށްދޭނެ ބަޔަކު ހޯދަން އެއިދާރާއިން އިއުލާންކޮށްފިއެވެ.
ރައްޔިތުންގެ މަޖިލީހުގެ 13 ބުރީގެ އައު ޢިމާރާތް ބޭނުންކުރަން ފެށީ 2019 ވަނަ އަހަރުގެ ޖޫން މަހުގެ ތެރޭގައެވެ. އެ ޢިމާރާތުގައި މިހާރުވެސް ދެ ލިފްޓް ހުރެއެވެ.
ރައްޔިތުންގެ މަޖިލީހުން ކުރި އިޢުލާނުގައި ވަނީ 13 ބުރީގެ އައު އިމާރާތުގެ ހުޅަނގު އުތުރު ކަނަށްވާގޮތަށް އިމާރާތް ކުރެވޭ އެނެކްސްގެ ތެރެއިން އިމާރާތުގެ ޓެރަސް ހިމެނޭގޮތަށް ކޮންމެ ބުރިއަކަށް ދެވޭގޮތަށް 21 މީހުންގެ ލިފްޓެއް ބެހެއްޓުމަށްޓަކައި ބޭނުންވާ އީ.އައި.އޭ ތައްޔާރު ކޮށްދޭނެ ފަރާތެއް ހޯދުމަށް ބޭނުންވާކަމަށެވެ.
މިކަމަށް ޝަޢުޤުވެރިވާ ފަރާތްތަކުން އަންދާސީ ހިސާބު ހުށައެޅުމަށް މަޖިލީހުން ވަނީ އެދިފައެވެ. އެގޮތުން ބީލަން ހުށަހެޅުމަށް މިމަހުގެ 12 ވަނަ ދުވަހުގެ ކުރިން ރަޖިސްޓްރީވާންޖެހެއެވެ. ބީލަން ހުށަހެޅުމާއި ހުޅުވާ ސުންގަޑިއަކީ 19 ޑިސެންބަރު ވާ ހޯމަ ދުވަހުގެ 10:30 އެވެ. ބީލަން ހުށަހެޅުމާއި ހުޅުވުން އޮންނާނީ ރައްޔިތުންގެ މަޖިލީހުގެ އިދާރާގައެވެ.
