119 ކިލޯ ޑްރަގް ކޭސް: "މައްސަލައެއް ލަސްވުމަކީ ބަންދުގައި ހުންނަންޖެހޭ މީހަކު ދޫކޮށްލަންޖެހޭ ސަބަބެއް ނޫން"
އޭނާއަށް ކުރަނީ ޑައިމޯފިން ޓްރެފިކްކުރުމުގެ ކުށުގެ ދަޢުވާ
119 ކިލޯގެ މަސްތުވާތަކެތީގެ މައްސަލައިގައި ދައުވާ އުފުލާފައިވާ މީހުން
119 ކިލޯގެ މައްސަލައިގައި ހިމެނޭ މުޖާހިދު ދޫކޮށްލުމަށް ދަށު ކޯޓުން ނިންމި ނިންމުން ދިވެހިރާއްޖޭގެ ހައިކޯޓުން ބާތިލުކޮށްފިއެވެ.
މިކަމާއި ގުޅޭގޮތުން ޕްރޮސެކިއުޓަރ ޖެނެރަލްގެ އޮފީހުން ބުނީ، 119 ކިލޯ މަސްތުވާތަކެތި ޓްރެފިކްކުރި މައްސަލައިގައި, ޑައިމޯފިން ޓްރެފިކްކުރުމުގެ ކުށުގެ ދަޢުވާކޮށްފައިވާ ގދ. ހޯނޑެއްދޫ, އަލޯރާ އަޙްމަދު މުޖާހިދު ކްރިމިނަލް ކޯޓުގެ އަމުރެއްގެ ދަށުން ޝަރީޢަތް ނިމެންދެން ބަންދުކޮށްފައިވަނިކޮށް, 23 ނޮވެންބަރު 2022 ދުވަހު ޝަރުތުތަކާއެކު އޭނާ ބަންދުން ދޫކޮށްލުމަށް ކްރިމިނަލް ކޯޓުން ނިންމި ނިންމުން ދިވެހިރާއްޖޭގެ ހައިކޯޓުގައި އިސްތިއުނާފުކޮށްފައިވާ ކަމަށެވެ.
މި މައްސަލައިގައި ބުދަ ދުވަހު ހައިކޯޓުގައި ބޭއްވި އަޑުއެހުމުގައި ފަނޑިޔާރު މުޙައްމަދު ނިޔާޒު ވަނީ ދަށު ކޯޓުން ނިންމި ނިންމުން ބާތިލު ކުރައްވާފައެވެ. އެގޮތުން މައްސަލައެއް ލަސްވުމަކީ، ބަންދުގައި ހުންނަންޖެހޭ މީހަކު ދޫކޮށްލަންޖެހޭ ސަބަބެއް ނޫންކަން ފާހަގަ ކުރައްވައި ފަނޑިޔާރު ވިދާޅުވީ، މައްސަލަ ބަލާ ކޯޓެއްގައި ނުވަތަ އެ ކޯޓެއްގެ ސެކްޝަނުގައި ނުވަތަ ޖުޑީޝަލް ދާއިރާގެ ކޯޓެއްގައި ދާއިމީ ފަނޑިޔާރަކު ނެތްނަމަ، ޢަމަލު ކުރަންވީ ގޮތް ޤާނޫނުގައި ބަޔާންކޮށްފައިވާ ކަމަށެވެ.
އޭގެ އިތުރުން، ފަނޑިޔާރަކު ނެތިގެން މައްސަލައެއް ލަސްވާނަމަ، ބަންދުގައި ހުންނަންޖެހޭ މީހަކު މުޖުތަމަޢުއަށް ދޫކުރުމުގެ ބަދަލުގައި ޢަމަލު ކުރަންޖެހޭނީ ޤާނޫނުގައިވާ ގޮތަށް އެމައްސަލައެއް އަވަސް ކުރެވޭނެ ގޮތަކަށް އެހެން ފަނޑިޔާރަކާއި މައްސަލަ ބެލުން ޙަވާލުކޮށްގެންކަމަށްވެސް ހައިކޯޓުގެ ނިންމުމުގައި ބަޔާންކޮށްފައިވެއެވެ.
ޙުކުމުގައި ފާހަގަ ކުރައްވާފައިވާ ގޮތުގައި މުޖާހިދު ޝަރީޢަތް ނިމެންދެން ބަންދުކޮށްފައިވާ މައްސަލައަކީ، 100 ކިލޯ ނުވަތަ އެއަށްވުރެ ގިނަ ކިލޯގެ މަސްތުވާތަކެތި ހިމެނޭ މައްސަލައެއްގައި، އޭގެތެރެއިން 80 ވަރަކަށް ކިލޯއާ އަޙްމަދު މުޖާހިދުއާ ގުޅުވާލެވޭ އެކަށީގެންވާ ހެކިތަކެއް ހުރި މައްސަލައެކެވެ.
އަދި މަސްތުވާތަކެތި މުޖުތަމަޢަށް ފޯރުކޮށްދިނުމުގައި ނުވަތަ މި ކަމުގެ ވިޔާފަރީގައި އަޙްމަދު މުޖާހިދު ޝާމިލުވާކަމަށް ބެލެވޭނެ ހެކިތައް ހުށަހަޅާފައިވާކަންވެސް ޙުކުމުގައި ބަޔާން ކުރައްވާފައިވެއެވެ. ވުމާއެކު، މުޖާހިދު ޝަރުޠުކޮށް ދޫކޮށްލުމަށް ކްރިމިނަލް ކޯޓުން ނެރެފައިވާ އަމުރު ނެގެހެއްޓިދާނެ ޤާނޫނީ ސަބަބެއް އޮތްކަމަކަށް ދެކިވަޑައިނުގަންނަވާކަން ފަނޑިޔާރު ނިޔާޒު ފާހަގަ ކުރެއްވިއެވެ.
ކްރިމިނަލް ކޯޓުން އޭނާ ދޫކޮށްލީ އެ މައްސަލަ ބަލާ ސެކްޝަންގެ ދާއިމީ ފަނޑިޔާރަކު ނެތުމުން އެ މައްސަލަ ލަސްވާކަމަށް ބުނެއެވެ. އެހެންނަމަވެސް މުޖާހިދު ދޫކޮށްލާފައިވަނީ ޝަރުތުތަކާއެކުއެވެ. އޭނާއަށް ކޮށްފައިވާ ޝަތުރުތަކުގެ ތެރޭގައި ދައުލަތުގެ ހެކިންނާއި ވާހަކަ ނުދެއްކުމާއި، ހެއްކަށް ނުފޫޒު ނުފޯރުވުމާއި ކޯޓުން އަންގާ ގޮތެއްގެ މަތިން ކޯޓަށް ހާޒިރުވުމަށް އަންގާއެވެ. އަދި ދިރިއުޅުމުގެ އަސާސީ ކަންކަން ފުއްދުމަށް ނޫން ގޮތަކަށް ގެއިން ބޭރަށް ނުކުތުން ވަނީ މަނާކޮށްފައެވެ.
ކްރިމިނަލް ކޯޓުގައި މި މައްސަލަ ބައްލަވަމުން ގެންދެވީ ގާޒީ ދީބާނާޒް ފަހުމީއެވެ. އެހެންނަމަވެސް، އޮގަސްޓު މަހުގެ 9 ވަނަ ދުވަހުން ފެށިގެން ގާޒީ ދީބާނާޒް ހައިކޯޓަށް ބަދަލު ކުރެއްވުމާއެކު އެ ސެކްޝަނުގެ މައްސަލަަތައް ބަލަމުން ގެންދަނީ އެކިއެކި ސެކްޝަންތަކުގެ ގާޒީންނަށް ބަހާލައިގެންނެވެ. އެގޮތުގެ މަތިން މައްސަލަތައް ކުރިއަށް ގެންދާއިރު އަޑުއެހުންތައް ތާވަލު ނުކުރެވިވެސް ގިނަ ދުވަސް ވޭތުވެގެންދާން ޖެހެއެވެ.
މި މަހުގެ 23 ވަނަ ދުވަހު ވެސް މި މައްސަލައިގައި ހިމެނޭ ބަޔަކު ކްރިމިނަލް ކޯޓުން ވަނީ ދޫކޮށްލާފައެވެ. އެ މީހުންވެސް ބަންދުން ދޫކޮށްލާފައިވަނީ ޝަރުތުތަކާއެކުއެވެ.
