ރެސްޓޯރަންޓުން ކައިގެން މޮޅު ސްކޫލަށް ދަރިން ފޮނުވައިގެން ބަޔަކު އުޅަނަސް، ހަމާދީއަކަށް އެގޮތެއް ނެތެވެ!

ވަޒީފާ ގެއްލި، 4 މެންބަރުންގެ ޢާއިލާ ބަލާނެ ފަދައެއް ނެތި، ޢުމުރުން 51 އަހަރުގެ ޙުޞައިން ހަމާދީގެ ކޮންމެ ދުވަހެއްގެ މަސައްކަތަށް ވެފައި އޮންނަނީ، ލުބްނާންގެ އާ އާންމު ހާލަތު ކަމުގައި ވެފައިވާ އިޤްތިޞާދީ ކާރިޘީ އޮއެވަރުގައި ޖެހި ޣަރަޤު ވަމުންދާ ދިރިއުޅުން ނެގެހެއްޓުމަށް ކުރެވެން އޮތް ހާ ކަމެއް ކުރުމެވެ.

މީގެ ކުރިން ވަޑިއެއްގެ ގޮތުގައި މަސައްކަތް ކުރަމުން ދިޔަ ހަމާދީގެ ވަޒީފާ ގެއްލިފައި ވާއިރު، މިއަދު އޭނާއަކީ އިންތިހާއަށް އަގުބޮޑު ބޭސް ބޭނުންވާ ބައްޔެއްގެވެސް ޝިކާރައަކަށް ވެފައިވާ މީހެކެވެ.

ހަމާދީ އިތުރު އާމްދަނީ ހޯދާ އުޅުނީ މަސްވެރިކަން ކޮށްގެންނެވެ. ނަމަވެސް، މިއަދު އެކަންވެސް ކުރެވޭކަށް ނެތެވެ. ހަމާދީ ބުނާ ގޮތުގައި މީގެ ކުރިން އޭނާގެ ކަސްޓަމަރުންގެ ގޮތުގައި ތިބި މީހުންގެ އަތުގައި، މަސް ގަންނާނެ ތަނަވަސް ކަމެއް މިއަދަކު ނެތެވެ. ނުވަތަ މަސް ގަނެ، ފިނި ކުރުމަށްޓަކާ ލާ ފުރިޖަށް ކަރަންޓު ދޭނެ ތަނަވަސް ކަމެއް އެމީހުންގެ އަތަކު ނެތެވެ.

ލުބްނާނުގެ އެތައް ޢާއިލާއެއް ފަދައިން ހަމާދީގެ ޢާއިލާވެސް މިއަދު ދިރިއުޅެމުން ދަނީ، އަނދަވަޅަކަށް ވެއްޓޭ ނުވެއްޓޭ ހިސާބުގައެވެ. އިޙްސާސް ކުރަމުން ދަނީ ދިރިއުޅުމުގެ ވަރުބަލިކަމެވެ. ހާސްކަމާއި ނުތަނަވަސް ކަމެވެ. ހެދޭނެ ގޮތެއް ނޭނގި، މާޔޫސްވެފައިވާ ހާލުގައެވެ. މުސްޠަޤުބަލާ މެދު ޢުއްމީދު ގެއްލިފައެވެ.

ޢުމުރުން 9 އަހަރާއި 13 އަހަރުގެ އަންހެން ދަރިފުޅު ފިލާވަޅު ދަސް ކުރަމުން ދިޔައީ ކަރަންޓުގެ އަލިކަމެއް ނެތް، 1 ކޮޓަރީގެ ގޭގެ ތެރެއަށް، ބޭރުން އެޅެމުން ދިޔަ ފަނޑު އަލީގައެވެ.

މީގެ ކުރިން މެދު ފަންތީގެ ދިރިއުޅުމެއް އުޅެމުން ދިޔަ ހަމާދީގެ ޢާއިލާއަށް މި ހިތްދަތިކަން ކުރިމަތިވީ، 2019 ވަނަ އަހަރު ލުބްނާންގެ އިޤްތިޞާދު އިނދަޖެހުމާ އެކުގައެވެ.

ޑިސެމްބަރު 2021 ގައި ގެލަޕްއިން އާންމު ކުރި ތަފާސް ހިސާބުތަކަށް ބަލާއިރު، ލުބްނާނުން ސާވޭގައި ބައިވެރިވި ކޮންމެ 4 މީހަކުން 3 މީހަކީ ނުތަނަވަސްކަން ތަޖުރިބާ ކުރާ މީހެކެވެ. އަދި 63 ޕަސެންޓް މީހުން ވަނީ، ވެގެން ވާނަމަ، ޤައުމު ދޫކޮށް ދާނެ ކަމަށް ބުނެފައެވެ.

ހަމާދީގެ ޢާއިލާއަށް މި ވަރަށްވެސް ދިރިއުޅެވެނީ ލިބެމުންދާ އެހީއާއެކުގައެވެ.

ޢާއިލާގެ ހެޔޮ އެދޭ މީހުންނާއި، އަވަށްޓެރިންނާއި ސަރުކާރުގެ އިޖުތިމާޢީ ރައްކާތެރިކަމާ ބެހޭ މަޝްރޫޢުގެ ތެރެއިން 200 އެއްހާ ޑޮލަރު ލިބެއެވެ. ދަރިންގެ ސްކޫލުގެ ޚަރަދުތައް ހަމަޖައްސަނީ ހިލޭ އެހީދޭ ޖަމިއްޔާއެއްގެ ދީލަތި އެހީގައެވެ. ހަމާދީގެ ބޭހަށް ހިނގާ ޚަރަދުގެ ބައެއް ވަނީ، ސަރުކާރުން ސަބްސިޑައިޒް ކޮށްދީފައެވެ.

ލުބްނާންގެ އިޤްތިޞާދު ނެގެހެއްޓުމަށް ބައިނަލްއަޤުވާމީ މާލީ އިދާރާއާއެކު އޭޕްރިލް މަހު އެއްބަސްވުންތަކެއް އެކުލާވާފައި ވީ ނަމަވެސް، އޭރު އެއްބަސްވެފައި ވާ އިޞްލާޙީ ބަދަލުތައް ތަންފީޒު ކުރުމަށް ލުބްނާންގެ ސިޔާސީ ލީޑަރުން ފެއިލްވެއްޖެ ނަމަ، އެ ޤައުމުގެ މަޞްރަޙު އަދިވެސް އިތުރަށް ގޯސްވެގެން ދާނެ ކަމަށް އިޤްތިޞާދީ ތަޖުރިބާކާރުން ލަފާ ކުރެއެވެ.

ލުބްނާނު މިއަދު އަނދަވަޅަކަށް ވެއްޓިފައި ވަނީ ސިޔާސީ އަދި މާލީ ނުފޫޒުގެ ބޮންތީގައި ތިބި މީހުން ގަސްތުގައި ހިންގި ޖަރީމާއަކުން ކަމަށް ވޯލްޑް ބޭންކުން ސިފަ ކުރާ އިރު، ލުބްނާންގެ ސަރުކާރުން ބުނަމުން ދަނީ، އިޞްލާޙީ ބަދަލުތައް ތަންފީޒު ކުރުން މަތީ ސާބިތުވެ ތިބޭނެ ކަމަށެވެ. 

ނަމަވެސް ލުބްނާންގެ މަޞްރަޙުން ފެންނަމުން ދަނީ އެހެން މަންޒަރެކެވެ. މީހުން ވަނީ އިންތިހާއަށް ބިކަވެ ހާލުގައި ޖެހިފައެވެ. ޤައުމު ދޫކޮށް އެތައް ބަޔަކު ހިޖުރަ ކޮށްފައި ވާ އިރު، ޤައުމުގައި ތިބި މަދު މީސްކޮޅު ބަރޯސާ ވަނީ ޤައުމުން ބޭރުގައި ތިބި ޢާއިލާ މެންބަރުން ދޭ އެހީއަށެވެ. 6 މިލިއަނެއްހާ މީހުންގެ އާބާދީއެއް އޮތް ލުބްނާނުގެ އާބާދީގެ 3 ބައިކުޅަ 1 ބައި މީހުންގެ ކެއިންބުއިމުގެ ކަންކަން ހަމަޖައްސަނީ ވޯލްޑް ފުޑް ޕްރޮގްރާމްއިންނެވެ.

ލުބްނާން އޮތީ ހަމަ ރަނގަޅަށްވެސް ދެބައި ވެފައެވެ. ފޯރާ މީހުންނާއި ފަޤީރުންނެވެ. ރެސްޓޯރަންޓުން ކައިގެން، އެންމެ ފެންވަރުގެ ސްކޫލުތަކަށް ދަރިން ފޮނުވައިގެން އުޅޭ މީހުންވެސް އެބަ އުޅެއެވެ. އެފަދަ މަންޒަރުތައް ފެނި، ހަމާދީ ފަދަ އާންމުންގެ ހިތްތައް ކުދިކުދިވެއެވެ. އެމީހުން ވަނީ އެ ޒަޚަމްތަކާއެކު ދިރިއުޅެން އާދަކޮށްފައެވެ.