ވޯލްޑް ކަޕް ފުޓްބޯޅަ މުބާރާތުގައި މިރޭ ބްރެޒިލާއި ދެކުނު ކޮރެޔާ ވާދަކުރާ މެޗަކީ ވަރަށް ހާއްސަ މެޗެކެވެ. މިއީ 2010 ވަނަ އަހަރު ގެ ފަހުން ކޮރެޔާއިން މުބާރާތުގެ ނޮކްއައުޓް ފޭސްގައި ވާދަކުރާ ފުރަތަމަ ފަހަރެވެ. މި ތަޖުރިބާ އެމީހުން ކުރަން ޖެހިފައިވަނީ އާދައިގެ ބަޔަކާ ދެކޮޅަކަށް ނޫނެވެ. ދުނިޔޭގެ ފުޓްބޯޅައިގެ އެންމެ މުއްސަނދި މާޒީއެއް އޮތް ބްރެޒިލާ ދެކޮޅަށެވެ. އަނެއްކޮޅުން ބްރެޒިލް އަކީ މި ފަހަރުގެ މުބާރާތުގެ ހޮޓް ފެވަރިޓުން ވެސް މެއެވެ. މިރޭގެ މެޗަކީ މި ދެ ބައިމީހުންގެ އަށް ވަނަ ކުރިމަތިލުމެވެ. މިހާތަނަށް މުޅިން ވެސް ކުޅެފައިވަނީ އެކުވެރިކަމުގެ މެޗުތަކެވެ. މީގެ ތެރެއިން އެއް ފަހަރު މޮޅުވިއިރު އަނެއް ހަ ފަހަރު ކޮރެޔާ އަށް ނާކާމިޔާބުވީއެވެ. އެކަމަކު ގިނަ ތަޖުރިބާކާރުންގެ ނަޒަރުގައި މިރޭގެ މެޗުގައި ކޮރެޔާއިން ބްރެޒިލަށް ތުރާކުރާނެއެވެ.

މުބާރާތުގައި ކޮރެޔާ ދައްކާފައިވާ ކުޅުމަށް ބަލާއިރު މިއީ ބްރެޒިލަށް ވެސް ފަސޭހަވާނެ މެޗަކަށްނުވާނެއެވެ. ހާއްސަކޮށް ކޮރެޔާ އަކީ ގިނައިރު ވާވަރަކަށް މެޗުތެރެއަށް ވަންނަ ޓީމަކަށްވެފައި އެމީހުންގެ ހަލުވި އެޓޭކަކީ ބްރެޒިލަށް ހުރި ނުރައްކަލެކެވެ. މުބާރާތުގެ ގްރޫޕް ސްޓޭޖުގައި ކޮރެޔާ ދައްކާފައިވާ ކުޅުމަށް ބަލާއިރު އުރުގުއޭ އާއި ގާނާ އަދި ފަހު މެޗުގައި ޕޯޗުގަލް ބަލިކުރިއިރު ވެސް ކޮރެޔާގެ ފަރާތުން ފެނިފައިވަނީ ފަހު ހާފުގައި މެޗުގެ ކޮންޓްރޯލް ހޯދާ ޓީމެއްގެ ގޮތުގައެވެ. ހާއްސަކޮށް މެޗުގެ ފަހު ބައިގައި ކުރިއަރައި ފުލުފުލުގައި ހަމަލަދީ އިދިކޮޅު ޓީމުގެ ފޫދުއްވާލާއިރު އެމީހުންގެ ފަރާތުން ވަރުބަލިކަމެއް ހާސްކަމެއް ނުފެނެއެވެ.

މި މެޗަށް ނުކުންނައިރު ކޮރެޔާގެ ކުޅުންތެރިންނަށް ސަޕޯޓަރުން މިހާރު ވެސް ވަނީ ގައުމީ ބަތަލުންގެ ދަރަޖަ ދީފައެވެ. ހާއްސަކޮށް ފޯވަޑް ގުއި ސުން ޗޯގެ މަގުބޫލުކަން ވަނީ ވިލާތަކާ ހަމައަށް އުފުލިފައެވެ. ގާނާ ކޮޅަށް އޭނާ ޖެހި ދެ ގޯލާއެކު ކޮރެޔާގެ އަންހެންކުދިންގެ ލޮލުގައި އޭނާ އަޅައިގަތީ ބެންޗުގައި މަޑުމޮޅިވެފައި އިންތަން ފެނިފައެވެ. މިއާއެކު އޭނާގެ އިންސްޓަގްރާމް ފޮލޯވަރުން 20،000 އިން 1.6 މިލިއަށް މަތިވުމާއެކު ސުން ޗޯ ވަނީ އޭނާގެ މޮބައިލް ފޯނު ނިއްވާލާފައެވެ. ނޫސްވެރިން ސުވާލުކުރުމުން އޭނާ ބުނީ ހުރިހާ މެސެޖެއް ބަލައި ޖަވާބުދޭން ވަގުތެއްނެތް ކަމަށެވެ. ބައެއް ނޫސްތަކުން ބުނާ ގޮތުގައި ގުއި ސުން ޗީ ފޯނު އޮފްކޮށްލީ އަންހެން ކުދިން އިންނަން އެހުމާއި ޑޭޓްކުރަން ކިޔާވަރުންނެވެ. މިއީ 2002 ވަނަ އަހަރުގެ ވޯލްޑް ކަޕުގެ ސެމީ ފައިނަލަށް ދަތުރުކުރި ކޮރެޔާ ޓީމުގައި ތިބި ބައެއް ކުޅުންތެރިންނަށް ވެސް ތަޖުރިބާކުރަން ޖެހުނު ފަދަ ކަމެކެވެ. އާން ޖުން ހުވާން ފަދަ ކުޅުންތެރިންނަށް އެއިރު މިފަދަ އުނދަގޫތައް ދިމާވީ ދަނޑުތެރެއިންނެވެ. އެއީ ސޯޝަލް މީޑިއާގެ ޒަމާނަކަށްނުވުމުން އެއިރު ކޮރެޔާގެ ކުޅުންތެރިންނަށް އަންހެން ކުދީންނާއި އެމީހުންގެ ސަޕޯޓަރުންގެ ޝުއޫރުތަކާއި ދޭން ބޭނުންވާ މެސެޖްތައް ފެނުނީ ކޮރެޔާ ކުޅޭ މެޗުތަކުގައި ދަނޑަށް ވައްދާ ބެނާތަކާއި ޕޯސްޓަރުތަކާއި ފޭސް މާސްކްތަކުގެ ސަބަބުންނެވެ. އެ ފަހަރު އާން ޖުން ހުވާންގެ ފަރި ހަރަކާތްތަކަށް ލޯބިކޮށް ކޮރެޔާގެ ކޮންމެ ސަޕޯޓަރަކު އޭނާ އަށް ބަދަލުވެގަތީ މޫނުގައި އޭނާ ސިފަކޮށްދޭ މާސްކެއް އަޅައިގެންނެވެ. މިފަހަރު ގުއި ސުން ޗޯ އަށް މި އުނދަގޫތައް ދިމާވީ ސޯޝަލް މީޑިއާ އިންނެވެ.

ކޯޗު ޕައުލޯ ބެންޓޯ ވަނީ މިދިޔަ ހަތަރު އަހަރު ތެރޭގައި ވަރަށް ގިނަ ފޯމޭޝަންތަކަށް ކުޅުވައިފަ އެވެ. އެއީ ކުރިއަށް ކުޅުވާނީ ކިތައް ކުޅުންތެރިންކަން ކަނޑައަޅަން ދަތިވެގެންނެވެ. އޭނާ އަކީ ފަހަތާއި މެދުތެރެ ބައިވެރިވެގެން އެޓޭކް ފަށަން ބޭނުންވާ ކޯޗެކެވެ. މިހެންވެ އޭނާއާ މެދު ޝައްކުކުރާ މީހުން ބުނަނީ ކޮރެޔާގެ ޒަމާންވީ އާދަކާދަ ނައްތާލާފައިވާ ކަމަށެވެ. އެއީ ކޮރެޔާގެ ފޯވަޑުންގެ ސްޕީޑާއި ވަރުގަދަކަން ބޭނުންނުކުރާ ކަމަށްބުނެ އެވެ. އާއްމުކޮށް މިފަހުން އޭނާ ކުޅުވަނީ 4-2-3-1 އަށެވެ.

ކުޅުންތެރިން ހިތްހަމަޖެހޭތަ؟

ކޮރެޔާގެ އެންމެ މޮޅު ކުޅުންތެރިއަކީ ސޮން ހުންގް މިން އެވެ. އޭނާ ގައުމީ ޓީމުގައި ވަރަށް ބުރަކޮށް މަސައްކަތްކުރަންޖެހޭތީވެ އެކަމާ މައްސަލަ ޖައްސައެވެ. ސޮން ޖައްސާ މައްސަލައަކީ ގައުމީ ޓީމުގައި އޭނާ އަށް ހާއްސަކަމެއް ނެތުމެވެ. މީގެ އިތުރުން ޓީމުގެ ޑިފެންޑަރުން މުޅިން ފިޓްނުވުމުގެ މައްސަލަ ވެސް ބޮޑެވެ. މިހެންވެ ކޮރެޔާއިން ގަތަރުގައި ކުރާނީ ކޮންކަމެއްތޯ ބަލަން އިންތިޒާރުކުރަންޖެހޭނެ އެވެ.