ފުލުހަކު ބިދޭސީއެއް އަތުން ފޭރެން އުޅުނުކަމަށް ބުނެ ކުރި ދައުވާ ހެކި ނެތުމުން ސާބިތެއް ނުވި

ފުލުހަކު ބިދޭސީއެއް އަތުން ފޭރެން އުޅުނުކަމަށް ބުނެ ކޮށްފައިވާ ދައުވާއާ ގުޅިގެން އެކަށީގެންވާ ހެކި ނެތުމުން، އެ މައްސަލަ ސާބިތުނުވާކަމަށް ކްރިމިނަލް ކޯޓުން ޙުކުމް ކޮށްފިއެވެ.

މިއީ 2019 ވަނަ އަހަރު ހިނގި ޙާދިސާއަކާއި ގުޅޭ މައްސަލައެކެވެ. އެގޮތުން މި މައްސަލައިގައި ފުލުސް އޮފިސަރަށް ދައުވާ ކޮށްފައިވަނީ ހަށިވިއްކުމުގެ މައްސަަލައަކާއި ގުޅިގެން ބަންގްލަދޭޝްގެ ރައްޔިތެއް ހައްޔަރުކޮށް، އޭނާގެ އަތުން އެ ފުލުސް އޮފިސަރު ފޭރެން އުޅުނުކަމަށް ތުހުމަތުކޮށް ހިންގި ތަހުގީގަށްފަހުއެވެ.

މި މައްސަލައިގައި އުފުލާފައިވާ ދައުވާގައި ބުނެފައިވަނީ ބިދޭސީ މީހާ ހައްޔަރުކޮށް ބަލައި ފާސްކޮށްފައިވަނީ ބަލައި ފާސް ކުރުމާއި، ހައްޔަރު ކުރުމުގެ އިޖުރާއަތާ ޚިލާފަށް ކަމަށެވެ.

އަދި އަތޮޅުވެއްސަށް ގެންގޮސް، ބިދޭސީ މީހާ ހުރީ ޤާނޫނާ އެއްގޮތަށް ހައްޔަރު ކޮށްފައި ނޫންކަން އެނގިހުރެމެ، ބަންދުން ދޫކޮށްލުމުގެ ބަދަލެއްގެ ގޮތުން އެއްލައްކަ ރުފިޔާ ހޯދަން ޑިމާންޑުކޮށް، އެވަރު ނެތުމުން، 10،000 ރުފިޔާ ހޯދާފައިވާކަމަށް ދައުވާގައި ބުނެއެވެ.

ދައުވާގައި ބުނެފައިވަނީ ބިދޭސީ މީހާއަތުން 10،000 ރުފިޔާ ފޭރުމަށްފަހު، އޭނާ އަތުން އިތުރު 20،000 ރުފިޔާ ހޯދުމަށްޓަކައި މަޖުބޫރުކޮށްފައިވާ ކަމަށެވެ.

ބިދޭސީ މީހާ ދޫކޮށްލީވެސް އޭނާ ފައިސާ ދޭން އެއްބަސްވުމުންކަމަށްވެއެވެ. އަދި ދޫކޮށްލުމަށްފަހުވެސް އޭނާ އަތުން 20،000 ރުފިޔާ ފޭރެން އުޅެފައިވާކަމަށް ދައުލަތުން ހުށައަޅާފައިވާ ދައުވާގައި ވަނީ ބުނެފައެވެ. އެގޮތުން ބަންދުން ދޫކޮށްލުމަށްފަހު، ފަހުން ވަޓްސްއަޕް މެދުވެރިކޮށް ފުލުސް އޮފިސަރު ވަނީ ފައިސާ ހިފައިގެން އައުމަށް ބިދޭސީ މީހާއަށް އަންގާފައެވެ.

އެހެންނަމަވެސް، އެ ބިދޭސީ މީހާ އެކަން ފުލުހުންނަށް ރިޕޯޓުކޮށް، އެތަނަށް ދިޔައީ ކުލަ ހެދުމުގައި ތިބި ފުލުސް އޮފިސަރުންނާއެކުގައެވެ.

ވުމާއެކު، މި މައްސަލައާ ގުޅިގެން ދައުލަތުން އޭނާގެ މައްޗަށް ކުރީ ފޭރެން އުޅުމުގެ ކުށުގެ ދައުވާއެވެ. އެ ދައުވާއާއި ގުޅިގެން ދައުލަތުން ހުށައެޅި މައިގަނޑު ހެއްކަކީ ބިދޭސީ މީހާއެވެ.

އެހެންނަމަވެސް، އޭނާގެ ހެކިބަސް ނެގުމަށް ކޯޓު އަމުރު ރައްދު ކުރުމަށް މަސައްކަތް ކުރުމުން، އޭނާއަކީ މިހާރު ރާއްޖޭގައި އުޅޭ ފަރާތެއް ނޫންކަމަށް ދައުލަތުން ވަނީ ޝަރީއަތުގައި ބުނެފައެވެ. ވުމާއެކު އެ ބިދޭސީ މީހާގެ ހެކިބަސް ނެގިފައެއް ނުވެއެވެ.

ޝަރީއަތުން ބުނެފައިވަނީ، ހެކިބަސް ދިނުމަށް ބިދޭސީ މީހާ ނައުމުން އަމިއްލަ ދިފާއުގައި މަސައްކަތް ކުރުމުގެ ޙައްޤު ފުލުސް އޮފިސަރަށް ގެއްލިގެންދާ ކަމަށެވެ.

ވަކިން ޚާއްސަކޮށް، މި މައްސަލައިގެ ކުށުގެ އަމަލުގެ ޝިކާރައަކަށްވި ފަރާތުގެ ބަހެއް ނެތި ޝަރީއަތް ކުރުމަކީ ތަބީއީ އިންސާފުގެ އުސޫލުތަކާ ޚިލާފު ކަމެއްކަންވެސް ޝަރީއަތުން ވަނީ ފާހަގަކޮށްފައެވެ.

އޭގެ އިތުރުން، ތަހުގީގުގައި ބިދޭސީ މީހާގެ ބަޔާން ފުލުހުން ނަގާފައިވަނީ ބަންގްލަދޭޝް ބަސް އެނގޭ ތަރުޖަމާނެއްގެ ހާޒިރުގައި ނޫންކަންވެސް ޝަރީއަތުން ވަނީ ފާހަގަކޮށްފައެވެ.

ޝަރީއަތުން އިތުރަށް ފާހަގަކޮށްފައިވާ ގޮތުގައި މި މައްސަލައާ ގުޅިގެން ސީންއަށް ދިޔަ ފުލުހުންގެ ހެކިބަސްތަކުގައިވެސް ތަފާތުތަކެއް އެބަހުއްޓެވެ. އެގޮތުން އެކަކު ބުނެފައިވަނީ ބިދޭސީ މީހާ ގޮވައިގެން ފުލުސް އޮފިސަރު ދިޔަތަން ފެނުނު ކަމަށެވެ. ދެން ހުރި އޮފިސަރު ބުނެފައިވަނީ ބިދޭސީ މީހާ ފައިސާ ދިއްކުރި މަންޒަރު ފެނުނު ކަމަށެވެ. އެހެން އޮފިސަރެއް ބުނެފައިވަނީ އެއްޗެއް ދިއްކުރި މަންޒަރު ފެނުނު ކަމަށެވެ. ނަމަވެސް އެއީ ފައިސާކަމެއް ސާފުކޮށް ބަޔާނެއް ނުކުރެއެވެ. އެހެން އޮފިސަރެއް ބުނެފައިވަނީ އެއްވެސް ބާވަތެއްގެ ފައިސާގެ މުއާމަލާތެއް ހިންގި ތަން ނުފެންނަ ކަމަށެވެ.

ވުމާއެކު، ހެކިންގެ ހެކިބަހުގައިވެސް ފުށުއެރުންތައް ހުރިކަން ޝަރީއަތުން ވަނީ ފާހަގަކޮށްފައެވެ.

ކަންއެހެން ހުރުމާއެކު، މި މައްސަލަ ބެއްލެވި ގާޒީ އިސްމާއިލް ޝަފީއު ވަނީ، އެކަށީގެންވާ ހެކި ޝަރީއަތަށް ލިބިފައިނުވާކަމަށް ބަޔާން ކުރައްވައި، މި މައްސަލައިގައި އުފުލާފައިވާ ދައުވާ ސާބިތުނުވާކަމަށް ޙުކުމް ކުރައްވާފައެވެ.