ނިއުކްލިއަރ ހަތިޔާރުގެ ބާރުވެރިން އަސްކަރީ ކުރިމަތިލުމަކަށް ގޮސްގެން ނުވާނެ: ރަޝިއާ

ބޭނުންކުރަނީ އާދައިގެ އަސްކަރީ ހަތިޔާރު ކަމުގައި ވީނަމަވެސް، ނިއުކްލިއަރ ހަތިޔާރުގެ ބާރުވެރިކަން ލިބިފައިވާ ގައުމުތަކުން އަސްކަރީ ކުރިމަތިލުމަކަށް ނުގޮސް ވާނެ ހުރިހާ ގޮތެއް ބެލުން މުހިންމުކަމަށް ރަޝިއާގެ ފޮރިން މިނިސްޓަރު، ސަރްގޭއި ލަވްރޯފް ވިދާޅުވެއްޖެއެވެ.

ލަވްރޯފް މި މޭރުމުން ވާހަކަފުޅުދައްކަވާފައި ވަނީ، ރަޝިއާގެ ރިޔާސީ ކުރިމަގާ ބެހޭގޮތުން ަިލްމީ ފެންވަރުގައި ކުރިއަށްގެންދިޔަ ޕްރޮގްރާމެއްގައި، ނޮވެމްބަރު 30 ވަނަ ދުވަހު ތަގުރީރުކުރައްވަމުންނެވެ. ލަވްރޯފްގެ ބަޔާން ޝާއިއުކޮށްފައި ވަނީ ރަޝިއާގެ ފޮރިން މިނިސްޓްރީގެ ވެބްސައިޓްގައެވެ.

ފެބުރުއަރީ މަހުގެ 24 ވަނަ ދުވަހު، ރަޝިއާގެ އަސްކަރިއްޔާއިން، ޚާއްސަ އޮޕަރޭޝަނެއްގެ ނަމުގައި ޔޫކްރައިންއަށް އެރި ފަހުން، ރަޝިއާގެ ރައީސް ވްލޭޑްމިއަރ ޕޫޓިން ވަނީ ނިއުކްލިއަރ ހަތިޔާރުގެ ބޭނުންކުރަން ޖެހިދާނެކަމުގެ ނުސީދާ އިންޒާރުތަކެއް ތަކުރާރުކޮށް ދެއްވާފައެވެ. ނަމަވެސް ޔޫކްރެއިން ހަނގުރާމާގައި ރަޝިއާއިން ނިއުކްލިއަރ ހަތިޔާރު ބޭނުންކުރުމަށް ރާވަމުންދާކަމުގެ ތުހުމަތުތަކަށް، ރަޝިއާގެ އިސް އޮފިޝަލުންތަކެއް ވަނީ އިންކާރު ކުރައްވާފައެވެ. އަދި ނިއުކްލިއަރ ހަނގުރާމައެއްގެ ހޫނު ކައްކަމުން ދަނީ ހުޅަނަގުން ކަމަށް ވަނީ ތުހުމަތު ކުރައްވާފައެވެ.

އެމެރިކާ އިސްވެ އޮވެ، ހުޅަނގުގެ ގައުމުތަކުން ދަނީ، ރަޝިއާއާ ދެކޮޅަށް ހަނގުރާމަކުރުމަށް، ތާރީޚު ދެކެފައި ނުވާ ދަރަޖައަށް، ޔޫކްރެއިނަށް އަސްކަރީ އެހީ ފޯރުކޮށްދެމުންނެވެ. މިކަމުގެ ސަބަބުން، ހަނގުރާމައިގެ ބައިވެރިއަކަށް ނޭޓޯ ވެފައިވާކަމަށް ރަޝިއާ ސަރުކާރުން މީގެ ކުރިން ވަނީ ބުނެފައެވެ. ނަމަވެސް ދެ ފަރާތުންވެސް ދަނީ، ސީދާ ކުރިމަތިލުމަކަށް ނުދިއުން މުހިންމު ކަމަށް ބުނާ ބުނުމަށް ބާރު ލަމުންނެވެ.

ޔޫކްރެއިނަކީ ނޭޓޯގެ މެންބަރެއްނޫނެވެ. ނަމަވެސް، އެ ގައުމުން ދަނީ ނޭޓޯގެ މެންބަރަކަށް ވުމަށް މަސައްކަތްތަކެއް ކުރަމުންނެވެ. ނޭޓޯއަކީ އުތުރު އެޓްލާންޓިކް ގައުމުތަކުގެ އަސްކަރީ އިއްތިހާދެވެ. ފެބުރުއަރީ 24 ވަނަ ދުވަހު ރަޝިއާއިން ޔޫކްރެއިނަށް އެރި މައިގަނޑު ސަބަބުތަކުގެ ތެރޭގައިވެސް، ޔޫކްރެއިނުން ނޭޓޯގެ މެންބަރުކަން ހޯދަން އުޅުން ހިމެނެއެވެ.