ސްރީލަންކާގެ މަސްބޯޓުތަކެއް ކޯސްޓުގާޑުގެ ބެލުމުގެ ދަށަށް ގެންގޮސްފި
3 މަސްބޯޓެއް އަތުލައިގަނެފައިވޭ
ސްރީލަންކާގެ މަސް ބޯޓުތައް
ރާއްޖޭގެ އިގްތިސާދީ ސަރަހައްދުން ގަވާއިދާ ޚިލާފަށް މަސްވެރިކަން ކުރަމުންދިޔަ ސްރީލަންކާގެ މަސްބޯޓުތަކެއް އެމްއެންޑީއެފް ކޯސްޓްގާޑުގެ ބެލުމުގެ ދަށަށް ގެންގޮސްފިއެވެ.
އެމްއެންޑީއެފުން ބުނީ ރާއްޖޭގެ ކަނޑުގެ ސަރަޙައްދުގައި ޤާނޫނާ ޚިލާފަށް މަސްވެރިކަން ކުރަމުންދަނިކޮށް އަތުލައިގަނެފައިވަނީ ސްރީލަންކާގެ 3 މަސްބޯޓެއް ކަމަށެވެ. މި ތިން ބޯޓު އެމްއެންޑީއެފް ކޯސްޓްގާޑް ޝިޕް ޣާޒީގެ ބެލުމުގެ ދަށަށް ގެންގޮސްފައިވާކަމަށް އެމްއެންޑީއެފުން ބުނެފައިވެއެވެ.
މީގެ ދެ ހަފްތާ ކުރިންވެސް އެމްއެންޑީއެފުން ވަނީ ގަވާއިދާ ޚިލާފަށް ރާއްޖެ ސަރަހައްދުގައި މަސްވެރިކަން ކުރަމުންދިޔަ ބޭރުގެ މަސް ބޯޓެއް އަތުލައިގެންފައެވެ. މީގެ އިތުރުންވެސް އެމްއެންޑީއެފުން ވަނީ ގިނަ އަދަދަކަށް މިފަދަ މަސްބޯޓުތައް އަތުލައިގެންފައެވެ.
އެމްއެންޑީއެފުން ގެންދަނީ މިގޮތަށް އަތުލައިގަންނަ ފަރާތްތައް ފުލުހުންނާ ހަވާލުކުރަމުންނެވެ. އަދި ފިޝަރީޒް މިނިސްޓްރީން އެމީހުން ޖޫރިމަނާކުރެއެވެ.
