ދެމެހެއްޓެނިވިގޮތެއްގައި ލޯކަލް ޓޫރިޒަމް ކުރިއެރުވުމުގައި ދިމާވާ އެންމެ ބޮޑު އެއް ގޮންޖެހުމަކީ މިކަމަށް ބޭނުންވާ ފައިނޭންސް ހޯދުމަށް ދިމާވާ ގޮންޖެހުން ކަމަށް ޔޫއެންޑީޕީ މޯލްޑިވްސްގެ ޑެޕިއުޓީ ރެޒިޑެންސް ރިޕްރެޒެންޓޭޓިވް ވީރާ ހަކީމް ވިދާޅުވެއްޖެއެވެ.
ވީރާ މިފަދައިން ވިދާޅުވީ އިންޓަރނޭޝަނަލް މޯލްޑިވްސް ޓްރެވަލް މާކެޓުން ބާއްވާ ސަސްޓެއިނަބަލް ޓޫރިޒަމް ފޯރަމްގެ 3 ވަނަ އެޑިޝަން ފެށުމުގެ ރަސްމިއްޔާތުގައި ބައިވެރިވެވަޑައިގެން ވާހަކަދައްކަވަމުންނެވެ.
ވީރާ ވިދާޅުވީ ދެމެހެއްޓެނިވިގޮތެއްގައި ފަތުރުވެރިކަން ކުރިއެރުވުމަށް ތަމްރީނު ލިބިފައިވާ ދިވެހި މަސައްކަތްތެރިން ބިނާކުރުން މުހިންމު ކަމަށެވެ. އަދި ލޯކަލް ޓޫރިޒަމްގެ ތެރެއިން ތިމާވެއްޓަށް ގެއްލުންނުވާނެފަދަ އީޖާދުތައް ތައާރަފުކޮށް، ސަގާފަތް ދަމަހައްޓާ، ފަތުރުވެރިކަން ކުރިއަރުވާނެ ގޮތްތައް ޕްލޭން ކުރުން މުހިންމު ކަމަށް ވިދާޅުވި އެވެ.
އެހެންނަމަވެސް މިކަން މިގޮތަށް ކުރުމަށް ލޯކަލް ކައުންސިލްތަކާއި، ކުދި އަދި މެދު ފަންތީގެ ވިޔަފާރިތަކަށާއި، އަމިއްލަ ފަރުދުންނަށް ދިމާވާ އެންމެ ބޮޑު ގޮންޖެހުމަކީ ފައިނޭންސް ހޯދުމަށް ދިމާވާ ގޮންޖެހުން ކަމަށް އޭނާ ވިދާޅުވިއެވެ.
ވީރާ ވިދާޅުވީ ރާއްޖޭގެ ފަތުރުވެރިކަން ރަނގަޅަށް މެނޭޖުކޮށްފިނަމަ ރަނގަޅު ނަތީޖާތަކެއް ނިކުންނާނެ ކަމަށެވެ. މިގޮތުން މި މަސައްކަތަށް ކާބަން އެމިޝަންގައި ފަތުރުވެރިކަމުގެ ހިއްސާއޮތް މިންވަރު މަދުކުރުމާއި، ތިމާވެއްޓަށް ލިބޭ ގެއްލުންތައް ކުޑަކުރުމާއި، އިކޮނޮމިކް އިންއީކުއާލިޓީ ނުވަތަ މާލީ ފުދުންތެރިކަމުގެ ފަރަގު ކުޑަ ކުރަންޖެހޭކަން އޭނާ ފާހަގަކުރެއްވިއެވެ.
ރާއްޖެއަކީ ފަތުރުވެރިކަމަށް ކިހާ މިންވަރަކަށް ބަރޯސާވާ ގައުމެއްކަން ޕެންޑަމިކުން ދައްކައިދީފައިވާކަމަށް ވީރާ ވިދާޅުވިއެވެ. އަދި މިފަދަ ހާލަތްތަތަކަށް ތައްޔާރުވާންޖެހިފައިވާ މިންވަރު ހާމަވިކަމަށާ މިފަދަ ފޯރަމްތައް މެދުވެރިކޮށް ކުރެވޭ މަޝްވަރާތަކުގެ އަލީގައި މިފަދަ ކަންކަމާ ގުޅިގެން މަޝްވަރާކޮށް ނިންމުންތައް ނިންމުން މުހިންމު ކަމަށް ވިދާޅުވިއެވެ. އަދި މިއަދު ނިންމާ ނިންމުންތަކަކީ ކުރިމަގު ކަނޑައެޅިގެންދާ ނިންމުންތަކަކަށްވާންޖެހޭނެ ކަމަށް ވީރާ ވިދާޅުވިއެވެ.