ސްމާޓް ސިޓީއެއްގެ ފުރަތަމަ މަގްސަދަކަށް ވާންވީ ޑިޖިޓަލައިޒްކުރުން: ދިރާގުގެ ސީއީއޯ
ޖިޓަލައިޒްކޮށްގެން ރައްޔިތުންނަށްދޭ ޚިދުމަތްތައް އަވަސްކުރުމުގެ އިތުރުން، އިންކްލޫސިވް އެންމެންނަށް ބޭނުން ކުރެވޭ ޚިދުމަތެއް ޤާއިމްކޮށްދެވިދާނެ
"ސްމާޓްކޮމް" އިން ޑިޖިޓަލް ޕްލެޓްފޯމްތަކަށް ހާއްސަކޮށްގެން ބާއްވާ ސްމާޓްކޮމް ފެއާ ހުޅުވުން
ސްމާޓް ސިޓީއެއްގެ ފުރަތަމަ މަގްސަދަކަށް ވާންވީ ޑިޖިޓަލައިޒްކުރުން ކަމަށް ދިރާގުގެ ސީއީއޯ އަދި މެނޭޖިންގ ޑިރެކްޓަރ އިސްމާއިލް ރަޝީދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ސްމާޓް ސިޓީ ބްރޭންޑް, "ސްމާޓްކޮމް" އިން ޑިޖިޓަލް ޕްލެޓްފޯމްތަކަށް އަމާޒުކޮށްގެން ބާއްވާ "ސްމާޓްކޮމް ފެއާ"ގައި ވާހަކަދައްކަވަމުންނެވެ. އޭނާ ވިދާޅުވީ ޑިޖިޓަލައިޒްކޮށްގެން ރައްޔިތުންނަށްދޭ ޚިދުމަތްތައް އަވަސްކުރުމުގެ އިތުރުން، އިންކްލޫސިވް، އެންމެންނަށް ބޭނުން ކުރެވޭ ޚިދުމަތެއް ޤާއިމްކޮށްދެވިދާނެ ކަަމަށެވެ. ދެމެހެއްޓެނެވި އަދި ޚަރަދު ކުޑަ ގޮތަކަށް އެ މަސައްކަތްކުރުން މުހިންމު ކަމަށް ވެސް އޭނާ ވަނީ ފާހަގަކުރައްވާފައެވެ.
މީގެ އިތުރުން ދިރާގުން އަބަދުވެސް، ޒަމާނީ ޚިދުމަތްތައް ރާއްޖެ އަށް ތައާރަފްކުރުމަށް އިސްކަންދެއްވާ ކަަމަށް އޭނަ ވަނީ ފާހަގަކުރައްވާފައެވެ. ރައްޔިތުންނަށް ލިބޭ ޚިދުމަތްތައް ފަސޭހަކަމާއި އެކު ފޯރުކޮށްދިނުމަށްޓަކާ އެންމެން އެކުލެވިފައިވާ ނިޒާމެއް އެކުލެވާލުމަކީ މުޖުތަމައުގެ ގުޅުން ބަދަހިކުރުމަށް ވެސް މުހިންމު ކަމެއް ކަމަށް އޭނާ ވަނީ ވިދާޅުވެފައެވެ. ހަމައެހެންމެ ދިރާގަކީ ރާއްޖޭގައި ޑިޖިޓަލައިޒޭޝަން އަށް މަގުފަހިކޮށްދިނުމުގައި މުހިންމު ބައިވެރިއެއް ކަމަށާ ރާއްޖެ ޑިޖިޓަލްކުރުމުގައި އެންމެ މުހިންމު ދައުރެއް އަދާކުރާ އެއް ބަޔަކީ ދިރާގު ކަމަށް އޭނާ ވަނީ ފާހަގަކުރައްވާފައެވެ. ޑިޖިޓަލައިޒް ކުރެވިފައިވާ ރާއްޖެ އަކަށް ވާސިލްވުމަށް ބޭނުންވާ ވަސީލަތްތައް ޤާއިމްކުރުމަށް ދިރާގުން ކެނޑިނޭޅި މަސައްކަތްކުރަމުންދާ ކަމަށް ވެސް އޭނާ ވަނީ ވިދާޅުވެފައެވެ.
އިސްމާއީލް ރަޝީދު ވަނީ ސްމާޓް ސިޓީއެއްގެ ސަބަބުން ރައްޔިތުންނަށް ލިބިދޭ އެކި ހިދުމަތްތައް ލިބުމުގައި ފަސޭހަތައް ވެގެންދާ ކަމަށް ވިދާޅުވެފައެވެ. އަދި ދިރާގުން އަބަދުވެސް ރާއްޖެ ޑިޖިޓަލް ތަނަކަށް ހެދުމަށް މަސައްކަތްކުރާކަން ފާހަގަކުރައްވާފައި ވެއެވެ. އެގޮތުން ރާއްޖޭ 86 އިންސައްތަ ރަށްތަކަށް ފައިބަރ ބްރޯޑްބޭންޑްގެ ހިދުމަށް ދިރާގުން ފޯރުކޮށްދީފައިވާކަމަށް އޭނާ ވިދާޅުވިއެވެ.
