މިއަހަރު ނިމުމުގެ ކުރިން ބަސް ސްޓޮޕްތައް ހިޔާކޮށް ނިންމާލުމަށް މަސައްކަތްކުރަނީ
3 ޑިސެމްބަރު 2022 | ހޮނިހިރު 01:39މާލޭގެ މަގުތަކަކަކީ ހަނި މަގުތަކަކަށްވާއިރު ދުއްވާ އެއްޗިއްސާއި ހިނގާ މީހުންނަށް ދަތިނުވާގޮތަށް ބަސް ސްޓޮޕްތައް ހިޔާކުރުމުގައި ގިނަ ގޮންޖެހުންތަކާއި ކުރިމަތިވޭ
ބަސް ސްޓޮޕް ހިޔާކުރުމުގެ މަސައްކަތްކުރަނީ
މިއަހަރު ނިމުމުގެ ކުރިން ހުރިހާ ބަސް ސްޓޮޕްތައް ހިޔާކޮށް ނިންމުމަށް މަސައްކަތްކުރަމުންދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ސީއީއޯ އާދަމް އާޒިމް ވިދާޅުވެއްޖެއެވެ.
މާލޭގައި މިނީ ބަހުގެ ޚިދުމަތް ދެމުން އަންނަނީ ތިން ރޫޓަކުންނެވެ. މިރޫޓްތަކުގައި ޖުމްލަ 42 ބަސް ސްޓޮޕް ހުރެއެވެ. ބަސް ސްޓޮޕްތައް ހިޔާކުރުމުގެ މަސައްކަތް ފަށާފައިވާއިރު އެކަމާއި ގުޅޭގޮތުން ވާހަކަދައްކަވަމުން ރާއްޖެޓީވީގެ "ފަލަސުރުޚީ" ޕްރޮގްރާމްގައި އާޒިމް ވިދާޅުވީ ބަސް ސްޓޮޕްތައް ހިޔާކުރުމުގައި ގޮންޖެހުންތަކެއް އެބަހުރިކަމަށެވެ. މާލޭގެ މަގުތަކަކަކީ ހަނި މަގުތަކަކަށްވާއިރު ދުއްވާ އެއްޗިއްސާއި ހިނގާ މީހުންނަށް ދަތިނުވާގޮތަށް ބަސް ސްޓޮޕްތައް ހިޔާކުރުމުގައި ގިނަ ގޮންޖެހުންތަކާއި ކުރިމަތިވާކަމަށް އާޒިމް ވިދާޅުވިއެވެ.
އެހެންކަމުން އެންމެންނަށްވެސް ދަތިނުވާނެ ގޮތަށް ބަސް ސްޓޮޕްގައި ހުންނަ މީހާ އަށް އެންމެ ރަނގަޅަށް ހިޔާކޮށްދިނުމަށް މަސައްކަތްކުރައްވަމުން ގެންދަވާކަމަށް އާޒިމް ވިދާޅުވިއެވެ.
އާޒިމް ވިދާޅުވީ މިކަންކުރަމުންދަނީ ސިޓީ ކައުންސިލާއި ޓްރާންސްޕޯޓް މިނިސްޓްރީ އާ އެމްޓީސީސީ ގުޅިގެންކަމަށެވެ. ބަސް ސްޓޮޕްތައް ހުރިހާ ރައްޔިތުންނަށް ފަސޭހަވާނެ ގޮތަށް ހިޔާކުރުމާއި ގުޅޭގޮތުން އާންމުންވެސް ޚިޔާލުތައް ދެމުންދާންވީކަމަށާއި އެއީ ކުރެވޭނެ ކަމެއްކަމަށްވާނަމަ އެގޮތަކަށް ބަސް ސްޓޮޕްތައް ހިޔާކުރާނެކަމަށް އާޒިމް ވިދާޅުވިއެވެ. ބަސް ސްޓޮޕް ހިޔާކުރަން ބޭނުންވާ ސާމާނު އެމްޓީސީސީން ދިނުމުން އެކަން ކުރަމުން އަންނަނީ ސިޓީ ކައުންސިލުންނެވެ.
ސެޕްޓެމްބަރު މަހުގެ 5 ވަނަ ދުވަހުން ފެށިގެން މާލޭގައި މިނީ ބަހުގެ ޚިދުމަތް ދެމުން އަންނައިރު ދުވާލަކު 4500 އާއި 5000 އާ ދެމެދުގެ މީހުން އަންނަނީ މިނީ ބަހުގައި ދަތުރުކުރަމުންނެވެ.
