ކ. ކުޑަގިރިއަށް ފެރީ ދަތުރުކޮށްދޭނެ ފަރާތެއް ހޯދަން އިއުލާނުކޮށްފިއެވެ.

މާލެ ސަރަހައްދުގައި ދިރިއުޅޭ މީހުން ދަތުރު ދިޔުމަށް ޚާއްސަ ރަށެއްގެ ގޮތުގައި ކުޑަގިރި ގެންދަނީ ތަރައްޤީކުރަމުންނެވެ. މާލެއާއި ކުޑަގިރިއާ ދެމެދު ފެރީ ދަތުރުތައް ބޭއްވުމަށް މިކަން ކޮށްދޭނެ ބަޔަކު ހޯދަން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އިން ވަނީ އިއުލާނުކޮށްފައެވެ.

އެޗްޑީސީން ކޮށްފައިވާ އިއުލާނުގައިވާގޮތުން ކޮންމެ ދުވަހަކު ބާއްވާ މި ދަތުރުތަކަށް 4 ފެރީ ބޭނުންވެއެވެ. މީގެ ތެރެއިން 2 ފެރީ ވާންޖެހޭނީ 50 އާއި 70 މީހުންނާ ދެމެދުގެ ޖާގައިގެ ފެރީއަކަށެވެ. އަދި 80 އާއި 100 މީހުންނާ ދެމެދުގެ ޖާގައިގެ 2 ފެރީ އޮންނަންޖެހޭނެ ކަމަށް އެޗްޑީސީން ބުނެފައިވެއެވެ.

އެޗްޑީސީން ވަނީ ފެރީ ދަތުރުތައް އޮންނާނެ ގޮތުގެ ތާވަލެއް އެކުލަވާލައި އާންމުކޮށްފައެވެ. އެގޮތުން ހެނދުނު 6:30 އިން 7:10 އަށް މަލެއިން ކުޑަގިރިއަށް 3 ދަތުރު އޮވެއެވެ. އަދި ހަވީރު 5:20 އިން 6:00 އަށް ކުޑަގިރިން މާލެއަށް 3 ދަތުރެއް އޮންނާނެ ކަމަށް ތާވަލުގައިވެއެވެ. އެޗްޑީސީން ބުނީ ކަންކަން ނިންމާ މަރުހަލާގައި މި ތާވަލަށް ބަދަަލެއް އައުން އެކަށީގެންވާ ކަމަށެވެ.

މި ޚިދުމަތް ދިނުމަށް ގާބިލު ފަރާތްތަކުން އީމެއިލް މެދުވެރިކޮށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމަށް އެޗްޑީސީން އެދެއެވެ. އީއޯއައި ހުށަހެޅުމުގެ ސުންގަޑިއަކީ 7 ޑިސެމްބަރުވާ ބުދަ ދުވަހުގެ ހެނދުނު 11:00 އެވެ.