ތޮއްޑޫއާއި އުކުޅަހުގައި އެމްއެންޑީއެފުން ޕެރޭޑު ބާއްވަނީ

ހުކުރު އަދި ހޮނިހިރު ދުވަހު އއ. ތޮއްޑޫއާއި، އއ. އުކުޅަހުގައި ޕެރޭޑު ބާއްވަން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ނިންމައިފިއެވެ.

އެމްއެންޑީއެފުން ބުނީ މި ޕެރޭޑަކީ އއ.ތޮއްޑޫ ސްކޫލަށް 55 އަހަރު ފުރުމުގެ މުނާސަބަތުގައި، ތޮއްޑޫ ކައުންސިލުގެ އެދުމަކަށް ބާއްވާ ޕެރޭޑެއް ކަމަށެވެ.

މިގޮތުން ހުކުރު ދުވަހު ޕެރޭޑް އޮންނާނީ ތޮއްޑޫގައެވެ. ތޮއްޑޫގައި ބާއްވާ ޕެރޭޑަށްފަހު ހޮނިހިރު ދުވަހު އުކުޅަހުގައި ޕެރޭޑު ބާއްވަން ހަމަޖެހިފައިވާއިރު، މިއީ އެރަށު ކައުންސިލްގެ އެދުމުގެ މަތިން ބާއްވާ ޕެރޭޑެެއް ކަމަށް އެމްއެންޑީއެފުން ބުނެއެވެ.

މި ދެ ރަށުގައި ޕެރޭޑް ފެށުމަށް ހަމަޖެހިފައިވަނީ އެ ދުވަހެއްގެ ހަވީރު 16:30 ގައެވެ. ޕެރޭޑްގެ ތެރެއިން، އެމްއެންޑީއެފް އާޓްސް އެންޑް ސެރެމޯނިއަލް ސަރވިސްގެ މިލިޓަރީ ބޭންޑުން ރާގު ކުޅޭނެއެވެ.

ތޮއްޑުއާއި އުކުޅަހުގައި ޕެރޭޑް ކުރިއަށްގެންދާއިރު، މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީއާއި އެމްއެންޑީއެފްގެ ލީޑަރޝިޕުން އެ ދެ ރަށަށް ވަޑައިގެން، ޕެރޭޑް ބައްލަވާލެއްވުމަށް ވަނީ ހަމަޖެހިފައެވެ.