ވެރިކަމުގެ ނިޒާމް ބަދަލުކުރަން ވޯޓަށް ނާހާ ޕްރައިމަރީގެ ވާހަކަދައްކައިގެން ވާނެކަމަކަށް ގަބޫލުފުޅުނުކުރައްވާ ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

މަޖިލީހުގެ "އާސްކް ސްޕީކަރ" ޕްރޮގްރާމްގައި ވާހަކަފުޅުދައްކަވަމުން ރައީސް ނަޝީދު ވަނީ، ވެރިކަމުގެ ނިޒާމް ބަދަލުކުރުމަކީ އެމްޑީޕީން 2018 ވަނަ އަހަރު ވެފައިވާ ރިޔާސީ ވައުދެއްކަމަށާއި އެ ވައުދު ފުއްދަންވާނެކަން ފާހަގަކުރައްވާފައެވެ. އަދި ސަރުކާރު ކޯލިޝަންގެ އެހެން ޕާޓީތަކުންވެސް އޭރު ވެރިކަމުގެ ނިޒާމް ބަދަލުކުރަން ފެންނަ ނުފެންނަ ވޯޓެއް ނަގަން އެއްބަސްވެފައިވާ ކަމަށް ރައީސް ނަޝީދު ވިދާޅުވިއެވެ. އެހެންކަމުން ޕްރައިމަރީގެ ވާހަކަދައްކަންވާނީ އެ ވޯޓަށް ފަހުގައި ކަމަށް އެމަނިކުފާނު ވިދާޅުވިއެވެ.

އެ ޕްރޮގްރާމްގައި އާއްމު ފަރާތަކުން ވަނީ، ރައީސް ސާލިހު ވެރިކަމަށް ގެނެވުމުން ހިތާމަކުރައްވަންތޯ ސުވާލުދަންނަވާފައެވެ. އެ ސުވާލަށް ޖަވާބުދެއްވަމުން ރައީސް ނަޝީދު ވިދާޅުވީ، ރާއްޖޭގެ ދަރަނީގެ މައްސަލައާއި ޑިފޯލްޓްގެ މައްސަލައިގައި އެމަނިކުފާނު ކަންބޮޑުވެވަޑައިގަންނަވާކަމަށެވެ. އަދި ދައުލަތުގެ ރިޒަރވް މަދުވުމާއި ތަކެތީގެ އަގު ބޮޑުވުންފަދަ ކަންކަމާމެދުވެސް ކަންބޮޑުވުން ހުރިކަމަށް އެމަނިކުފާނު ވިދާޅުވިއެވެ. އެ ޕްރޮގްރާމްގައި ވާހަކަދައްކަވަމުން ރައީސް ނަޝީދު ވަނީ, ރައީސް ސާލިހުއަށް ފާޑުވިދާޅުވެފައެެވެ

އެގޮތުން ރައީސް ސާލިހު ވެރިކަމަށް ވަޑައިގެން، 2019އާ ހަމައަށް މަސައްކަތްކުރެއްވީ އެމަނިކުފާނާ ވަރަށް ގުޅިގެން ކަމަށްވެސް ރައީސް ނަޝީދު ވިދާޅުވިއެވެ. އެހެންނަމަވެސް އޭގެފަހުން މަސައްކަތްކުރެއްވީ ބާރު ޖަމާކުރުމަށާއި، 2022އާ ހަމައަށް މަސައްކަތްކުރެއްވީ އެފަދަ މޭރުމަކުންކަމަށް އެމަނިކުފާނު ވިދާޅުވިއެވެ. އެހެންނަމަވެސް އެހެން ނެޓްވޯރކެއް އުފެއްދުން އެއީ އެންމެ ރަނގަޅު ގޮތް ނޫންކަން ފަހުން ރައީސް ސާލިހުވެސް ގަބޫލުކުރައްވާ ކަމަށާއި، ޗެއަރޕަރސަންގެ އިންތިޚާބާ ހަމައިން އެކަން ސާފުވެފައިވާކަމަށް ރައީސް ނަޝީދު ވިދާޅުވިއެވެ. އަދި މިހާރު އެނބުރެވޭނެ ދިމާލެއް ނެތްކަމަށާއި މި 5 އަހަރު ދިޔައީ ހިތާމަވެރި ގޮތަކަށް ކަމަށް ނަޝީދު ވިދާޅުވިއެވެ.