އިންޑިއާއަކީ ދެމެހެއްޓެނިވިގޮތެއްގައި ރާއްޖެއާއެކު އޮތް، ތަރައްގީގެ ބައިވެރިއެއް: އަމީރު
އިންޑިއާއިން ރާއްޖެއާމެދު ބަހައްޓާ ގާތްކަން ފާހަގަކުރައްވައި، މިނިސްޓަރ ވަނީ އެކަމަށްޓަކައި އިންޑިއާގެ ބޮޑުވަޒީރު ނަރެންދްރަ މޯދީއާއި އިންޑިއާގެ ސަރުކާރަށް ޝުކުރު އަދާކުރައްވާފައި
މިނިސްޓަރ އަމީރު
އިންޑިއާއަކީ ދެމެހެއްޓެނިވި ގޮތެއްގައި ރާއްޖެއާއެކު އޮތް، ތަރައްގީގެ ބައިވެރިއެއްކަމަށް، ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ, އިންޑިއާއިން ރާއްޖެއަށް ދޭން ހަމަޖައްސާފައިވާ 100 މިލިއަން ޑޮލަރުގެ މާލީ އެހީ ދިވެހި ސަރުކާރާ ހަވާލުކުރުމަށް އަންގާރަ ދުވަހު ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި މިނިސްޓަރ އަމީރު ވިދާޅުވީ، އިންޑިއާއިން ރާއްޖެއަށް ވެދޭ އެހީތެރިކަން ރާއްޖެއިން ބަލައިގަންނަ ކަމަށެވެ. ޚާއްސަކޮށް ފާއިތުވި އަހަރުތަކުގައި އިންޑިއާއިން ރާއްޖެއަށް ފޯރުކޮށްދިން އެހީތެރިކަން އިތުރުވެފައިވާކަަމަށް އަމީރު ވިދާޅުވިއެވެ. އަދި ރާއްޖެއާއި އިންޑިއާގެ ގުޅުން މިގޮތުގައި ދެމިއޮންނާނެކަމުގެ ޔަގީންކަމާއި އިތުބާރު އޮތްކަމަށްވެސް މިނިސްޓަރު ވިދާޅުވިއެވެ. އަދި ލޯނާއި ގްރާންޓުގެ އެހީގައި ރާއްޖޭގެ އުމްރާނީ ތަރައްގީއަށް ވަރަށް ބޮޑެތި ކުރިއެރުންތައް ރާއްޖެއަށް ލިބިފައިވާކަމަށް މިިނިސްޓަރު ވިދާޅުވިއެވެ.
އެ އެހީތަކަކީ ރާއްޖެއަށް އުމްރާނީ އަދި އިގްތިސާދީ ކުރިއެރުން ގެނެސްދޭނެ ކަންކަން ކަަމަށް މިނިސްޓަރު ވިދާޅުވިއެވެ. އަދި އިގްތިސާދީ ގޮންޖެހުންތަކާއެކުވެސް ރާއްޖެއިން މަސައްކަތްކުރަމުންދަނީ ގައުމުތަކާ ގުޅިގެން އެ ގޮންޖެހުންތަކުން އަަރައިގަންނާނެ ގޮތެއް ހޯދުމަށްކަން މިނިސްޓަރު ފާހަގަކުރެއްވިއެވެ. އަދި ދަރަނި ކުޑަކޮށް އިގްތިސާދު ވަރުގަދަކުރަން ކެނޑިނޭޅި މަސައްކަތްކުރަމުންދާ ކަމަށް މިނިސްޓަރު ވަނީ ފާހަގަކުރައްވާފައެވެ. އެ މަސައްކަތުގައި އިންޑިއާއިން ރާއްޖެއަށް ވަމުންދާ އެހީތެރިކަމަކީ ބައިނަލްއަގުވާމީ ގޮތުން ރާއްޖެއަށް ދިމާވާ ގޮންޖެހުންތަކުން އަރައިގަތުމަށް ލިބޭ ހިތްވަރެއްކަމަށް މިނިސްޓަރ އަމީރު ފާހަގަކުރެއްވިއެވެ. އަދި އިންޑިއާއިން ރާއްޖެއާމެދު ބަހައްޓާ ގާތްކަން ފާހަގަކުރައްވައި، މިނިސްޓަރު ވަނީ އެކަމަށްޓަކައި އިންޑިއާގެ ބޮޑުވަޒީރު ނަރެންދްރަ މޯދީ އާއި އިންޑިއާގެ ސަރުކާރަށް ޝުކުރު އަދާކުރައްވާފައެވެ.
