ކ. މާލެ
|
29 ނޮވެންބަރ 2022 | އަންގާރަ 07:08
ނެލަދެންޑްސްގެ ކޯޗު ވެންހާލް
ނެލަދެންޑްސްގެ ކޯޗު ވެންހާލް
ރޮއިޓާސް
ފީފާ ވޯލްޑް ކަޕް
ޤަތަރު މެޗުގައި ރިސްކެއް ނަގަން ވެންހާލް ބޭނުން ނުވޭ، ފަހަށް ވިސްނަން ޖެހޭ
 
ދުނިޔޭގެ ޗެމްޕިއަނުންނަށް ވާން ކުރާ މަސައްކަތުގައި ޑިޕާއީ އަކީ ވަރަށް މުހިންމު ކުޅުންތެރިޔެއް

ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި މުބާރާތް ބާއްވާ ޤައުމު ޤަތަރާ ދެކޮޅަށް ނުކުންނައިރު އެ މެޗުގައި އެއްވެސް ރިސްކެއް ނަގަން ބޭނުންނުވާ ކަމަށް ނެދަލެންޑްސްގެ ކޯޗު ލުއިސް ވެންހާލް ބުނެފިއެވެ.

މުބާރާތުގައި ނެދަލެންޑްސް ވަނީ މިހާތަނަށް ކުޅުނު ދެ މެޗުގެ ތެރެއިން އެއް މެޗުން މޮޅުވެ، އަނެއް މެޗުން އެއްވަރުވެފައެވެ. ޤަތަރާ ދެކޮޅަށް ކުޅޭ މެޗު ކާމިޔާބުކޮށްގެން ނެދަލެންޑްސް އަށް މުބާރާތުގެ ދެ ވަނަ ބުރުން ޖާގަ ލިބޭނެއެވެ. ޤަތަރު މެޗުގެ ކުރިން އޮތް ޕްރެސްގައި ވާހަކަ ދައްކަމުން ވެންހާލް ބުނީ ޤަތަރު މެޗުގައި މެމްޕިސް ޑިޕާއި ފުރަތަމަ 11 ގައި ހިމަނާ، ރިސްކު ނަގަން ބޭނުންނުވާ ކަމަށެވެ. ވެންހާލް ބުނީ ދުނިޔޭގެ ޗެމްޕިއަނުންނަށް ވާން ނެދަލެންޑްސް އިން ކުރަމުން އަންނަ މަސައްކަތުގައި ޑިޕާއީ އަކީ ވަރަށް މުހިންމު ކުޅުންތެރިޔެއް ކަމަށެވެ. އަދި ނެދަލެންޑްސް އަދިވެސް އޮތީ ގްރޫޕް ސްޓޭޖުގައި ކަމަށާއި، ނޮކްއައުޓް ބުރަށް ދާއިރު ކޮންމެ މެޗަކީ ވެސް ވަރަށް މުހިންމު މެޗެއް ކަމަށެވެ.

މެމްޕިސް ޑިޕާއީ އާއެކި އަހަރަމެން އެއްވެސް ރިސްކެއް ނަގަން ބޭނުންނުވޭ. ސަބަބަކީ ދުނިޔޭގެ ޗެމްޕިއަނުންނަށް ވާން އަހަރަމެން ކުރާ މަސައްކަތުގައި ޑިޕާއީ އަކީ ވަރަށް މުހިންމު ކުޅުންތެރިޔެއް. އަހަރެންނަށް ކަންކަން ފެންނަނީ އެ ގޮތުގައި، އެހެންވީމާ ރަނގަޅު ކަންކަމާއެކު ކުރިއަށް އޮތް ބުރަށް ދިޔުން މުހިންމު.
ލުއިސް ވެންހާލް / ނެދަލެންޑްސްގެ ކޯޗު

މީގެ އިތުރުން ވެންހާލް ބުނީ ޤަތަރު މެޗުގެ ފުރަތަަމަ 11 ގައި ފޯވާޑް ވިންސެންޓް ޖެންސަން ހިމަނަން ނިންމީ، އޭނާ އަކީ ޓީމު ކުޅުންތެރިޔެއް ކަމަށެވެ. އޭނާ ބުނީ ވިންސެންޓް އަކީ ވަރަށް މަތީ ފަންތީގައި ކުޅޭ ކުޅުންތެރިޔެއް ކަމަށާއި، އޭނާ ހިމަނަން ޖެހުނު ސަބަބަކީ އެއީ ކަމަށެވެ. ވެންހާލް ބުނީ ވިންސެންޓް އޭނާގެ ކުލަބުގައި ވެސް ވަރަށް ގިނަ ލަނޑު ޖަހާ ކަމަށާއި، އޭނާ އަށް ޤަބޫލު ކުރެވޭ ގޮތުގައި ވިންސެންޓް އަކީ ރަނގަޅު "ޗޮއިސް"އެއް ކަމަށެވެ. އަދި ދުނިޔޭގެ ޗެމްޕިއަނުންނަށް ވާން ބޭނުންނަަމަ، އިދިކޮޅަށް ކޮންމެ ޓީމެއް ޖެހުނު ނަމަވެސް ބަލިކުރެވެން ޖެހޭ ކަމަށެވެ.

ޕްރެސްގައި ވާހަކަ ދައްކަމުން ނެދަލެންޑްސްގެ މިޑްފީލްޑަރު ފްރެންކީ ޑި ޔޯން ބުނީ އިކުއެޑޯ މެޗުގައި ޓީމުގެ ކުޅުންތެރިންނަށް ގޯސްތަކެއް ހެދުނު ކަމަށެވެ. އޭނާ ބުނީ ބޯޅަ ހިފަހައްޓައިގެން ކުޅުމުގައި ޓީމު އެ މެޗުގައި ދަށް ކަމަށެވެ. އަދި ގޯސްތަކެއް ހެދުނު ނަމަވެސް ކުރިއަށް އޮތް މެޗުގައި އެކަންކަން ރަނގަޅުވާނެ ކަމަށް ބެލެވޭ ކަމަށެވެ. ޑި ޔޯން ބުނީ ކޯޗުގެ މަސައްކަތް ވެސް ހުރީ އެމަގުން ކަމަށާއި، މެޗަށް ފޯކަސް އޮތް ކަމަށެވެ.

މުބާރާތުގެ ގްރޫޕް ސްޓޭޖުގެ ފަހު މެޗުގައި ނެދަލެންޑްސް އަދި ޤަތަރު ބައްދަލުކުރާ މެޗު ފަށާނީ އަންގާރަ ދުވަހުގެ ރޭ ރާއްޖެ ގަޑިން 20:00 ގައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
100%
0%
0%
0%
0%
0%
ކޮމެންޓް