ކޮންމެ މީހަކުވެސް ދުވާލަކު 8 ތަށިފެން ބޯން ޖެހޭކަމަށް އެކި ފަރާތްތަކުން އަބަދުވެސް ނަސޭހަތްތެރި ވެއެވެ. ނަމަވެސް ފަހުގެ ދިރާސާތަކުން ހާމަވެފައިވާ ގޮތުގައި މިއަދަދަށް ކޮންމެހެން ކޮންމެ މީހަކު ފެން ބުއިން ލާޒިމު ނުވެދާނެއެވެ.

އިނގިރޭސި ވިލާތުގެ ޓޮޕް 20، އަދި ދުނިޔޭގެ ޓޮޕް 200 ޔުނިވަރސިޓީގެ ތެރޭގައި ހިމެނޭ ޔުނިވަރސިޓީ އޮފް އެބަރޑީންގެ ސައިންސިސްޓުން ހޯދާފައިވާ ގޮތުގައި ދުވާލަކު 8 ތަށި ނުވަތަ 2 ލީޓަރު ފެނަކީ ބޯން ޖެހޭ ވަރަށް ވުރެ އިތުރު މިންވަރެކެވެ. ކާއެއްޗެތީގެ ޒަރިއްޔާއިން ވެސް ފެން ހަށިގަނޑަށް އެތެރެވާއިރު ސައިންޓިސްޓުން އަންދާޒާ ކުރާ ގޮތުގައި އެވްރެޖް މީހެއްގެ ހަށިގަނޑަށް އިތުރަށް ދެން ބޭނުންވާނީ ދުވާލަކު 1.5 ނުވަތަ 1.8 ލީޓަރުގެ ފެނެވެ.

އެބަރޑީން ޔުނިވަރސިޓީގެ ސައިންޓިސްޓުންގެ އެންމެ ފަހުގެ ހޯދުންތައް ވަނީ މި ހަފްތާގެ ސައިންސް މަޖައްލާގައި ޝާއިއުކޮށްފައެވެ.

އޭގައިވާގޮތުން ހަށިގަނޑަށް ފެން ބޭނުންވާވަރު ބެލުމަށް މީގެ ކުރިން ހެދުނު ދިރާސާތައް ހަދާފައިވަނީ މަދު އަދަދެއްގެ މީހުން ބޭނުންކޮށްގެންނެވެ. ނަމަވެސް އެބަރޑީންގެ ދިރާސާގައި 23 ތަފާތު ގައުމަކުން 5،604 މީހުންނާއި ކުދިންގެ މައުލޫމާތު އެއްކޮށްފައިވެއެވެ. މިގޮތުން އުފަންވިތާ 8 ދުވަހާ 96 އަހަރާ ދެމެދުގެ އުމުރުގެ މީހުންނާއި ކުދިންގެ މައުލޫމާތު ހޯދާފައިވެއެވެ.

ޔުނިވަރސިޓީ އޮފް އެބަރޑީންގެ ޕްރޮފެސަރ ޖޯން ސްޕީކްމަން ބީބީސީ ރޭޑިއޯގެ "ގުޑްމޯނިންގ ސްކޮޓްލަންޑް" އަށް ވިދާޅުވި ގޮތުގައި ހަށިގަނޑަށް ފެން ބޭނުންވާ ވަރުކަމަށް ފުރަތަމަ އަންދާޒާ ކުރެވުނު މިންވަރު ކަމަށްވާ 2 ލީޓަރަކީ ކުޑަ "މިސް ކެލްކިއުލޭޝަން" އެކެވެ. އޭނާ ވިދާޅުވި ގޮތުގައި ފެނުގެ ގޮތުގައި ބޯންޖެހޭނީ ކާއެއްޗެތީގެ ޒަރިއްޔާއިން ލިބޭ ފެން ހިމެނޭގޮތުން ހަށިގަނޑަށް ބޭނުންވާ ވަރަށެވެ. އޭނާ ވިދާޅުވީ ކާއެއްޗެތިން ފެން ލިބޭ މިންވަރު ބެލުމަށް ކަނީ ކިހާވަރަކަށްތޯ އަހައިގެން އެންމެ ރަނގަޅު ޖަވާބު ނުލިބޭ ކަމަށާއި އެހެނީ ކާ މިންވަރު ބުނާއިރު ވަރަށް ގިނަ ފަހަރު މީހުން ތެދު ނުބުނާ ކަމަށެވެ. އެހެން ކަމުން ކާއެއްޗަކަށް ބިނާކޮށް އިތުރަށް ބޭނުންވާ ފެނުގެ މިންވަރު "އޯވަރ އެސްޓިމޭޓް" ކުރެވޭތަން އަންނަ ކަމަށް އޭނާ ވިދާޅުވެފައިވެއެވެ.

ނަމަވެސް ސައިންޓިސްޓުން ބުނާގޮތުގައި މިހާރު ޚާއްސަ "އައިސޮޓޯޕް" ޓެކްނިކްތައް ބޭނުންކޮށްގެން އަދި އެކި ގައުމުގެ ސައިންޓިސްޓުން ގުޅިގެން މިކަމުގައި ސީދާ ޖަވާބެއް ހޯދުމަށް މަސައްކަތް ކޮށްފައިވެއެވެ. މިގޮތުން ފެން ބުއިމަށްފަހު ހަށިގަނޑުން ފެން ބޭރުވާ، ނުވަތަ ކުޑަކަމުދެވޭ އަވަސް މިނެއް ބެލުމަށް ވެސް މަސައްކަތްކޮށްފައިވެއެވެ. މިގޮތުން ޓަރންއޯވަރ މަތިނަމަ ހަށިގަނޑަށް ފެންބޭނުންވާ މިންވަރު އިތުރު ވާނެ ކަމަށް ސައިންޓިސްޓުން ބުނެފައިވެއެވެ. މިގޮތުން ހޫނު ތަންތަނުގައި އުޅޭ މީހުންނާއި އުސް ހިސާބުތަކުގައި އުޅޭ މީހުންނާއި އެތުލީޓުން، މާބަނޑު މީހުން އަދި ގާތުން ދޭ މައިން ގިނައިން ފެން ބޯން ޖެހޭކަމަށް ސައިންޓިސްޓުން ފާހަގަކުރެއެވެ.

ހަށިގަނޑުގައި ހަކަތަ ވަރުގަދަ ޒުވާނުން ވެސް ފެން ބޭރުކުރާ މިންވަރު އިތުރުކަން އެފަރާތުން ފާހަގަކުރެއެވެ. މިގޮތުން 20 އަހަރާއި 35 އަހަރާ ދެމެދުގެ ޒުވާނުން އެވްރެޖްކޮށް ދުވާލަކު 4.2 ލީޓަރު ފެން ބޭރު ކުރެއެވެ. އަދި އުމުރު މައްޗަށް ދާ ވަރަކަށް މި އަދަދަށް ބަދަލު އައިސް 90 ގެ އަހަރުތަކަށް އެޅުމުން ދުވާލަކު ފެން ބޭރު ކުރާ މިންވަރު 2.5 ލީޓަރަށް ދަށްވާކަމަށް ބުނެއެވެ.

އަންހެނުންނަށް ބަލާއިރު 20 އަހަރާއި 40 އަހަރާ ދެމެދުގެ އަންހެނުންގެ ދުވާލެއްގެ ފެނުގެ ޓަރންއޯވަރއެއްކަމަށް ރިކޯޑުކޮށްފައިވަނީ 3.3 ލީޓަރެވެ.

ޕްރޮފެސަރ ސްޕީކްމަން ވިދާޅުވި ގޮތުގައި ފެންބޭރުވާ ސީދާ މިނަށް ފެން ބޯކަށް ނުޖެހޭނެއެވެ. ވިއްސަކަށް އަހަރުގެ ޒުވާން ފިރިހެނަކު 4.2 ލީޓަރު ބޭރު ކުރިޔަސް އޭނަ ކޮންމެހެން 4.2 ލީޓަރު ފެން ބޯކަށް ނުޖެހެއެވެ. އަދި އޭނައަށް ބޭނުންވާނީ 3.6 ލީޓަރު ފެން ކަމަށް ވިދާޅުވި އެވެ. އެހެނީ ކާ، ނުވަތަ ކެވޭ ގިނަ ތަކެތީގައި ވެސް ގިނަ އަދަދަކަށް ފެން އެކުލެވޭތީ އެވެ.

ޕްރޮފެސަރ ޖޯން ސްޕީކްމަން ވިދާޅުވީ އެހެންކަމުން ކޮންމެ މީހަކަށް 8 ތަށިފެން ބޭނުންވާކަމަށް ބުނާ ބުނުން އެއީ މި ހޯދުންތަކަށް ބަލާއިރު ތެދެއް ނޫން ކަމުގައެވެ.

މައުލޫމާތު: ބީ.ބީ.ސީ ރިޕޯޓު