ސައުދީގެ ފޯވާޑް ޞާލިހުގެ މެސެޖެއް: ކުރިއަށް އަދި އޮތީ!

ފީފާ ވޯލްޑް ކަޕް ގްރޫޕް ސްޓޭޖުގެ ފުރަތަމަ މެޗުގައި ގަދަ ބާރު އާޖެންޓީނާ ބަލިކުރުމަށްފަހު ސައުދީ އަރަބިޔާގެ ޞާލިހު އަލްޝެހްރީ ވަރުގަދަ މެސެޖެއް ދީފައެވެ.

ސައުދީގެ ފުރަތަމަ މެޗުގައި އެ ޤައުމުން ވަނީ މުބާރާތުގެ ފޭވަރިޓުންގެ ތެރޭގައި ހިމެނޭ އާޖެންޓީނާ ބަލިކޮށްފައެވެ. އެއީ އެ މެޗުގައި އާޖެންޓީނާ އިން ލަނޑެއް ޖަހާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ.

އޭގެ ފަހުން ސައުދީން ކުރިއަށް ގެންދިޔަ ފަރިތަކުރުމެއްގެ ތެރެގައި އޭނާ ދިން ވީޑިއޯ މެސެޖެއްގައި ބުނީ، ކޮންމެ މެޗެއްގައި ވެސް ޕްރެޝަރު އޮންނާނެ ކަމަށާއި، އޮންނާނީ ވަކި ވަރަކަށް ކަމަށެވެ. އޭނާ ބުނީ އާޖެންޓީނާ މެޗުގައި ޕްރެޝަރު ކޮންޓްރޯލްކޮށް ސައުދީން ކުޅުނީ ރަނގަޅަށް ކަމަށެވެ. އަދި އެ މެޗު މިހާރު ނިމިއްޖެ ކަމަށާއި، ދެން އޮތީ ކުރިއަށް އޮތް މެޗަށް ތައްޔާރުވުން ކަމަށެވެ. އޭނާ ބުނީ މިހާރުގެ މަސައްކަތަކީ ޕޮލޭންޑު މެޗަށް ތައްޔާރުވުން ކަމަށާއި، މަތީ ފަންތީގައި ކުޅޭ އިރު އަބަދުވެސް ޕްރެޝަރު އޮންނާނެ ކަމަށެވެ.

އިތުރަށް އޭނާ ބުނީ ޤައުމެއްގެ ހައިސިއްޔަތުން ސައުދީން ވެސް ބޭނުންވަނީ މަތީ ފަންތީގެ ޓީމުތަކާ ދެކޮޅަށް ކުޅެން ކަމަށެވެ. އޭނާ ބުނީ ފާއިތުވި 20 އަހަރުގެ ތެރޭގައި ސައުދީ އަށް ވަރަށް މަސައްކަތް ކުރެވިއްޖެ ކަމަށާއި ވަރަށް ބުރަކޮށް މަސައްކަތްކޮށް، އޭގެ ފަހުން މި އަހަރު ޤަތަރަށް ގޮސް އެމީހުންނަށް ތާރީޚު ލިޔެވިއްޖެ ކަމަށެވެ. ނިންމާލަމުން އޭނާ ބުނީ ކުރިއަށް އަދި އޮތީ ކަމަށެވެ.

މުބާރާތުގައި ސައުދީ އަށް ދެން އޮތީ ޕޮލޭންޑާ ދެކޮޅަށް ކުޅޭ މެޗެވެ. އެ މެޗު އޮންނާނީ މި މަހުގެ 26 ވަނަ ދުވަހު ރާއްޖެ ގަޑިން 18:00 ގައެވެ.