ފެންނަމުންދަނީ ކޯލިޝަން ދެމެހެއްޓެވުމުގެ ގާބިލްކަން ރައީސްގެ ހުރިކަން - މިއުވާން
ކޯލިޝަންގެ ލީޑަރޝިޕްގައި ހިމެނޭ ބޭފުޅުންނާއެކު ރައީސް މަޝްވަރާތައްކުރައްވާ
ކޯލިޝަންގެ ލީޑަރުންނާއެކު ބޭއްވުނު ބައްދަލުވުމުގެ ތެރެއިން
ފެނިިގެންދަނީ ކޯލިޝަން ދެމެހެއްޓެވުމުގެ ގާބިލްކަން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ހުރިކަން ކަމަށް، ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
2008 ވަނަ އަހަރުން ފެށިގެން ފެހި ގާނޫނު އަސާސީއަށް އަމަލުކުރަން ފެށިފަހުން، މިހާތަނަށް ވެރިކަން ކުރަމުން އަންނަނީ ކޯލިޝަނަކާއެކުއެވެ. ނަމަވެސް، ސަރުކާރުގެ ތެރޭގައި މައްސަލަތައް ޖެހި، ވެރިކަމުގެ ކުރީކޮޅު ކޯލިޝަން ރޫޅެއެވެ. އެހެންނަމަވެސް ރައީސް ސާލިހުގެ ވެރިކަމުގެ 4 އަހަރު ނިމިގެން ދިޔައިރުވެސް ކޯލިޝަން ރޫޅޭވަރުގެ ބޮޑު މައްސަލައެއް ނުޖެހި ކޯލިޝަން ސަރުކާރު ދަނީ ކުރިއަށެވެ.
ކޯލިޝަން ލީޑަރުންނާއެކު ބައްދަލުވުންތައް ނުބާއްވަނީ ކީއްވެގެންތޯ ދެންނެވުނު ސުވާލަށް ޖަވާބު ދެއްވަމުން، ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ކޯލިޝަންގެ ލީޑަރޝިޕްގައި ހިމެނޭ ބޭފުޅުންނާއެކު ރައީސް މަޝްވަރާތައް ކުރައްވާ ކަމަށެވެ. ކަންކަމާ ގުޅޭގޮތުން ވާހަކަ ދެކެވޭކަމަށާއި، ކޯލިޝަންގެ ބައިވެރިން އަރުވަން ބޭނުންވާ ލަފާތައްވެސް ރައީސަށް އަރުވާކަމަށެވެ.
ނަމަވެސް ކޮންމެ ދުވަހަކު ރައީސް ނިންމަވާ ކޮންމެ ނިންމެވުމަކީ ކޯލިޝަންގެ ބޭފުޅުންނާއެކު މަޝްވަރާ ކުރެއްވިގެން ނިންމަވާ ނިންމެވުންތަކަކަށް ނުވެދާނެ ކަމަށާއި، އެގޮތަށް ވާކަށްވެސް ނުޖެހޭކަމަށެވެ.
މިއުވާން ވިދާޅުވީ، އެމްޑީޕީއަކީ ސިޔާސީ ކަންތައްތަކުގެ ތަޖުރިބާހުރި އަދި ރާއްޖޭގެ ސިޔާސީ ދާއިރާގައި އެންމެ ކާމިޔާބު ޕާޓީ ކަމަށެވެ. އަދި ރައީސް ނިސްބަތްވެވަޑައިގަންނަވާ މި ޕާޓީގެ އެންމެ އިސް ލީޑަރުގެ ހައިސިއްޔަތުން، ކޯލިޝަން ދެމެހެއްޓުމުގެ ގާބިލްކަން ރައީސުލްޖުމްހޫރިއްޔާގައި ހުރިކަން ފެނިވަޑައިގަންނަވާ ކަމަށެވެ.
މިއުވާން ވިދާޅުވީ މަޝްވަރާ ބައްދަލުވުންތައް، ބައްދަލުވުންތަކެއްގެ ގޮތުގައި ނުގެންދެވިނަމަވެސް މަޝްވަރާތައް ކުރައްވަމުން ގެންދަވާކަމަށެވެ.
