ވޯލްމާޓް ފިހާރައެއްގައި ބަޑިޖަހައި، 10 މީހުން މަރާލައިފި

އެމެރިކާގެ ވަރޖީނިއާ ސްޓޭޓްގެ ވޯލްމާޓް ސުޕަރމާކެޓެއްގައި ބަޑިޖަހައި، 10 މީހުން މަރާލައިފިއެވެ. މިހާދިސާގައި ބަޑިޖެހިކަމަށް ވަނީ އެފިހާރައިގެ މެނޭޖަރަކަށް ހުރި މީހާއެވެ. އެއަށްފަހު އޭނާ އަމިއްލަޔަށް ވަނީ މަރުވެފައެވެ.

މިހާދިސާގެ މާގިނަ ތަފްސީލް އަދި ހާމަނުވާކަމަށްވެއެވެ. މަރުވި މީހުންގެ އިތުރުން ބައެއް މީހުންގެ ގަޔަށް ވަޒަން އަރައި، މަރުނުވެ ސަލާމަތްވި ކަމަށްވެސް ޚަބަރުތައް ބުނެއެވެ. މިގޮތުން ފަސް މީހަކަށް ފަރުވާ ދެމުންދާކަމަށް، ހޮސްޕިޓަލާ ހަވާލާދީ ލިބޭ ޚަބަރުތައް ބުނެއެވެ.

ފުލުހުން މައުލޫމާތު ދީފައިވާ ގޮތުގައި، މިހާދިސާ ހިނގާފައިވަނީ ރޭ އެތަނުގެ ގަޑިން ދިހަގަޑި ބާރަހާއިރުއެވެ. އަދި މިގޮތަށް ބަޑިޖަހައި ބަޔަކު މަރާލުމުގެ ފަހަތުގައި ވަނީ ކޮން ސަބަބެއް ކަމެއް ނޭނގެއެވެ. މިކަމުގެ ފަހަތުގައި ބަޑިޖެހިމީހާގެ އިތުރުން އެހެން ބަޔަކު ވާކަމަށް ގަބޫލުނުކުރެވޭ ކަމަށްވެސް ފުލުހުން ބުނެފައިވެއެވެ.

ވޯލްމާޓްގެ މުވައްޒަފަކު ކިޔައިދިންގޮތުގައި، އެތަނުގެ ސްޓާފް ރޫމެއްގައި އޮތް ބައްދަލުވުމެއް ނިންމާލުމަށްފަހު މުވައްޒަފުން ނުކުންނަން އުޅެނިކޮށް ސުޕަރމާކެޓްގެ މެނޭޖަރު އެތަނަށް ވަދެ ބަޑިޖަހަން ފެށިއެވެ.