ރާއްޖެ ބަނގުރޫޓު ވާނަމަ ރައީސް އެކަން ސިއްރެއް ނުކުރައްވާނެ، އެއަށް ވުރެ ބޮޑެތި ކަންކަމާއި ކުރިމަތިލައްވައިފި: މެންބަރު ރާއި
23 ނޮވެމްބަރު 2022 | ބުދަ 05:37ރައީސް ޞާލިހު އަށް ރާއި ވަނީ ތައުރީފްކުރައްވާފައި
މަކުނުދޫ ދާއިރާގެ މެންބަރު މުޙައްމަދު ރާއި
ރާއްޖެ ބަނގުރޫޓު ވާނަމަ ރައީސް އެކަން ސިއްރުނުކުރައްވާނެ ކަމަށާއި ރައީސް އިބްރާހިމް މުހައްމަދު ޞާލިހު ވަނީ އެއަށް ވުރެ ބޮޑެތި ކަންކަމާއި ކުރިމަތިލައްވާފައި ކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ އެމްޑީޕީ މެންބަރު މުޙައްމަދު ރާއި ވިދާޅުވެއްޖެއެވެ.
މަޖިލީހުގެ ބުދަ ދުވަހުގެ ޖަލްސާގައި 2023 ވަނަ އަހަރުގެ ބަޖެޓަށް ބަހުސްކުރައްވަމުން ރާއި ވަނީ އެ ބަޖެޓަށް ތައުރީފްކުރައްވާ ވާހަކަދައްކަވާފައެވެ. އަދި ރާއްޖޭގެ އިގްތިޞާދީ ހާލަތު ގޯސްކަމަށާއި ރާއްޖޭގެ އިގްތިޞާދު އިންތިހާ އަށް ގޯސްވެ ރާއްޖެ ބަނގުރޫޓުވެދާނެ ކަމަށް ބައެއް މެންބަރުން ވިދާޅުވާތީ، އެކަމަށް ރާއީ ވަނީ ރައްދުދެއްވާފައެވެ. ސަރުކާރު ދިފާއުކުރައްވާ ވާހަކަދައްކަވަމުން ރާއި ވިދާޅުވީ ކޮވިޑް-19އިގެ ބަލިމަޑުކަމުގެ ސަބަބުން ރާއްޖެ ހިމެނޭހެން ވަރަށް ގިނަ ގައުމުތަކުގެ އިގްތިޞާދަށް ނޭދެވޭ އަސަރު ކުރި ކަމަށެވެ. ނަމަވެސް އެއްވެސް ގައުމެއްގެ ރައީސަކު އެ ގައުމެއްގެ އިގްތިޞާދީ ހާލަތު ރަނގަޅު ކަމަށް ވިދާޅުވި ގައުމެއް ރާއްޖެ ނޫނީ ދެކެވަޑައިނުގަންނަވާ ކަމަށް ވެސް ރާއި ވިދާޅުވެފައެވެ.
ރާއްޖެ ބަނގުރޫޓުވާނަމަ އެކަން އިއުލާންކުރައްވަން ރައީސް ޞާލިހު ޖެހިލުންވެވަޑައިނުގަންނަވާނެ ކަމަށް ރާއި ވިދާޅުވިއެވެ. އަދި ބައެއް މެންބަރުން ބަޖެޓަށް ބަހުސްކުރައްވާއިރު، ގެންގުޅުއްވަނީ އަމިއްލަ ރުޅިވެރިކަމާއި ނުރުހުންވުން ކަމަށް ވެސް ރާއި ވިދާޅުވިއެވެ. އަދި ބަޖެޓަށް ފާޑުވިދާޅުވާ މެންބަރުންގެ ދާއިރާތަކަށް ވެސް ގިނަ ކަންކަން މި ސަރުކާރުގެ ވެރިކަމުގައި ކޮށްދެމުންދާ ކަމަށް އޭނާ ވިދާޅުވިއެވެ.
މީގެއިތުރުން ރާއި ވަނީ މަޖިލީހުގައި މެންބަރުން ތިއްބެވި ގޮތަށް ބަލާލުމުން ރައީސް އިބްރާހިމް މުހައްމަދު ޞާލިހު އަށް މަޖިލީހުގެ ތެރެއިން ބޭނުންވާ ފުރިހަމަ އެއްބާރުލުން ލިބޭނެ ކަމުގެ ޔަގީންކަން އެބަ އޮތް ކަމަށް ވިދާޅުވެފައެވެ.
