މުސާރައިގެ ގޮތުގައި 85،000 ލިބޭއިރު މަޖިލީހަށް މެންބަރުން ވަޑައިނުގަތުމަކީ ހިތާމައެއް: ރައީސް ނަޝީދު
ބުދަ ދުވަހު މަޖިލީހުގެ ޖަލްސާ ފެށި އިރު ތަޅުމުގައި ތިއްބެވީ އެންމެ 22 މެންބަރުން
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
ރައްޔިތުންގެ މަޖިލީހުގެ މެންބަރުން މަޖިލީހުގެ ޖަލްސާއަށް ހާޒިރުވެވަޑައިނުގަންނަވާތީ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މެންބަރުންނާ މެދު ނުރުހުން ފާޅުކުރައްވައިފިއެވެ.
ބުދަ ދުވަހު މަޖިލީހުގެ ޖަލްސާ ފެށި އިރު ތަޅުމުގައި ތިއްބެވީ އެންމެ 22 މެންބަރުންނެވެ. ޖަލްސާ ފެއްޓެވުމަށް ފަހު ރިޔަސާތުގައި އިންނަވާ ދެއްކެވި ވާހަކަފުޅުގައި، ރައީސް ނަޝީދު ވަނީ މަޖިލީސް ފަށާ ރަނގަބީލު ޖެހުމަށް ފަހުގައި ވެސް މަޖިލީހަށް ހާޒިރުވި މެންބަރުންގެ އަދަދު މަދުވުމުން މަޖިިލީސް ނުފަށާ އިރުކޮޅަކު މަޑުކޮށްފައިވާކަން ފާހަގަކުރައްވާފައެވެ. މަޖިލީހުގައި 85 މެންބަރުން ތިއްބެވި އިރު އެ ހުރިހާ މެންބަރުންނަކީ ވެސް ބޮޑު މުސާރަ ލިބިވަޑައިގަންނަވާ ބޭފުޅުން ކަމަށާއި މަޖިލީހަށް ވަޑައިނުގަތުމަކީ ހިތާމައެއް ކަމަށް އެމަނިކުފާނު ވިދާޅުވިއެވެ. އަދި މެންބަރުން އިންތިޚާބުކުރައްވާފައި ވަނީ ރައްޔިތުންގެ ވަކީލުންގެ ގޮތުގައި ކަމަށް ވެސް ރައީސް ނަޝީދު ވިދާޅުވިއެވެ.
ރައްޔިތުންގެ މަޖިލީހުގައި ބުދަ ދުވަހުގެ ޖަލްސާ އަށް އެޖެންޑާކޮށްފައި އޮތީ 2023 ވަނަ އަަހަރުގެ ބަޖެޓް ދިރާސާކުރި ކޮމިޓީ އިން، ބަޖެޓު ދިރާސާކޮށް ނިންމިގޮތުގެ ރިޕޯޓަށް ބަހުސްކުރުމެވެ. މެންބަރުން މަޖިލީހަށް ވަޑައިނުގަތުމާއި، ވޯޓު ގަޑީގައި މެންބަރުން މަޖިލީހުގައި ނުތިއްބަވާ މައްސަލަ ފަހަކަށް އައިސް ކުރިމަތިވާގޮތް އިތުރުވެފައިވާކަން ފާހަގަކޮށްލެވެއެވެ. އެގޮތުން މަޖިލީހުގައި ބަޖެޓް ބަހުސްގައި ބައިވެރިވުމަށް އެދިވަޑައިގަންނަވާ މެންބަރުން ހާޒިރުވެ ނެތުމުން މަޖިލީހުގެ ޖަލްސާ ނިންމާލަން ޖެހިފައިވެއެވެ. މީގެ ކުރިން ރައީސް ނަޝީދު ވަނީ މަޖިލީހުގެ ބައެއް މެންބަރުން އާދަޔާއި ޚިލާފަށް ގިނައިން ސަލާމް ވިދާޅުވާތީ އެކަމަށް ވެސް ފާޑު ވިދާޅުވެފައެވެ.
