ސައޫދީ އަރަބިޔާ އަތުން ބަލިވުމުން, ތެދުވެ މަސައްކަތް ކުރާނީ ކުރިއަށް އޮތް ދެ މެޗު ކާމިޔާބުކުރަން ކަމަށް އާޖެންޓީނާގެ ކޯޗު ލިއޮނެލް ސްކަލޯނީ ބުނެފިއެވެ.
މުބާރާތުގެ ފުރަތަމަ މެޗުގައި ސައުދީ އަތުން ބަލިވެ އާޖެންޓީނާއަށް ވަނީ އެ ޓީމު ދަމަހައްޓަމުން އައި މޮޅުވުމުގެ ސިލްސިލާ ނިމިފައެވެ. މުބާރާތުގެ ފުރަތަމަ މެޗުން ބަލިވުމުން އެ ޤައުމަށް ވަނީ އިތުރު ޕްރެޝަރަކާ ކުރިމަތިލާން ޖެހިފައެވެ. މެޗަށްފަހު ވާހަކަ ދައްކަމުން ސްކަލޯނީ ބުނީ، ސައުދީގެ ކުޅުން އެނގޭ ކަމަށެވެ. އެހެންކަމުން މެޗަށް ތައްޔާރުވީ ސައުދީން ޑިފެންސް ކުރާނެ ކަމަށް ވިސްނައިގެން ކަމަށެވެ. އޭނާ ބުނީ އާޖެންޓީނާ އިން ޖެހި ލަނޑުތައް އޮފްސައިޑުވީ މިލިމީޓަރެއްހާ ހިސާބުން ކަމަށެވެ.
ސްކަލޯނީ ބުނީ މުބާރާތް ފަށަން ޖެހުނީ ރަނގަޅު ނަތީޖާއަކާއެކު ނޫން ކަމަށެވެ. ނަމަވެސް ފުޓުބޯޅަ އަކީ އެކަހަލަ ކަމެއްކަން ފާހަގަކުރަމުން ސްކަލޯނީ ބުނީ، ވަރލްޑް ކަޕަކީވެސް ތަފާތު މުބާރާތެއް ކަމަށެވެ. ސްކަލޯނީ ބުނީ މެޗުން ލިބުނީ ބައްޔެއް ކަމަށް ޤަބޫލު ކުރާކަމަށާއި، ނަމަވެސް ތެދުވެ ކުރިއަށް ދާން މަސައްކަތް ކުރާނެ ކަމަށެވެ. އެގޮތުން ދެން މަސައްކަތް ކުރާނީ ހެދުނު ގޯސްތައް ރަނގަޅުކޮށް، ކުރިއަށް އޮތް މެޗު ކާމިޔާބު ކުރަން ކަމަށް އޭނާ ބުންޏެވެ.
މީގެ އިތުރުން ސްކަލޯނީ ބުނީ މުބާރާތުގައި ކުރިއަށް ދެ މެޗު އެބަ އޮތް ކަމަށާއި، އެ ދެ މެޗައިގެން ކުރިއަށް ދާން ބޭނުންވާ ކަމަށެވެ. މުބާރާތުގައި އާޖެންޓީނާއަށް ދެން އޮތީ މެކްސިކޯއާ ދެކޮޅަށް ކުޅޭ މެޗާއި، ޕޮލޭންޑާ ދެކޮޅަށް ކުޅޭ މެޗެވެ. މި މަހުގެ 27 ވަނަ ދުވަހު އާޖެންޓީނާ އިން މެކްސިކޯއާ ދެކޮޅަށް ނިކުންނައިރު، ޕޮލޭންޑާ ދެކޮޅަށް ނިކުންނާނީ ޑިސެމްބަރު އެއް ވަނަ ދުވަހުއެވެ.
