ކޮލެޖް، ޔުނިވަސިޓީއަކަށް ބަދަލުވާ މުއްދަތު ކުޑަކުރަން ހުށަހެޅި ބިލް ތަޅުމުން ބޭރު
43 މެމްބަރުން ވަނީ ބިލް ބަލައިގަންނަން ނުފެންނަކަމަށް ވޯޓު ދެއްވާފައި
ރައްޔިތުންގެ މަޖިލީހުގެ ޖަލްސާގެ ތެރެއިން
ރާއްޖޭގައި ކޮލެޖުގެ ގޮތުގައި މެދު ކެނޑުމެއްނެތި ހިންގާތާ 15 އަހަރު ވެފައިވާ ތަޢުލީމުދޭ މަރުކަޒުތަކަށް ޔުނިވާސިޓީގެ ދަރަޖަ ލިބޭ ގޮތަށް ދިވެހިރާއްޖޭގެ މަތީ ތައުލިމާއި ތަމްރީނުގެ ޤާނޫނަށް ހުށަހަޅާފައިވާ އިސްލާހުގެ ބިލް ތަޅުމުން ބޭރުކޮށްލައިފިއެވެ.
ތުލުސްދޫ ދާއިރާގެ މެމްބަރ އިބްރާހިމް ނަސީމް ހުށަހެޅުއްވި މިބިލް ދިރާސާކުރީ ޤައުމީ ތަރައްޤީ އާއި ތަރިކައިގެ ކޮމިޓީންނެވެ. ކޮމިޓީ ރިޕޯޓް ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި 43 މެމްބަރުން ވަނީ ރިޕޯޓް ފާސްކުރަން ނުފެންނަކަމަށް ވޯޓު ދެއްވާފައެވެ. ކޮމިޓީ ރިޕޯޓް ފާސްކުރަން ފެންނަކަމަށް ވޯޓު ދެއްވީ 10 މެމްބަރުންނެވެ. އެއާއެކު ދެން ވޯޓަށް އެހީ ބިލް އަނބުރާ ކޮމިޓީއަށް ފޮނުވާލުމަށެވެ. އެކަމަށް ތާއީދުކުރެއްވީ 11 މެމްބަރުންނެވެ. 43 މެމްބަރުން ވަނީ އަލުން އަނބުރާ ބިލް ކޮމިޓީއަށް ފޮނުވަން ނުފެންނަކަމަށް ވޯޓު ދެއްވާފައެވެ. އެއާއެކު ބިލް ތަޅުމުން ބޭރުވީއެވެ.
މި ބިލުގައި ބުނެފައިވަނީ ކޮލެޖެއް ހިންގާތާ 20 އަހަރުވުމުން ޔުނިވަރސިޓީއަކަށް ބަދަލުވާން އޮންނަ މުއްދަތު 15 އަހަރަށް ކުޑަކުރުމަށެވެ. މި އިސްލާހުގައި އިތުރަށް ބުނެފައި ވަނީ ފަސް ދާއިރާއެއްގެ ތެރެއިން މަދުވެގެން ތިން ދާއިރާއިން ޤައުމީ ސަނަދުތަކުގެ އޮނިގަނޑުގެ ޑިގްރީ ލެވެލް އަދި މާސްޓާސް ލެވެލްގެ ޕްރޮގުރާމުތައް އެކޮލެޖަކުން ނުވަތަ ބޭރުގެ ޔުނިވާސިޓީއަކުން ހިންގަން ޖެހޭނެކަމަށެވެ.
އެ އިސްލާހުގައި ބުނާ ގޮތުން މި ޕްރޮގުރާމުތައް ހިންގާ ކޮލެޖުތަކުގައި ކިޔަވާ 500 ކުދިން ތިބެންޖެހެއެވެ. ނުވަތަ ބައިނަލް އަގުވާމީ ކޮލިޓީ އެޝުއަރެންސް ޖަމާއަތެއްގެ މެމްބަރެއްގެ ގޮތުގައި މަދުވެގެން ހޭދަކޮށްފައިވާ ކޮލެޖަކަށް އެ ކޮލެޖެއް ވާން ޖެހޭނެއެވެ. ރާއްޖެއިން ބޭރުގެ ޔުނިވާސިޓީތަކާއި، ޖަމާއަތްތަކާއި އެކު ބައިނަލްއަގުވާމީ ފެންވަރުގެ ދިރާސާތައް ހިންގުމުގެ ތަޖުރިބާ ލިބުމުގެ އިތުރުން އެކޮލެޖެއްގެ ޕްރޮގްރާމުތަކުގައި ކިޔަވައިދޭ ލެކްޗަރާއިންގެ މަދުވެގެން %10 މުވައްޒިފުންނަކީ ޕީއެޗްޑީ ނުވަތަ ހަޔަ ޕްރޮފެޝަނަލް ޑިޕްލޮމާ ހާސިލްކޮށްފައިވާ ބަޔަކަށް ވާންޖެހޭނެ ކަމަށް ވެސް އެ އިސްލާހުގައި ވަނީ ބުނެފައެވެ.
