ސައުދު އެމްޑީޕީއަށް ސޮއިކުރެއްވުމުން ކޮމިޓީތަކުގައި ހިމެނޭ މެމްބަރުންގެ އަދަދަށް ބަދަލުތަކެއް

އަމިއްލަ މެމްބަރެއްގެ ގޮތުގައި ރައްޔިތުންގެ މަޖިލީހަށް އިންތިޚާބުވެވަޑައިގެންނެވި ވިލިނގިލި ދާއިރާގެ މެމްބަރ ސަޢުދު ޙުސައިން އެމްޑީޕީއަށް ސޮއިކުރެއްވުމާއި ގުޅިގެން ކޮމިޓީތަކުގައި ހިމެނޭ މެމްބަރުންގެ އަދަދަށް ބަދަލު ގެނައުމަށް ރައްޔިތުންގެ މަޖިލީހުން ފާސްކޮށްފިއެވެ.

ސައުދު އެމްޑީޕީއަށް ސޮއިކުރެއްވުމުން މަޖިލީހުގައި ހިމެނޭ އެމްޑީޕީގެ މެމްބަރުންގެ އަދަދު ވަނީ 66ށް އަރާފައެވެ. އެހެންކަމުން މަޖިލީހުގެ ގަވާއިދުގެ 131 ވަނަ މާއްދާގެ ދަށުން ކޮމިޓީތަކުގައި ސިޔާސީ ޕާޓީތަކަށް ނިސްބަތްވެވަޑައިގަންނަވާ މެމްބަރުންނާއި އެއްވެސް ސިޔާސީ ޕާޓީއަކަށް ނިސްބަތްވެވަޑައިނުގަންނަވާ މެމްބަރުންގެ ނިސްބަތަށް އަންނަ ބަދަލު ފާސްކުރަންޖެހެއެވެ.

އެގޮތުން މިހާރު ކޮމިޓީތަކަށް ގެނެސްފައިވާ ބަދަލަކީ ޖުޑީޝަރީ ކޮމިޓީ ގައި ވަކި ޕާޓީއަކަށް ނިސްބަތްނުވާ މެމްބަރުންނަށް ކަނޑައަޅާފައިވާ ސްލޮޓް އަދި އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީގައި ވަކި ޕާޓީއކަށް ނިސްބަތްނުވާ މެމްބަރުންގެ ސްލޮޓަކީ އެމްޑީޕީއަށް ކަނޑައަޅާފައިވާ ސްލޮޓެއްކަމަށް ހަމަޖައްސާ އެ ދެ ކޮމިޓީއަށް ވެސް ސައުދު ހަމަޖެއްސުމެވެ.

މީގެއިތުރުން ސަލާމަތީ ޚިދުމަތްތަކާބެހޭ ކޮމިޓީ އަށް ދެ ސްލޮޓް އިތުރުކޮށް އެ ސްލޮޓަކީ އެމްޑީޕީގެ ދެ ސްލޮޓް ކަމުގައި ހަމަޖެއްސުމެވެ. މިއާއެކު ސަލާމަތީ ޚިދުމަތްތަކާއި ބެހޭ ކޮމިޓީއަށް އަލިފުށީ ދާއިރާގެ މެމްބަރ މުޙައްމަދު ރަޝީދު ޙުސައިން އާއި ވިލިނގިލި ދާއިރާގެ މެމްބަރ ސައުދު ހުސައިން ކަނޑައެޅުމަށް ވަނީ ނިންމާފައެވެ. އަދި ސަލާމަތީ ޚިދުމަތްތަކާއި ބެހޭ ކޮމިޓީގައި އަމިއްލަ މެމްބަރެއްގެ ގޮތުގައި ތުލުސްދޫ ދާއިރާގެ މެމްބަރ އިބްރާހީމް ނަސީމް އެވެ.

މިރިޕޯޓް ވޯޓުގައި ބައިވެރިވެވަޑައިގެންނެވި 58 މެމްބަރުންގެ އަގްލަބިއްޔަތުން ވަނީ ފާސްކޮށްފައެވެ.

މިހާރު މަޖިލީހުގައި މެމްބަރުން ސިޔާސީ ޕާޓީތަކަށް ނިސްބަތްވާ ގޮތަކީ އެމްޑީޕީގެ 66 މެމްބަރުން، ޖޭޕީގެ 3 މެމްބަރުން ޕީޕީއެމްގެ 6 މެމްބަރުން، ޕީއެންސީގެ 3 މެމްބަރުން، އެމްޑީއޭގެ 2 މެމްބަރުން، އެމްއެންޕީގެ 3 މެމްބަރުން އަދި ވަކި ސިޔާސީ ޕާޓީއަކަށް ނިސްބަތްވެވަޑައިނުގަންނަވާ 4 މެމްބަރުންނެވެ.