އާންމު ގަވާއިދުތަކާއި ބެހޭ ގާނޫނުގެ ޖަދުވަލު 1 ގައި ހިމެނޭ "ހުޅުމާލެ ޕްލޭނިންގ އަދި އިމާރާތްކުރުމުގެ ގަވާއިދު" އިސްލާހުތަކާއެކު ރައްޔިތުންގެ މަޖިލީހުން ފާސްކޮށް އެކަން މިނިސްޓްރީއަށް އަންގާފައިވީނަމަވެސް މިއަދާ ހަމައަށްވެސް އެގަވާއިދު ގެޒެޓްކޮށްފައިނުވާތީ އެކަމުގެ ކަންބޮޑުވުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ފާޅުކުރައްވައިފިއެވެ.

އަންގާރަ ދުވަހުގެ ޖަލްސާއަށް ވަނީ ގަވާއިދު ކޮމިޓީން މި މައްސަލަ ދިރާސާކޮށް ނިންމި ގޮތުގެ ރިޕޯޓު އެޖެންޑާކޮށް އެކަމުގެ ބަހުސް ކުރިޔަށްގެންދަވާފައެވެ. ހުޅުމާލެ ޕްލޭނިންގ އަދި އިމާރާތްކުރުމުގެ ގަވާއިދު އިސްލާހުކޮށް ކޮމިޓީން ފާސްކޮށްފައިވަނީ 2018 ވަނަ އަހަރުގެ ނޮވެމްބަރު މަހުގެ 27 ވަނަ ދުވަހު އޮތް ކޮމިޓީ ބައްދަލުވުމުގައެވެ. ނަމަވެސް އެ ގަވާއިދު ގެޒެޓްކޮށްފައިނުވާތީ އެކަން ދިރާސާކުރުމުގެ މަސައްކަތް ކޮމިޓީން ފަށާފައިވަނީ 2020 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުއެވެ.

މި މައްސަލައާ ގުޅޭގޮތުން ކަންބޮޑުވުން ފާޅުކުރައްވަމުން ރައީސް ނަޝީދު ވިދާޅުވީ ގާނޫނުގައި ވަރަށް ސާފުކޮށް އަމަލުކުރަންވީ ގޮތް ބަޔާންކޮށްފައި އޮންނަކަމަށެވެ. އެނޫންގޮތަކަށް އަމަލުކުރުމަށް ގާނޫނުން ސަރުކާރަށް ތަންނުދޭކަމަށް ނަޝީދު ވިދާޅުވިއެވެ. ގާނޫނުގައި ބުނާގޮތަށް އަމަލުނުކުރުމަކީ ގާނޫނާއި ޚިލާފުވުންކަމަށް ނަޝީދު ވިދާޅުވިއެވެ.

އެހެންކަމާއި އެކަމާއި ގުޅޭގޮތުން ޝަރީޢަތަށް ވަޑައިގަތުމަށް ނުވަތަ މެންބަރުން ބޭނުންފުޅުވާގޮތަކަށް ނިންމެވިދާނެކަމަށް ނަޝީދު ވިދާޅުވިއެވެ. މީގެއިތުރުން މަޖިލީހުގެ މެޖޯރިޓީ އޮތީ އެމްޑީޕީގައި ކަމަށްވާއިރު ވަޒީރަކީވެސް އެމްޑީޕީ ވަޒީރެއްކަމަށާއި އެހެންކަމުން ކަންކަން ފަސޭހައިން ކުރިޔަށް ގެންދިޔުމުގެ މަގު ތަނަވަސްވެފައިވާކަމަށް ނަޝީދު ވިދާޅުވިއެވެ.

މިކަން ދިރާސާކުރި ކޮމިޓީން ނިންމާފައިވަނީ ރިޕޯޓް ފާސްކުރާތާ ހަތް ދުވަހުގެ ތެރޭގައި ގަވާއިދު ގެޒެޓްކުރުމަށް ހައުސިންގ މިނިސްޓްރީއަށް އެންގުމަށެވެ.