ފީފާ ވޯލްޑް ކަޕްގެ ގްރޫޕް ސްޓޭޖުން ކަޓައިގެން ޤައުމަށް ދާން ޖެހޭ 16 ޤައުމުގެ ތެރޭގައި ޕޮލޭންޑް ހިމެނެން ބޭނުންނުވާ ކަމަށް އެ ޓީމުގެ ކޯޗު ޗެސްލޯ މިކްނިއޭވިޗް ބުނެފިއެވެ.

މިކްނިއޭވިޗް މިހެން ބުނީ މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި މެކްސިކޯއާ ދެކޮޅަށް ނިކުތުމުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. އޭނާ ބުނީ މުބާރާތުގައި ފުރަތަމަ ކަަމަކީ ގްރޫޕް ސްޓޭޖު ފަހަނައަޅާ ގަދަ 16 އަށް ދަތުރުކުރުން ކަމަށެވެ. އޭނާ ބުނީ ގްރޫޕް ސީ ގައި މެކްސިކޯ، އާޖެންޓީނާ އަދި ސައުދީ އަރަބިއްޔާ އަކީ ވެސް ވަރަށް މޮޅު ޓީމުތަށް ކަމަށެވެ. އޭނާ ބުނީ ގަދަ 16 އަށް ދަތުރުނުކޮށް، ގްރޫޕް ސްޓޭޖުން މުބާރާތް ނިންމާލަން ބޭނުންނުވާ ކަމަށެވެ. ނަމަވެސް އެކަން ބިނާވެ އޮންނާނީ ޕޮލޭންޑުން ހޯދާ ޕޮއިންޓުގެ މައްޗަށް ކަމަށް އޭނާ ބުންޏެވެ.

މިކްނިއޭވިޗް ބުނީ ޕޮލޭންޑު ޓީމުގައި ތިބީ ވަރަށް ތަޖުރިބާ ހުރި ކުޅުންތެރިން ކަމަށާއި، އެ ކުޅުންތެރިންނަކީ ބޮޑެތި މުބާރާތްތަކުގައި ވެސް ކުޅެފައިވާ ކުޅުންތެރިން ކަމަށެވެ. ހަމައެއާކު ޓީމުގައި ވަރަށް ގިނަ ޒުވާން ކުޅުންތެރިން ހިމެނޭ ކަމަށް އޭނާ ބުންޏެވެ. އަދި މިފަހަރުގެ ވޯލްޑް ކަޕް މުބާރާތަކީ އެ ކުޅުންތެރިން ތަޖުރިބާ ކުރާނެ ފުރަތަމަ ބޮޑު މުބާރާތް ކަމަށް ވެސް މިކްނިއޭވިޗް ވަނީ ބުނެފައެވެ. އޭނާ ބުނީ އެ ދެބައި ހިމެނޭހެން ޕޮލޭންޑު ޓީމު ބިނާވެފައި އޮތުމަކީ ރަނގަޅުކަމެއްގެ ގޮތުގައި ދެކޭ ކަމަށެވެ.

މީގެ އިތުރުން މިކްނިއޭވިޗް ބުނީ ބޭނުންވަނީ ޕޮލޭންޑު ޓީމަށް ދެވެން އޮތް އެންމެ ދުރަށް ދާން ކަމަށެވެ. އޭނާ ބުނީ ޕޮލޭންޑު ޓީމު ދާން ބޭނުންވާ ހިސާބު އޭނާ އަށް ބުނެވިދާނެ ކަމަށާއި، ނަމަވެސް ދާނެ ވަކި ހިސާބެއް ބުނަން ނޭންގޭ ކަމަށެވެ.

ގްރޫޕް ސީގައި ޕޮލޭންޑާއި މެކްސިކޯ ބައްދަލު ކުރާ މެޗު އޮންނާނީ އަންގާރަ ދުވަހުގެ ރޭ ރާއްޖެ ގަޑިން 21:00 ގައެވެ.