ކުށްކުރުމާއި ކޮރަޕްޝަނާއި ދެކޮޅަށް ފިޔަވަޅު ނާޅާތީ ސަރުކާރާ ދެކޮޅަށް މެކްސިކޯގެ ޖެން-ޒީން މުޒާހަރާ ކުރަން ފަށައިފި އެވެ.

ހޮނިހިރު ދުވަހު ބޭއްވި މުޒާހަރާގައި ތަފާތު އުމުރުފުރާތަކުގެ އެތައް ހާސް މީހުން ވަނީ ބައިވެރިވެފައެވެ. އޭގެ ތެރޭގައި އިދިކޮޅު ޕާޓީތަކުގެ އެކްޓިވިސްޓުންނާއި، މި މަހުގެ ކުރީކޮޅު މަރާލި މޭޔަރު ކާލޯސް މަންޒޯ އަށް ތާއީދު ކުރާ ފަރާތްތައް ވެސް ހިމެނެއެވެ.

މެކްސިކޯ ސިޓީގައި، ރައީސް ކްލައުޑިއާ ޝެއިންބައުމް ދިރިއުޅުއްވާ ނޭޝަނަލް ޕެލަސްގެ ވަށައިގެން ހުރި ސަލާމަތީ ބެރިކޭޑް ތައް މޫނު ނިވާކޮށްގެން ތިބި މުޒާހަރާގެ ބައިވެރިން ވަނީ ވައްޓާލާފައެވެ. މީޑިއާ ރިޕޯޓްތަކުގައިވާ ގޮތުން، މިކަމުގެ ސަބަބުން ރަޔަޓް ފުލުހުން އެމީހުންނާ ކުރިމަތިލާ، ފުލުހުން ޓިއާ ގޭސް ބޭނުން ކުރިއެވެ.

މެކްސިކޯ ސިޓީގެ ޢާންމު ސަލާމަތާ ބެހޭ ވަޒީރު ޕާބްލޯ ވާޒްކުއޭޒް ނޫސްވެރިންގެ ބައްދަލުވުމެއްގައި ވިދާޅުވީ 100 ފުލުހުން ޒަހަމްވެފައިވާ ކަމަށާއި، އޭގެ ތެރެއިން 40 ފުލުހުންނަށް ހޮސްޕިޓަލް ފަރުވާ ބޭނުންވި ކަމަށެވެ.

އިތުރު 20 އާންމުން ޒަހަމްވި ކަމަށް ލޯކަލް މީޑިއާ ރިޕޯޓުތަކުގައި ވެއެވެ.

ޢާންމު ސަލާމަތާ ބެހޭ ވަޒީރު ވިދާޅުވީ 20 މީހުން ހައްޔަރުކޮށްފައިވާ ކަމަށެވެ.

ސަލާމަތީ ބާރުތަކުން މުޒާހަރާކުރާ މީހުން ނޭޝަނަލް ޕެލަސްގެ ސަަރަހައްދަށް ވަނުމުން ކަރުނަ ގޭސް ޖަހާ އެމީހުންނާ ދިމާލަށް ގައު އުކާފައިވެއެވެ.

މުޒާހަރާ އިސްނަގައިގެން ރާވާފައިވަނީ "ޖެނެރޭޝަން ޒެޑް މެކްސިކޯ" ކިޔާ ގުރޫޕަކުންނެވެ. އެ ގުރޫޕުން ސޯޝަލް މީޑިއާގައި ދައުރުކުރަމުން ގެންދާ "މެނިފެސްޓޯ"އެއްގައި ބުނީ އެއީ ޕާޓީއަކަށް ނިސްބަތްވާ ގުރޫޕެއް ނޫން ކަމަށާއި، އަދި އެއީ އަނިޔާވެރިކަމާއި، ކޮރަޕްޝަނާއި، ބާރުގެ ނާޖާއިޒު ބޭނުންކުރުން ހައްދުން ނެއްޓުމާ ގުޅިގެން އެކަމާ ދެކޮޅަށް މެކްސިކޯގެ ޒުވާނުން ކުރާ އިހުތިޖާޖެއް ކަމަށެވެ.

މި އަހަރު އޭޝިއާ އާއި އެފްރިކާގެ ގިނަ ގައުމުތަކުގައި، ޖެން-ޒީ އުމުރުގެ ގުރޫޕް ތަކުން ވަނީ ބޭއިންސާފާއި، ޑިމޮކްރަސީ ބަލިކަށިކުރުމާއި، ކޮރަޕްޝަނާ ދެކޮޅަށް މުޒާހަރާތައް އިސްނަގައިގެން ރާވާފައެވެ.

އެންމެ ބޮޑު ޖެން-ޒީ މުޒާހަރާތައް ބޭއްވުނީ ސެޕްޓެމްބަރު މަހު ނޭޕާލްގައި، ސޯޝަލް މީޑިއާ މަނާކުރުމާ ގުޅިގެންނެވެ. އެ މުޒާހަރާތަކާ ގުޅިގެން އޭރުގެ ބޮޑުވަޒީރު ކޭޕީ ޝަރުމާ އޯލީ އިސްތިއުފާ ދެއްވިއެވެ.

މަޑަގަސްކަރާ ގައި ވެސް ސެޕްޓެމްބަރު މަހު ބޮޑެތި މުޒާހަރާތައް ބޭއްވި އިރު މުޒާހަރާތައް، ފުރަތަމަ ފެށުނީ ފެނާއި، ކަރަންޓު ގިނަ އިރުތަކަކަށް ކެނޑުމާއި ގުޅިގެން އައި ރުޅީގެ ސަބަބުންނެވެ. ފަހުން، ސަރުކާރުގެ ފެއިލްވުންތަކާއި، ކޮރަޕްޝަން ގެ މައްސަލަތަކަށް މުޒާހަރާތަކުގެ މަގްސަދު ބަދަލުވިއެވެ. ހަފްތާތަކަށް ދެމިގެންދިޔަ މުޒާހަރާތައް ނިމުނު އިރު ސަރުކާރު ވަނީ ވެއްޓިފައެވެ. ރައީސް އެންޑްރީ ރަޖޯލީނާ ފާއިތުވި މަހު ގައުމުން ވަނީ ފިއްލަވާފައެވެ.

ޖެން-ޒީ މުޒާހަރާތައް ބަންގްލަދޭޝްގައި ވެސް ވަނީ ކުރިއަށް ގެންގޮސްފައެވެ. އެއާއެކު ބޮޑު ވަޒީރު ހަސީނާ ގައުމުން ފިއްލަވައިގެން އިންޑިއާ އަށް ވަޑައިގަތެވެ.