މިއަދު ރައްޔިތުން ބޭނުންވާ މިންވަރަށް އަދި އިތުރަށް ވެސް ކަރަންޓު ލިބޭނެ: ސައީދު
މީގެ ކުރިން ރައްޔިތުން ބޭނުންވާ މިންވަރަށް ކަރަންޓު ލިބުން ދަތި
ފެނަކަ ކޯޕަރޭޝަންގެ މެނޭޖިންގ ޑިރެކްޓަރު އަހުމަދު ސައީދު މުހައްމަދު
މިއަދު ރައްޔިތުމީހާ ބޭނުންވާ މިންވަރަށް އަދި އެއަށްވުރެ އިތުރަށް ވެސް ކަރަންޓުގެ ޚިދުމަތް ލިބޭނެ ކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރު އަހުމަދު ސައީދު މުހައްމަދު ވިދާޅުވެއްޖެއެވެ.
ސައީދު މިފަދައިން ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރަށް 4 އަހަރު ފުރުމާއި ގުޅިގެން ފެނަކައިން މިވީ 4 އަހަރުތެރޭގައި ހޯދާފައިވާ ކާމިޔާބީތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުންނެވެ.
ސައީދު ވިދާޅުވީ މި ސަރުކާރު ހަވާލުވީއިރު ރާއްޖޭގެ ގިނަ ރަށްރަށުގައި ރައްޔިތުންނަށް ބޭނުންވާ މިންވަރަށް ކަރަންޓު ލިބުމަށް ދަތި ކަމަށެވެ. ރައްޔިތުން ދިޔައީ ތަކުލީފުތަކެއް އުފުލަމުންކަމަށާއި، އެހެންކަމުން ރައީސް ސާލިހު ވެރިކަމާ ހަވާލުވެވަޑައިގެން ކުރެއްވި އެންމެ މުހިންމު އެއް މަސައްކަތްޕުޅަކީ މި ނިޒާމު ރަނގަޅުކޮށް ރައްޔިތުމީހާ ބޭނުންވާ ވަރަށް ކަރަންޓު ފޯރުކޮށްދިނުމުގެ މަސައްކަތް ކަމަށް ސައީދު ވިދާޅުވިއެވެ.
ފާއިތުވި 4 އަހަރުތެރޭގައި ކުރި މަސައްކަތުން މިއަދު މެދުރާއްޖޭގެ ގިނަ ރަށްރަށުގައި މި ނިޒާމު އެންމެ ޒަމާނީ ނިޒާމަކަށް ބަދަލުކުރެވިފައިވާކަމަށް ސައީދު ވިދާޅުވިއެވެ. ރައްޔިތުން ބޭނުންވާ ވަރަށް ކަރަންޓު ފޯރުކޮށްދޭން ފެށިފައިވާކަމަށާއި، ބޭނުންވާ ވަރަށްވުރެ އިތުރަށް ވެސް މިއަދު ކަރަންޓު ލިބޭނެ ކަމަށް ސައީދު ވިދާޅުވިއެވެ.
ސައީދު ވަނީ ރައީސް ސާލިހަކީ ރައްޔިތުންގެ ތަކުލީފުތައް އަޑު އައްސަވައި، އެކަންކަަމަށް ހައްލު ގެނެސްދެއްވުމަށް މަސައްކަތްކުރައްވާ ވެރިއެއްކަން ފާހަގަކުރައްވާފައެވެ. މިއަދު ރައްޔިތުން މި ތަކުލީފުތަކުން ސަލާމަތްކުރެވިފައިވާކަަމަށް ވެސް އޭނާ ވިދާޅުވިއެވެ.
