ފީފާ ވޯލްޑް ކަަޕްގެ އެންމެ ކާމިޔާބު ޓީމު ބްރެޒިލް ޤަތަރަށް

އާދިއްތަ ދުވަހުގެ ރޭ ޤަތަރުގައި ފަށާ ފީފާ ވޯލްޑް ކަޕްގައި ވާދަކުރުމަށް ބްރެޒިލް ޤަތަރަށް ގޮސްފިއެވެ.

ބްރެޒިލްގެ ޓީމު ޤަތަރަށް ގޮސްފައިވަނީ ހޮނިހިރު ދުވަހުގެ ވަގުތެއްގައެވެ. ދެކުނު އެމެރިކާ އަށް ނިސްބަތްވާ ބްރެޒިލް އަކީ މިއަހަރުގެ މުބާރާތުގެ ފޭވަރިޓުންގެ ގޮތުގައި ގިނަ ބަޔަކު ދެކެމުން އަންނަ ޤައުމެކެވެ. މީގެ އިތުރުން ބްރެޒިލް އަކީ މުބާރާތުގެ އެންމެ ކާމިޔާބު ޓީމު ވެސް މެއެވެ. އެ ޤައުމުން ވަނީ ފަސް ފަހަރު މުބާރާތް ކާމިޔާބުކޮށްފައެވެ. އެއީ 1958، 1962، 1970، 1994 އަދި 2002 ވަނަ އަހަރުއެވެ. ބްރެޒިލްގެ ފަހަތުން ޖަރުމަނު ވަނީ ހަތަރު ފަހަރު މުބާރާތް ކާމިޔާބުކޮށްފައެވެ.

ބްރެޒިލް ޓީމުގައި މިވަގުތު ހުނަރުވެރި މޮޅު ކުޅުންތެރިން ހިމެނޭއިރު، ޓީމާމެދު ކޯޗުގެ އުންމީދުތައް ވެސް ބޮޑެވެ. ބްރެޒިލްގެ ތަރި ނޭމާ ޖޫނިއާ މި ވަގުތު ރަނގަޅު ފޯމެއްގައި ހުރި އިރު، ޒުވާން ކުޅުންތެރިޔާ ވިނީޝިއަސް ޖޫނިއާ ވެސް އަންނަނީ މޮޅު ކުޅުމެއް ދައްކަމުންނެވެ.

މިއަހަރުގެ މުބާރާތުގައި ބްރެޒިލް އޮތީ ސާބިއާ، ސްވިޒަލޭންޑް އަދި ކެމަރޫންއާއެކު ގްރޫޕް ޖީ ގައެވެ. ބްރެޒިލްގެ ފުރަތަމަ މެޗުގައި އެ ޤައުމުން ސާބިއާއާ ދެކޮޅަށް ނުކުންނާނީ މި މަހުގެ 25 ވަނަ ދުވަހުއެވެ. އޭގެ ފަހުން ދެ ވަނަ މެޗުގައި ސްވިޒަލޭންޑާ ދެކޮޅަށް ނުކުންނާނީ 28 ވަނަ ދުވަހުއެވެ. ގްރޫޕް ސްޓޭޖުގެ ފަހު މެޗުގައި ކެމަރޫންއާ ދެކޮޅަށް ނުކުންނާނީ ޑިސެމްބަރު މަހުގެ ތިން ވަނަ ދުވަހުއެވެ.