2026ގެ ވޯލްޑް ކަޕްގައި ކުޅެން ލެވަންޑޯސްކީ ބޭނުންވޭ
18 ނޮވެމްބަރު 2022 | ހުކުރު 15:222026 ގެ ވޯލްޑް ކަޕްގައި ކުޅޭނެ ފެންވަރު އޭނާގެ އެބަހުރި ކަމަށް ލެވަންޑޯސްކީ ބުނި
ރޮބަޓް ލެވަންޑޯސްކީ
2026 ވަނަ އަހަރުގެ ވޯލްޑް ކަޕްގައިވެސް ކުޅެން ބޭނުންވާ ކަމުގެ އިޝާރާތެއް ޕޮލެންޑުގެ ތަރި ރޮބަޓް ލެވަންޑޯސްކީ ކޮށްފިއެވެ.
ލެވަންޑޯސްކީ ދިން އިންޓަވިއުއެއްގައި އޭނާ ބުނީ މިފަހަރުގެ މުބާރާތަށް ތައްޔާރުވަނީ މިއީ އޭނާގެ ފަހު ވޯލްޑް ކަޕަށް ވެދާނެކަމަށް ވިސްނައިގެން ކަމަށެވެ. ނަމަވެސް 2026 ގެ ވޯލްޑް ކަޕްގައި ކުޅޭނެ ފެންވަރު އޭނާގެ އެބަހުރި ކަމަށްވެސް ލެވަންޑޯސްކީ ބުންޏެވެ.
އުމުރުން 34 އަހަރުގެ ލެވަންޑޯސްކީ މިފަހަރުގެ މުބާރާތާއި ކުރިމަތިލާއިރު ހުރީ ވަރަށް ރަނގަޅު ފޯމެއްގައެވެ. މި ސީޒަންގައި ބާސެލޯނާއަށް ބަދަލުވެ ކުޅުނު 19 މެޗުން އޭނާ ވަނީ 18 ލަނޑު ޖަހާފައެވެ.
ލެވަންޑޯސްކީ ބުނީ މުބާރާތުގައި އިދިކޮޅު ޓީމުން އޭނާ ހުއްޓުވުމަށް މޭންމާކް ކުރުމަކީ އެކަށީގެންވާ ކަމެއް ކަމަށެވެ. ނަމަވެސް ޓީމަށް އޭގެން ފައިދާކުރާނެކަން ފާހަގަކޮށް ލެވަންޑޯސްކީ ބުނީ އޭގެ ސަބަބުން ޓިމުގައި ދެން ތިބި ކުޅުންތެރިންނަށް ހުސް ފުރުސަތުތައް ގިނައިން ލިބޭނެ ކަމަށެވެ.
ގަތަރުގެ ފިނިހޫނުމިނާއި ގުޅޭ ގޮތުން ވާހަކަ ދައްކަމުން ލެވަންޑޯސްކީ ބުނީ އެގައުމަށް އޭނާ އެތައް ފަހަރަކު ގޮސްފައިވާ ކަމަށެވެ. އެހެންކަމުން އެހާލަތު ވަރަށް ރަނގަޅަށް އެނގޭ ކަމަށާއި، އެހުރިހާ ކަމަކަށް ހޭނެން އެނގޭ ކަމަށެވެ.
މުބާރާތުގައި ޕޮލެންޑު ލައްވާލާފައި އޮތީ މެކްސިކޯ، އާޖެންޓީނާ އަދި ސައޫދީ އަރަބިއްޔާއާ އެއް ގްރޫޕެއްގައެވެ. ފުރަތަމަ މެޗުގައި މިއަންނަ އަންގާރަ ދުވަހު ނުކުންނަން ޖެހޭނީ މެކްސިކޯއާ ދެކޮޅަށެވެ.
