މާނޭއަށް ވޯލްޑް ކަޕްގައި ނުކުޅެވޭނެ!

ކުރިއަށް އޮތް ފީފާ ވޯލްޑް ކަޕްގައި ސެނެގޯލް ޓީމުގެ ތަރި ސަޑިއޯ މާނޭއަށް ނުކުޅެވޭނެ ކަމަށް ރިޕޯޓުތައް ބުނެފިއެވެ.

މާނޭއަށް ވޯލްޑް ކަޕް ގެއްލުނީ އަނިޔާގެ ސަބަބުންނެވެ. މި މަހުގެ އަށްވަނަ ދުވަހު ބަޔާން މިއުނިކާއި ވާޑާ ބްރެމަން ބުންޑެސްލީގާގައި ބައްދަލުކުރި މެޗުގައި މާނޭއަށް އަނިޔާވެގެން ވަނީ ދަނޑުން ބާލާފައެވެ. މިކަމާއި ގުޅިގެން މިދިޔަ އަންގާރަ ދުވަހު ސެނެގޯލްގެ ފުޓްބޯޅަ ފެޑެރޭޝަނުން ބުނީ އުމުރުން 30 އަހަރުގެ ފޯވާޑަށް ވޯލްޑް ކަޕްގެ ފުރަތަމަ މެޗު ގެއްލޭނެ ކަމަށެވެ.

ނަމަވެސް ބީބީސީން ރިޕޯޓުކޮށްފައިވާ ގޮތުގައި ބުރާސްފަތި ދުވަހު މާނޭގެ އިތުރު އެމްއާރުއައިއެއް ވަނީ ހަދާފައެވެ. އަދި ނަތީޖާތައް ބެލުމަށްފަހު އިތުރު އޮޕަރޭޝަނެއް ކުރަން ޖެހުމުން ބުރާސްފަތި ދުވަހު އޮޕަރޭޝަން ކޮށްފައިވާ ކަމަށްވެސް ރިޕޯތުކޮށްފައިވެއެވެ. ބަޔާން މިއުނިކުން ވަނީ މި އޮޕަރޭޝަން ކާމިޔާބުކަމާއެކު ނިންމާލެވުނުކަން ކަށަވަރުކޮށްދީފައެވެ.

މާނޭއަކީ ސެނެގޯލް ޓީމުގެ އެންމެ މުހިންމު ކުޅުންތެރިޔާއެވެ. އެފްރިކާގެ މޮޅު ކުޅުންތެރިޔާގެ މަގާމު ދެފަހަރު ހޯދާފައިވާ މާނޭ ވަނީ މިސްރާއި ވާދަކޮށް އެފްރިކާ ކަޕް އޮފް ނޭޝަންސް ކާމިޔާބުކުރުމުގައި ސެނެގޯލްއަށް މުހިންމު ދައުރެއް އަދާކޮށްދީފައެވެ. އޭގެ ފަހުން މިސްރު ކަޓުވާލުމަށްފަހު ވޯލްޑް ކަޕަށް ސެނެގޯލް ކޮލިފައި ކޮށްދިނުމުގައިވެސް އެންމެ މުހިންމު ދައުރެއް އަދާކުރީ މާނޭއެވެ.

ވޯލްޑް ކަޕްގައި ސެނެގޯލް ހިމެނެނީ މުބާރާތް ބާއްވާ ޤައުމު ޤަތަރު، ނެދަލެންޑްސް އަދި އެކުއެޑޯއާއެކު ގްރޫޕް އޭގައެވެ. ފުރަތަމަ މެޗުގައި މިއަންނަ ހޯމަ ދުވަހު ވާދަކުރަން ޖެހޭނީ ނެދަލެންޑްސްއާއެވެ. އޭގެ ފަހުން ދެވަނަ މެޗުގައި 25 ވަނަ ދުވަހު ޤަތަރާއި ވާދަކުރަން ޖެހޭނެއެވެ. ގްރޫޕް ސްޓޭޖުގެ ފަހު މެޗުގައި މި މަހުގެ 29 ވަނަ ދުވަހު ސެނެގޯލް ކުރިމަތިލާން ޖެހޭނީ އެކުއެޑޯއާއެވެ.